Josue 14:1-15
14 Natan et saya so kinayarian na saray Israelita bilang tawir diad dalin na Canaan, ya inter nen Eleazar a saserdote tan si Josue ya anak nen Nun tan saray lider na saray pamilya na saray tribu na Israel bilang tawir da.+
2 Say tawir da et diad panamegley na pampapalaranan,+ unong ya ingganggan nen Jehova ed si Moises parad saray siamera tan kapalduan tribu.+
3 Inter la nen Moises so tawir na samay duara tan kapalduan tribu diad biek* na Jordan,+ tan agto inikdan iray Levita na tawir diad limog da.+
4 Nibilang a duaran tribu iray kailalakan nen Jose,+ salanti, Manases tan Efraim;+ tan agda inikdan iray Levita na apag a dalin, likud ed saray syudad+ a panayaman tan saray panagpastolan parad saray ayayep tan saray kayarian da.+
5 Kanian inapag na saray Israelita so dalin, unong ya ingganggan nen Jehova ed si Moises.
6 Insan inmasingger iray lalaki na Juda ed si Josue diad Gilgal,+ tan inkuan ed sikato nen Caleb+ ya anak nen Jefune a Kenizeo: “Amtam a mismo so imbaga nen Jehova+ ed si Moises a too na tuan Dios+ nipaakar ed siak tan sika diad Kades-barnea.+
7 Mantaon ak na 40 sanen imbaki ak nen Moises a lingkor nen Jehova manlapud Kades-barnea pian man-espiya ed sayan dalin,+ tan pinmawil ak a walaan na matuan balita.*+
8 Anggaman saray agagik a kaibak a tinmatdang et pinakapuy day linawa na saray totoo,* interon puso* a tinumbok koy Jehova a Dios ko.+
9 Oniay insipan nen Moises ed saman ya agew: ‘Say dalin a nanakaray salim so magmaliw ya agmanganggan tawir mo tan saray ananak mo, ta tinumbok moy Jehova a Dios ko ed interon pusom.’+
10 Natan, unong ya insipan nen Jehova+ et impansiansia to ak a mabilay+ diad sarayan 45 taon manlapud samay impangisipan nen Jehova ed si Moises, tan agawa iya sanen nanakar ed kalawakan+ so Israel; wadia ak ni anggad natan, tan 85 lay taon ko.
11 Tan siansia nin mabiskeg ak natan a singa ed samay agew ya imbaki ak nen Moises. No antoy biskeg ko nensaman, ontan ni so biskeg ko natan, balanglan parad guerra odino arum nin kimey.
12 Kanian iter mod siak iyan mapalandey a rehyon ya insipan nen Jehova ed saman ya agew. Anggaman nadngel mo ed saman ya agew a wala ray Anakim+ diman tan angkakabaleg iran apadiran a syudad,+ segurado* a walad siak si Jehova,+ tan pataynanen ko ra, unong ya insipan nen Jehova.”+
13 Kanian benendisyonan nen Josue si Caleb ya anak nen Jefune tan inter tod sikato so Hebron bilang tawir.+
14 Kanian say Hebron et kayarian nen Caleb ya anak nen Jefune a Kenizeo bilang tawir to ya anggad sayan agew, lapud interon puso ton tinumbok si Jehova a Dios na Israel.+
15 Say Hebron et tatawagen a Kiriat-arba+ nensaman (si Arba so sankabiskegan a too ed saray Anakim nensaman). Tan tinmunda lay guerra ed dalin.+
Paimanod leksab
^ Salanti, diad bukig a pagpag.
^ Literal, “walaan na salita a singa kaibay pusok.”
^ Literal, “tinunaw da so puso na saray totoo.”
^ Literal, “sigpot; nagnap.”
^ Odino “mapatnag.”
