Josue 1:1-18
1 Kayari na impatey nen Moises a lingkor nen Jehova, oniay inkuan nen Jehova ed si Josue*+ ya anak nen Nun, say lingkor+ nen Moises:
2 “Inatey lay Moises a lingkor ko.+ La ka natan, baliw kad Jordan, sika tan sarayan amin a totoo, tan la kayo ed dalin ya iter kod saray totoo na Israel.+
3 Iter kod sikayo so amin a pasen a gatinan yo, unong ya insipan kod si Moises.+
4 Say dalin a magmaliw a sakop yo et manlapud kalawakan ya anggad Lebanon tan anggad baleg ya ilog, say Eufrates—say interon dalin na saray Heteo+—tan anggad Baleg a Dayat* ed sagur.*+
5 Anggapoy makatalo ed sika legay bilay mo.+ Wala ak ed sika+ no panon a wala ak ed si Moises nensaman. Agta ka taynanan odino paulyanan.+
6 Manpakpel tan manpabiskeg ka,+ ta sika so mangiwanwan ed sarayan totoo pian tawiren da so dalin ya iter kod sikara, unong ya insipan ko ed saray inmuunan atateng da.+
7 “Manpakpel tan manpabiskeg ka labat a maong tan maalwar mon gawaen so amin a Ganggan ya inter ed sika nen Moises a lingkor ko. Agka onaarawi ed satan, agka manpapakawanan odino manpapakawigi,+ pian nayarian moy onkiwas a walaay karunongan diad inerman a laen mo.+
8 Sayan libro na Ganggan et agnepeg ya onarawi ed sangim,+ tan nepeg mon basaen a makalna* ed agew tan labi, pian maalwar mon nagawaan so amin a nisulat ed saya;+ diad ontan et ontalona ka ed dalan mo, tan onkiwas kan walaay karunongan.+
9 Agko ta ingganggan ed sika, ‘Manpakpel tan manpabiskeg ka’? Kanian agka ontatakot odino onkekebbiew, ta walad sika si Jehova a Dios mo ed inerman a laen mo.”+
10 Insan oniay ingganggan nen Josue ed saray opisyal na saray totoo:
11 “Liber yoy kampo tan ibaga yo ed saray totoo, ‘Mangiparaan kayoy abasto yo, ta taloy agew manlapud natan et baliwen yo so Jordan pian looban tan kayarianen yo so dalin ya iter ed sikayo nen Jehova a Dios yo.’”+
12 Tan oniay inkuan nen Josue ed saray Rubenita, Gadita, tan ed kapalduan tribu nen Manases:
13 “Nonot yo so ingganggan ed sikayo nen Moises a lingkor nen Jehova:+ ‘Iter ed sikayo nen Jehova a Dios yo so painawa tan inter to lad sikayo iyan dalin.
14 Saray kaasawaan yo, ananak yo, tan ayayep yo et manayam ed dalin ya inter ed sikayo nen Moises diad sayan pagpag* na Jordan,+ balet amin yon mabibiskeg a sundalo+ et nepeg ya ombaliw ya akaparaan parad guerra diad unaan na saray agagi yo.+ Tulongan yo ra
15 anggad niiter la nen Jehova ed saray agagi yo so painawa, a singa inter tod sikayo, tan kayarianen da met so dalin ya iter ed sikara nen Jehova a Dios yo. Insan ompawil kayo la ed dalin a niiter a panayaman yo tan kayarianen yo itan, say dalin ya inter ed sikayo nen Moises a lingkor nen Jehova diad bukig a pagpag na Jordan.’”+
16 Oniay ebat da ed si Josue: “Gawaen mi so amin ya ingganggan mo, tan onla kami ed inerman a pangibakian mod sikami.+
17 No panon a dinengel mi so amin ya imbaga nen Moises, dengelen mi ka met. Komon ta walad sika si Jehova a Dios mo no panon a sikatoy walad si Moises nensaman.+
18 Siopaman a manrebelde ed ibagam tan agmangunor ed amin ya iganggan mod sikato et nepeg a pateyen.+ Basta manpakpel tan manpabiskeg ka.”+
Paimanod leksab
^ Odino “Jehosue,” a kabaliksan toy “Si Jehova so Kilalaban.”
^ Salanti, say Mediteraneo.
^ Odino “ed seselekan na agew.”
^ Odino “dalepdepen.”
^ Salanti, diad bukig a pagpag.
