Jonas 1:1-17
1 Saya so mensahe nen Jehova a sinmabi ed si Jonas*+ ya anak nen Amitai:
2 “La kad Ninive+ a baleg a syudad, tan iyabawag moy panangukom ed sikato, ta naimanok so inkauges to.”
3 Balet imbatikan nen Jonas si Jehova tan amaarap ed Tarsis; sikatoy linmad Joppe tan akanengneng na sakey a barkon paonlad Tarsis. Kanian nampasahe tan linmugan la pian milad saramay onlad Tarsis, tan onarawid si Jehova.
4 Insan pinasiplog nen Jehova so maksil a dagem diad dayat, tan agaylay kasil na bagyo ed dayat, kanian ngalngali la nagaygay so barko.
5 Ataktakot a maong iray marino, kanian kada sakey ed sikara et kinmerew na tulong ed dios to. Tan imbabantak da ed dayat iray kagawaan a walad barko, pian onlemew itan.+ Balet si Jonas et walad daledalem na barko, a diman so dinukolan to tan masamit so ugip to.
6 Sinmingger so kapitan na barko tan imbaga tod sikato: “Akin et wadtan kan nanaugip? Bangon ka, tawag kad dios mo! Agla pigan kasian itayo na tuan Dios, tan ag-itayo ompatey.”+
7 Insan inkuan dad sakey tan sakey: “Gali, manpapalaranan itayo+ pian naamtaan tayo no siopay natetel ed sayan kalamidad.” Kanian nampapalaranan ira, tan say naplagan et si Jonas.+
8 Imbaga rad sikato: “Ipangasim, ibagam ed sikami, siopay natetel ed sayan kalamidad a sinmabi ed sikatayo? Antoy trabahom, tan iner so nanlapuan mo? Antoy bansam, tan dinan a totoo so nanlapuan mo?”
9 Inyebat to: “Sakey ak a Hebreo, tan si Jehova a Dios na katawenan so tatakotan* ko, say nanggawad dayat tan dalin.”
10 Diad saman et lalon tinmakot iray lalaki, tan intepet dad sikato: “Antoy ginawam?” (Naamtaan dan ibabatikan toy Jehova, ta imbaga tod sikara.)
11 Kanian imbaga rad sikato: “Antoy nepeg min gawaen ed sika pian ondeen so dayat?” Ta lalon onkakasil so bagyo.
12 Inyebat to: “Alsa yo ak tan ibuntok yo ak ed dayat, pian ondeen; ta amtak a siak so makasengeg no akin a sinmabi ed sikayo iyan maksil a bagyo.”
13 Balet pinasyay impanbegsay na saramay lalaki* pian nisakbit dad dalin so barko, ingen ta agda ayarian, lapud nantultuloy a kinmasil so bagyo.
14 Insan tinmawag irad si Jehova tan imbaga ra: “O Jehova, ipangasim, komon ta agkami ompatey lapud sayan too!* Agmo komon sisingilen ed sikami so dala na andiay kasalanan, ta ginawam so unong ed linawam, O Jehova!”
15 Insan inalsa ray Jonas tan imbuntok da ed dayat; tan dinmeen so dayat.
16 Diad saman et tinmakot a maong iray lalaki ed si Jehova,+ tan angiyapay ira na bagat ed si Jehova, tan insipan dan manlingkor ira ed sikato.
17 Angibaki natan si Jehova na sakey a baleg a sira a mangakmon ed si Jonas, kanian taloy agew tan taloy labi a walad eges na sira si Jonas.+
Paimanod leksab
^ Kabaliksan toy “Malapati.”
^ Odino “dadayewen.”
^ Odino “ginawa na saramay lalaki so anggaay nayarian da.”
^ Odino “lapud kamarerwa na sayan too!”
