Joel 2:1-32
2 “Paknol yoy tambuyog ed Sion!+
Eyag kayo parad guerra diad masanton palandey ko.
Onggiwgiw komon so amin a manaayam ed dalin,Ta onsabi lay agew nen Jehova!+ Asingsingger la!
2 Agew itan ya ambilbilunget,+Agew na lurem tan makapal a bilunget,+Singa liwawa no palbangon a sinminag ed kapalandeyan.
Walay dakdakel tan makapanyarin totoo;+Anggapo nin balot nensaman so singa ontan,Tan anggapo lay ontan lamet
Diad ilabas na saray taon na amin a henerasyon.
3 Diad arapan da et walay apoy a mangaakmon,Tan diad benegan da et walay apoy a manguupot.+
Singa hardin na Eden+ so dalin ed arapan da,Balet walay sakey a kalawakan ya agnapanayaman diad benegan da,Tan anggapoy makaliktar ditan.
4 Say itsura da et singa kabayo,Tan ombabatik iran singa saray kabayo a parad guerra.+
5 Singa ungol na saray karwahe so panlukso da diad saray toktok na kapalandeyan,+Singa tanol na mandarlang ya apoy a manguupot ed dayami.
Singa ra makapanyarin totoo a nandarasig parad guerra.+
6 Lapud sikara et manirap iray totoo.
Ombalanga so amin a lupa.
7 Onlusob iran singa migueguerra,Onsapat ira ed padir a singa saray sundalo,Mansiansia so balang sakey ed dilin basbas to,Tan ag-ira onarap ed sananey a dalan.
8 Tan ag-ira mantutulakan;Balang laki et onaabante ed direksion to.
No wala ray natumba lapud saray armas,*Agbuyaken na arum so inkadasig da.
9 Ondadagsa rad saray syudad, ombabatik irad tapew na padir.
Onsesegep irad kaabungan, a singa ra matakew ya ondadalan ed saray bintana.
10 Yinmegyeg so dalin tan atenyeg so tawen diad arapan da.
Binmilunget so agew tan bulan,+Tan agla sinminag iray bitewen.
11 Ikasil nen Jehova so boses to diad arapan na armada to,+ ta balbaleg so kampo to.+
Ta mabiskeg imay manusumpal ed salita To;Ta say agew nen Jehova et baleg tan makapataktakot.+
Siopay makaliktar ed satan?”+
12 “Balet anggan natan,” so imbaga nen Jehova, “pawil kayod siak ed interon puso yo,+Tan manayunal,+ onakis, tan manugaog kayo.
13 Pilat yo iray puso yo,+ aliwan saray kawes yo,+Tan pawil kayod si Jehova a Dios yo,Ta sikatoy maabagey tan mapangasi, matantan a manpasnok+ tan abalbaleg so matoor a panangaro to,+Tan pannonotan to lamet* so nipaakar ed kadederal.
14 Siopay makaamta ompan pokpokan toy sanok to tan pannonotan to lamet*+Tan mangitilak na bendisyon,Sakey ya apay a kakanen tan apay ya iinumen parad si Jehova a Dios yo?
15 Paknol yoy tambuyog diad Sion!
Iyabawag* yo so sakey a panag-ayunal; mangiyuksoy kayoy sagradon pantitipon.+
16 Pantitipon yo ray totoo; pasantos yoy kongregasyon.+
Tipon yo ray mamasiken;* tipon yo ray ugugaw tan saramay mansususo.+
Papaway yoy nobyo ed loob na kuarto to, tan say nobya ed kuarto to.
17 Diad baetan na balkonahe tan altar+Et onakis komon iray saserdote, saray lingkor nen Jehova, tan ibaga ra:
‘Kasian mo ray totoom, O Jehova;Agmo aabuloyan a namudmora so tawir mo,Tan agmo iyaabuloy ya uleyan ira na saray nasyon.
Akin ya ibaga na saray totoo, “Kawalaan na Dios da?”’+
18 Tan maseseg a tulongan nen Jehova so dalin toTan nakasian to ray totoo to.+
19 Onebat si Jehova ed saray totoo to:
‘Iyakar kod sikayo so ilik tan balon alak tan larak,Tan napenek kayon maong;+Agko la abuloyan a balbalawen kayo na saray nasyon.+
20 Pataynanen kod sikayo imay taga amianen;Sikatoy itayak kod dalin ya amagaan tan agnapanayaman,A say bantay ed unaan* to et akaarap diad dayat ed bandad bukig*Tan say bantay ed benegan to et akaarap diad dayat ed bandad sagur.*
Onsengaw so aliwliwan angob to,Mantultuloy ya onsengaw so banget to;+Ta say Dios et manggawa na makapakelaw iran bengatla.’
21 Agka natatakot, O dalin.
Manliket ka tan manggayaga ka, ta si Jehova et manggaway makapakelaw iran bengatla.
22 Agkayo natatakot, sikayo ran ayayep,Ta magmaliw a birdi iray panagpastolan ed kalawakan,+Tan manbunga iray kiew;+Talagan manbunga so kiew ya igos tan say kaubasan.+
23 Manggayaga kayo tan manliket kayo ed si Jehova a Dios yo,+ sikayo ran anak na Sion;Ta iter tod sikayo so unonan uran a dugarugay karakel,Tan papelagen tod sikayo so maksil ya uran,Say unona tan unor ya uran, a singa nensaman.+
24 Napanoy ilik iray panag-ilikan,Tan onleppua ed saray panagpespesan so balon alak tan larak.+
25 Tan ipawil kod sikayo so naandi ed saray taonSanen saray tanem yo et kinan na saray amungkog a duron, andiay-payak a duron, masisiban duron, tan managderal a duron,Say baleg ya armadak ya imbakik ed sikayo.+
26 Seguradon mangan tan napesel kayo,+Tan idayew yoy ngaran nen Jehova a Dios yo,+A nanggaway makapakelaw iran bengatla parad sikayo;Aglan balot niiyan ed kababaingan iray totook.+
27 Tan naamtaan yo a wala ak ed Israel+Tan siak si Jehova a Dios yo+—anggapo lay arum!Aglan balot niiyan ed kababaingan iray totook.
28 Kayari na satan et ikalbok so espirituk+ ed amin a klase na laman,Tan manpropesiya iray ananak yon lalaki tan bibii,Mankugip iray mamasiken yo,Tan makanengneng na saray pasingawey iray kalangweran yon lalaki.+
29 Tan anggan diad saray ariripen kon lalaki tan ariripen kon bibiiEt ikalbok so espirituk diad saratan ya agew.
30 Tan mangipanengneng ak na saray makapakelaw a bengatla* diad tawen tan diad dalin,Dala tan apoy tan makapal ya asewek.+
31 Magmaliw ya ambilunget so agew tan magmaliw a dala so bulan+Antis ya onsabi so baleg tan makapataktakot ya agew nen Jehova.+
32 Tan balang sakey ya ontatawag ed ngaran nen Jehova et niliktar;+Ta unong ya inkuan nen Jehova, wala ray niliktar diad Palandey Sion tan diad Jerusalem,+Saramay akaliktar a tinawag nen Jehova.”
Paimanod leksab
^ Odino “saray pana.”
^ Odino “pagbabawian to.”
^ Odino “tan magbabawi.”
^ Literal, “Pasantos.”
^ Odino “mamatatken.”
^ Literal, “lupa.”
^ Salanti, say Inatey a Dayat.
^ Salanti, say Dayat a Mediteraneo.
^ Odino “saray tanda.”
