Job 32:1-22
32 Kanian sarayan taloran lalaki et agla ra inmebat ed si Job, lapud sikatoy kombinsido ed dilin inkatunong to.*+
2 Balet pinasyay pasnok nen Elihu ya anak nen Barakel a Buzita+ a nanlapud pamilya nen Ram. Dinmalang so sanok tod si Job lapud labay ton paneknekan a sikato* so duga, aliwan say Dios.+
3 Pinasya met so pasnok to ed taloran kakaaro nen Job, lapud anggapo la lanti niyebat da et ibabaga da nin mauges so Dios.+
4 Manaalagar si Elihu pian naebatan toy Job, lapud mas matatken ira nen sikato.+
5 Sanen naimano nen Elihu ya anggapo lay niyebat na taloran lalaki, lalon pinmetang so sanok to.
6 Kanian si Elihu ya anak nen Barakel a Buzita et ginmapon nansalita, a kuan to:
“Maedad kayo la+Balet siak, ugaw ak ni.*
Kanian pinokpokan koy sarilik lapud panagrespetok,+Tan agko sinalin ibagad sikayo so amtak.
7 Inisip ko, ‘Say edad* so nepeg a mansalita,Tan say dakel a taon so nepeg a mangipaamta na karunongan.’
8 Balet say espiritun iiter na Dios ed totoo,Say ingas na Makapanyarin-amin, so mangiiter ed sikara na pakatalos.+
9 Aliwan say edad labat* so manggawad sakey a marunong,Tan aliwan saray mamasiken labat so makatalos ed duga.+
10 Kanian kuan ko, ‘Dengel kad siak,Tan ibagak met ed sika so amtak.’
11 Et aalagaren koy pansalita yo;Dedengelen koy panagkatunongan yo+Legan kayon mannononot na ibaga yo.+
12 Iimanoen ta kayon maong,Balet anggapod sikayo so makapaneknek ya aliway Job*Odino makaebat ed saray argumento to.
13 Kanian agyo ibabagan, ‘Aromog mi karunongan;Say Dios so misusuppiatan ed sikato, aliwan say too.’
14 Aliwan sumpad siak iray ibabaga to,Kanian agko usaren iray argumento yo diad iyebat kod sikato.
15 Adismaya ira, anggapo lay niyebat da;Anggapo lay nibaga ra.
16 Nanalagar ak, balet tinmunda la ran mansalita;Akaalagey labat ira, agla ra inmebat.
17 Kanian siak met so onebat;Ibagak met so amtak,
18 Ta amayamay so labay kon ibaga;Papakiwasen ak na espiritu.
19 Saray walad loob ko et singa alak ya ag-onsesengaw,Singa saray balon katat a panagkargaan na alak a ngalngali la ombutnak.+
20 Abuloyan mo ak a mansalita pian nainawaan ak!
Biswaten koy sangik tan onebat ak.
21 Anggapoy siopaman a paboran ko;+Tan agak manlarog* ed anggan siopa,
22 Ta agko amtay manlarog;No amtak, paandien ak a tampol na Manamalsak.
Paimanod leksab
^ Odino “lapud ipapasen toy sarili to a matunong.”
^ Odino “say kamarerwa to.”
^ Literal, “melag ak ed saray agew.”
^ Literal, “Saray agew.”
^ Odino “Aliwan say dakel ya agew labat.”
^ Odino “makapangipetek ed si Job.”
^ Odino “mangiter na mapagalang a titulo.”
