Josue 13:1-33
13 Natan et masiken lan maong si Josue.+ Kanian inkuan nen Jehova ed sikato: “Masiken ka la tan andukey lay impanbilay mo; balet maawang ni so dalin a kaukolan a kayarianen.*
2 Saya so dalin a nakekeraan:+ amin a rehyon na saray Filisteo tan saray Gesurita+
3 (manlapud sanga na Nilo* a walad bukig na* Ehipto ya anggad ketegan na Ekron ed bandad amianen, a datin ipapasen a teritorya na saray Canaanita)+ pati say teritorya na limaran manuley na saray Filisteo+—saray Gazita, Asdodita,+ Askelonita,+ Gitita,+ tan Ekronita;+ say teritorya na saray Avim+
4 diad bandad abalaten; say interon dalin na saray Canaanita; say Meara, a kayarian na saray taga Sidon,+ ya anggad Afec, a paarap ed ketegan na saray Amoreo;
5 say dalin na saray Gebalita+ tan say interon Lebanon ed bukig, manlapud Baal-gad ed leksab na Palandey Hermon ya anggad Lebo-hamat;*+
6 amin a manaayam ed mapalandey a rehyon, manlapud Lebanon+ ya anggad Misrefot-maim;+ tan amin a taga Sidon.+ Pataynanen ko rad arapan na saray Israelita.+ Basta apag mo itan ed Israel bilang sakey a tawir, unong ya ingganggan kod sika.+
7 Natan et nepeg mon apag-apagen iyan dalin bilang tawir na siameran tribu tan say kapalduan tribu nen Manases.”+
8 Samay kapalduan tribu, pati saray Rubenita tan saray Gadita et inala da lay tawir da diad bukig a pagpag na Jordan, ya inter ed sikara nen Moises a lingkor nen Jehova:+
9 manlapud Aroer,+ a walad gilig na Lawak na Arnon,*+ tan say syudad a walad pegley na lawak, tan say interon atagey a patar na Medeba ya anggad Dibon;
10 tan say amin a syudad nen Arin Sihon na saray Amoreo, a nanuley ed Hesbon, ya anggad ketegan na saray Ammonita;+
11 pati say Gilead tan say teritorya na saray Gesurita tan saray Maacatita+ tan say interon Palandey Hermon tan interon Basan+ ya anggad Saleca;+
12 say interon panarian nen Og diad Basan, a nanuley ed Astarot tan Edrei. (Sikatoy sakey ed saray akeran Refaim.)+ Tinalo ira nen Moises tan pinataynan to ra.+
13 Balet agpinataynan na saray Israelita+ iray Gesurita tan Maacatita, ta manaayam ed limog na Israel iray totoo na Gesur tan Maacat anggad sayan agew.
14 Say tribu labat na saray Levita so agto inikdan na tawir.+ Say tawir da et saray apay a pinoolan a parad si Jehova a Dios na Israel,+ unong ya insipan tod sikara.+
15 Insan inter nen Moises so tawir na tribu na saray Rubenita unong ed saray pamilya ra,
16 tan say teritorya ra et manlapud Aroer, a walad gilig na Lawak na Arnon,* tan say syudad a walad pegley na lawak, tan say interon atagey a patar ed abay na Medeba;
17 say Hesbon tan amin a baley ditan+ a walad atagey a patar, say Dibon, Bamot-baal, Bet-baal-meon,+
18 Jahaz,+ Kedemot,+ Mefaat,+
19 Kiriataim, Sibma,+ tan Zaret-sahar diad palandey ed lawak,*
20 say Bet-peor, saray kelas na Pisga,+ Bet-jesimot,+
21 amin a syudad diad atagey a patar, tan say interon panarian nen Arin Sihon na saray Amoreo, a nanuley ed Hesbon.+ Sikatoy tinalo nen Moises,+ pati saray papangulo na Midianita, Evi, Rekem, Zur, Hur, tan Reba,+ saray uuleyan* nen Sihon a manaayam ed saman a dalin.
22 Si Balaam+ ya anak nen Beor, a managparles,+ so sakey ed saray pinatey na saray Israelita ed panamegley na espada a kaibad saramay apatey.
23 Say Jordan so ketegan na saray Rubenita; tan sayan dalin so tawir na saray Rubenita unong ed saray pamilya ra, pati saray syudad tan saray baryo ditan.
24 Inter met nen Moises so tawir na tribu nen Gad, saray Gadita unong ed saray pamilya ra,
25 tan say teritorya ra et say Jazer+ tan amin a syudad na Gilead tan kapaldua ed dalin na saray Ammonita+ ya anggad Aroer, ya akaarap ed Raba;+
26 tan manlapud Hesbon+ ya anggad Ramat-mizpe tan Betonim, tan manlapud Mahanaim+ ya anggad ketegan na Debir;
27 tan diad lawak* et say Bet-haram, Bet-nimra,+ Sucot,+ tan Zafon, say arum nin kabiangan na panarian nen Arin Sihon na Hesbon,+ say Jordan so ketegan manlapud bandad leksab a sampot na Dayat na Kineret*+ diad bukig a pagpag na Jordan.
28 Saya so tawir na saray Gadita unong ed saray pamilya ra, pati saray syudad tan saray baryo ditan.
29 Inter met nen Moises so tawir na kapalduan tribu nen Manases, tan akayarian da itan unong ed saray pamilya ra.+
30 Tan say teritorya ra et manlapud Mahanaim+ ya anggad interon Basan, say interon panarian nen Arin Og na Basan, tan amin a baryon kawalaan na saray tolda ed Jair+ diad Basan, 60 baley.
31 Tan say kapaldua na Gilead, tan say Astarot tan Edrei,+ saray syudad ed panarian nen Og ed Basan, so niiter ed saray ananak nen Makir+ ya anak nen Manases, salanti, ed kapaldua na saray ananak nen Makir unong ed saray pamilya ra.
32 Saraya so tawir ya inter nen Moises ed sikara, diad saray patar a desierto na Moab ed lampas na Jordan, diad bukig na Jerico.+
33 Balet ag-inikdan nen Moises na tawir so tribu na saray Levita.+ Si Jehova a Dios na Israel so tawir da, unong ya insipan tod sikara.+
Paimanod leksab
^ Odino “sakopen.”
^ Literal, ”walad arap na.”
^ Odino “manlapud Sihor.”
^ Odino “lolooban na Hamat.”
^ Odino “Kulos na Arnon.”
^ Odino “Kulos na Arnon.”
^ Odino “abeban patar.”
^ Salanti, saray arari ya uuleyan nen Sihon.
^ Salanti, say dayat na Genesaret, odino say Dayat na Galilea.
^ Odino “abeban patar.”
