Joel 1:1-20
1 Saya so mensahe nen Jehova a sinmabi ed si Joel* ya anak nen Petuel:
2 “Dengel kayo, sikayo ran mamatatken,Tan talineng kayo, amin yon manaayam ed dalin.
Wala la kasi onian agawa ed saray agew yo,Odino ed saray agew na inmuunan atateng yo?+
3 Isalaysay yo itan ed saray ananak yo,Tan isalaysay itan na saray ananak yo ed saray ananak da,Tan saray ananak da ed ontumbok a henerasyon.
4 Samay kera na saray managderal a duron et kinan na saray amungkog a duron;+Tan samay kera na amungkog a duron et kinan na saray andiay-payak a duron;Tan samay kera na saray andiay-payak a duron et kinan na saray masisiban duron.+
5 Bangon kayo, sikayo ran buanges,+ tan akis kayo!
Manugaog kayo, amin yon mainum na alak,Ta inala rad sangi yo so masamit ya alak.+
6 Ta tinmatdang ed dalin ko so sakey a nasyon a makapanyari tan agnabilang iray totoo to.+
Saray ngipen to et singa ngipen na leon,+ tan saray panga to et singa panga na leon.
7 Dineral toy kaubasan ko tan sengeg labat so inkera tod kiew kon igos,Inubakan to iratan insan to imbantak,Kanian nagmaliw ya amputi iray sanga na satan.
8 Manugaog kayo a singa gagawaen na sakey a birhen* ya akasulong na sakon abelLapud nobyo* to legan na inkaugaw to.
9 Anggapo lay apay a kakanen+ tan apay ya iinumen+ diad abung nen Jehova;Maneermen iray saserdote, saray lingkor nen Jehova.
10 Aderal iray tanaman ed uma, maneermen so dalin;+Ta naandi lay ilik, anggapo lay balon alak, naupot lay larak.+
11 Adismaya iray dumaralus, manugaog iray manag-asikaso ed kaubasan,Lapud trigo tan sebada;Ta anggapo lay panag-ani ed uma.
12 Amagaan so sengeg na ubas,Alenes so kiew ya igos.
Amagaan so kiew a granada, kiew a palma, tan kiew a mansanas,Amin a kiew ed uma;+Ta naandi lay panliliket na totoo.
13 Mansulong kayoy sakon abel* tan manermen kayo,* sikayo ran saserdote;Manugaog kayo, sikayo ran manlilingkor ed altar.+
Loob kayo tan mansulong kayo na sakon abel a sanlabi, sikayo ran manlilingkor ed Dios ko;Ta anggapo lay mangawit na apay a kakanen+ tan apay ya iinumen+ diad abung na Dios yo.
14 Iyabawag* yoy sakey a panag-ayunal; mangiyuksoy kayoy sagradon pantitipon.+
Pantitipon yo ray mamatatken, tan amin a manaayam ed dalin,Diad abung nen Jehova a Dios yo,+ tan kerew kayoy tulong ed si Jehova.
15 Makapagonigon itan ya agew!
Ta asingger lay agew nen Jehova,+Tan onsabi itan a singa panagderal na Makapanyarin-amin!
16 Agta sankanengneng tayon naandi so kakanen,Tan say panliliket tan gayaga diad abung na Dios tayo?
17 Nagmaliw ya andi-kakanaan iray bini.*
Aderal la iray pasen a panagsimpenan.
Ageba la iray kamalir, lapud anggapo lay anien ya ilik.
18 Onaakis so anggan saray kokomponien ya ayep!
Manlilipenglipeng iray baka lapud inkawetwet, ta anggapoy pampastolan ed sikara!
Tan akoen na saray karnero so dusa.
19 Ontawag ak ed sika, O Jehova;+Ta inakmon la na apoy iray panagpastolan diad kalawakan,Tan inupot la na apoy so amin a kiew ed uma.
20 Anggan saray ayep ed uma et manpipirawat ed sika,
Lapud amagaan la ray aagusan na danum
Tan inakmon la na apoy iray panagpastolan ed kalawakan.”
Paimanod leksab
^ Kabaliksan toy “Si Jehova so Dios.”
^ Odino “kalangweran a bii.”
^ Odino “asawa.”
^ Literal, “Manbalkes kayo.”
^ Odino “tapok yo ray pagew yo.”
^ Literal, “Pasantos.”
^ Odino posiblin, “iray pinamagan igos.”
