Job 34:1-37
34 Kanian intuloy nen Elihu so ibabaga to, a kuan to:
2 “Talineng yo ray salitak, sikayo ran marunong;Dengel yo ak, sikayo ran makabat.
3 Ta susuboken na layag iray salitaNo panon a tatawayan na dila* iray kakanen.
4 Sikatayon mismo so mangusisa no antoy duga;Mandesisyon tayo no antoy maong.
5 Ta inkuan nen Job, ‘Wala ak ed katunongan,+Balet insiblet na Dios ed siak so hustisya.+
6 Kasin mantila ak pian agko naawat so panangukom a manepeg ed siak?
Ag-onabig so sugat ko anggano anggapoy kasalanan ko.’+
7 Wala tay laki a singa si Job,Ya iinumen ton singa danum so panagbalaw?
8 Nakakaulop to iray manggagaway aliwaTan nakakalimog to ray totoon mauges.+
9 Ta inkuan to, ‘Anggapoy nagunggona na tooEd pamapaliket tod Dios.’+
10 Kanian dengel yo ak, sikayo ran lalakin walaay pakatalos:*
Agbalot manggaway mauges so tuan Dios,+Agbalot manggaway aliwa so Makapanyarin-amin!+
11 Ta tumangan to so too unong ed gagawaen to+Tan ipasagmak tod sikato iray resulta na kagagawa to.
12 Ta segurado a say Dios et agmanggagaway mauges;+Agpipikeweten na Makapanyarin-amin so hustisya.+
13 Siopay angipasen ed sikaton mangasikaso ed dalin,Tan siopay anuro ed sikaton manuley ed interon mundo?*
14 No iteteen toy imano to* ed sikara,No titiponen tan aalaen to so espiritu tan ingas da,+
15 Amin a totoo* et ompatey,Tan say katooan et ompawil ed dabok.+
16 Kanian no walay pakatalos mo, imanom iya;Dengel mon maong so ibabagak.
17 Nepeg kasin manuley so sakey a kabusol toy hustisya,Odino kondenaen mo kasi so makapanyari a mangipapatnag na inkatunong?
18 Ibagam ta ed sakey ya ari, ‘Anggapoy kakanaan mo,’
Odino diad saray gagalangen a totoo, ‘Mauges ka’?+
19 Ta say Dios et agto pipilaan iray prinsipeTan agto papaboran so mayaman nen say mairap-bilay,*+Ta amin da et ginawa na saray lima to.+
20 Nayarin bigla ran ompatey+ diad pegley-labi;+Mankakkayerker ira insan la ra naandi;Anggan say makapanyari et napapaekal, balet aliwan diad panamegley na lima na too.+
21 Ta saray mata na Dios et akateen ed saray dalan na sakey a too,+Tan nanenengneng Toy amin a kupbang to.
22 Anggapoy bilunget odino makapal a bilungetA napanamotan na saramay manggagaway aliwa.+
23 Ta say Dios et agmangigagana na panaon parad siopaman a tooPian onarap ed sikato diad panangukom.
24 Dederalen toy makapanyari ya agto la kaukolan so manimbestigaTan sananey so iiyan tod pasen da.+
25 Ta amta to no antoy gagawaen da;+Diad labi et tataloen to ra, tan nadederal ira.+
26 Kakabilen to ra lapud kaugsan daDiad pasen a nanengneng na amin,+
27 Lapud agla ra ontutumbok ed sikato+Tan ibabaliwala ra so amin a dalan to;+
28 Sikaray sengegan no akin ya onaakis ed sikato so mairap-bilay,Kanian narerengel to so akis na andiay pakayari.+
29 Sano manpapareen so Dios, siopay makakondena ed sikato?
Sano iyaamot toy lupa to, siopay makanengneng ed sikato?
Balanglan diad sakey a nasyon odino diad sakey a too, pareho labat so nagawa,
30 Pian say mauges a too* et agmakapanuley+Tan agto napatitan iray totoo.
31 Ta wala tay siopaman a mangibagad Dios,‘Adusa ak, anggano anggapoy ginawak a kasalanan;+
32 Ibangat mod siak imay agko anengneng;No walay ginawak ya aliwa, agko la ’tan uliten’?
33 Tumangan to ka kasi unong ed labay mo no ipulisay moy panangukom to?
Sikay nepeg a mandesisyon, aliwan siak.
Kanian ibagam ed siak no antoy amtam.
34 Saray lalakin walaay pakatalos* et ibaga rad siak—Siopaman a marunong a lakin makakarengel ed siak—
35 ‘Si Job et mansasalita ya andian na kakabatan,+Tan agnapatnagan so aralem a pakatalos ed saray ibabaga to.’
36 Komon ta nasubok si Job* ed anggad nayarian toLapud oneebat a singa saramay mauges a totoo!
37 Say kasalanan to et aaruman to na panagrebelde;+Diad arapan tayo et sikatoy mantipak tekep na panagmudmoraTan amayamay so ibabaga to sumpad tuan Dios!”+
Paimanod leksab
^ Literal, “ngalangala.”
^ Literal, “puso.”
^ Odino “panaayaman a dalin.”
^ Literal, “puso to.”
^ Literal, “laman.”
^ Odino “gagalangen a too nen say nipaabeba.”
^ Odino “say agmatoor.”
^ Literal, “puso.”
^ Odino posiblin, “Ama, komon ta nasubok si Job.”
