Josue 15:1-63
15 Say dalin a nipabtang*+ ed tribu nen Juda unong ed saray pamilya ra et sinmabi anggad ketegan na Edom,+ say kalawakan na Zin, ya anggad abalaten a sampot na Negeb.
2 Say ketegan dad abalaten et manlapud sampot na Dayat na Asin,*+ manlapud baybay ya akaarap ed abalaten.
3 Tan sinmabi itan ed abalaten ya anggad patatdang na Akrabim,+ ondalan ed Zin, insan mamaatagey manlapud abalaten ya anggad Kades-barnea,+ ondalan ed Hezron, mamaatagey ya anggad Adar, tan onliber ed Karka.
4 Insan ondalan itan ed Azmon+ ya anggad Kulos* na Ehipto,+ tan say anggaay ketegan et diad Dayat.* Saya so ketegan da diad abalaten.
5 Say ketegan ed bukig et say Dayat na Asin* ya anggad sampot na Jordan, tan say ketegan ed amianen a suyok et diad gilig na dayat, diad sampot na Jordan.+
6 Say ketegan et mamaatagey ed Bet-hogla+ tan ondalan ed amianen na Bet-araba,+ tan mamaatagey itan ya anggad bato nen Bohan+ ya anak nen Ruben.
7 Say ketegan et mamaatagey ed Debir diad Lawak* na Acor+ tan mamaarap ed amianen diad Gilgal,+ a walad arap na patatdang na Adumim, salanti, diad abalaten na kulos, tan say ketegan et ondalan diad danum na En-semes+ tan mangangga ed En-rogel.+
8 Say ketegan et mamaatagey ed Lawak na Anak nen Hinom+ ya anggad gilig na syudad na saray Jebuseo+ diad abalaten, salanti, Jerusalem,+ tan say ketegan et mamaatagey ya anggad toktok na palandey ya akaarap ed Lawak nen Hinom diad sagur, a walad sampot na Lawak* na Refaim diad amianen.
9 Tan say ketegan et manlapud toktok na palandey ya anggad subol na danum na Neftoa+ tan onsabi ed saray syudad na Palandey Efron; tan say ketegan et anggad Baala, salanti, Kiriat-jearim.+
10 Manlapud Baala, say ketegan et onliber ed sagur ya anggad Palandey Seir tan ondalan ed gilig na Palandey Jearim diad amianen, salanti, Kesalon, tan mamaleksab itan anggad Bet-semes+ tan ondalan ed Timna.+
11 Tan say ketegan et anggad gilig na Ekron+ ed bandad amianen, tan onsabi itan anggad Sikeron tan ondalan ed Palandey Baala tan onsabi ed Jabneel, tan say anggaay ketegan et diad dayat.
12 Say ketegan ed sagur et say baybay na Baleg a Dayat.*+ Saya so ketegan ed paliber na dalin na saray kailalakan nen Juda unong ed saray pamilya ra.
13 Tan inter to so apag nen Caleb+ ya anak nen Jefune diad limog na saray kailalakan nen Juda unong ed ganggan nen Jehova ed si Josue, salanti, say Kiriat-arba (si Arba so ama nen Anak), salanti, say Hebron.+
14 Kanian pinataynan ditan nen Caleb so taloran ananak nen Anak:+ si Sesai, Ahiman, tan Talmai,+ saray kailalakan nen Anak.
15 Insan manlapud man et nilusob to iray manaayam ed Debir.+ (Say Debir et tatawagen nensaman a Kiriat-sefer.)
16 Insan oniay inkuan nen Caleb: “Say lakin onlusob tan makasakop ed Kiriat-sefer, iter kod sikato si Acsa a marikit ko bilang asawa to.”
17 Tan sinakop itan nen Otniel+ ya anak nen Kenaz,+ say agi nen Caleb. Kanian inter nen Caleb ed sikato si Acsa+ a marikit to bilang asawa to.
18 Sanen pasempet lay Acsa, dinagdag toy asawa to ya onkerew na uma ed si ama to. Insan inmepas si Acsa ed asno to.* Kanian sikatoy tinepetan nen Caleb: “Antoy labay mo?”+
19 Inkuan to: “Ipangasim, ikdan mo ak na bendisyon, ta amaga imay dalin ya inter mod siak diad abalaten;* kanian iter mo met ed siak so Gulot-maim.”* Kanian inter tod sikato so Bandad Tagey a Gulot tan Bandad Leksab a Gulot.
20 Saya so tawir na tribu nen Juda unong ed saray pamilya ra.
21 Saraya so syudad a walad sampot na teritorya na tribu nen Juda diad ketegan na Edom+ ed abalaten: Kabzeel, Eder, Jagur,
22 Kina, Dimona, Adada,
23 Kedes, Hazor, Itnan,
24 Zif, Telem, Bealot,
25 Hazor-hadata, tan Keriot-hezron, salanti, say Hazor,
26 Amam, Sema, Molada,+
27 Hazar-gada, Hesmon, Bet-pelet,+
28 Hazar-sual, Beer-sheba,+ Biziotias,
29 Baala, Iim, Ezem,
30 Eltolad, Kesil, Horma,+
31 Ziklag,+ Madmana, Sansana,
32 Lebaot, Silhim, Ain tan Rimon+—ami-amin et 29 a syudad, pati saray baryo ditan.
33 Saraya so syudad ed Sefela:+ Estaol, Zora+ tan Asna,
34 Zanoa, En-ganim, Tapua, Enam,
35 Jarmut, Adulam,+ Soco, Azeca,+
36 Saaraim,+ Aditaim, tan Gedera tan Gederotaim*—14 a syudad tan saray baryo ditan.
37 Say Zenan, Hadasa, Migdal-gad,
38 Dilean, Mizpa, Jokteel,
39 Lakis,+ Bozkat, Eglon,
40 Cabon, Lamam, Kitlis,
41 Gederot, Bet-dagon, Naama, tan Makeda+—16 a syudad tan saray baryo ditan.
42 Say Libna,+ Eter, Asan,+
43 Ifta, Asna, Nezib,
44 Keila, Aczib, tan Maresa—siameran syudad tan saray baryo ditan.
45 Say Ekron tan saray angkekelag* a baley tan saray baryo na satan;
46 manlapud Ekron ed bandad bukig, amin a walad abay na Asdod tan saray baryo ditan.
47 Say Asdod,+ saray angkekelag* a baley tan saray baryo na satan; say Gaza,+ saray angkekelag a baley tan saray baryo na satan, ya anggad Kulos na Ehipto, say Baleg a Dayat,* tan saray pasen ed gilig na dayat.+
48 Tan saray syudad ed mapalandey a rehyon et say Samir, Jatir,+ Soco,
49 Dana, Kiriat-sana, salanti, say Debir,
50 Anab, Estemo,+ Anim,
51 Gosen,+ Holon, tan Gilo+—11 a syudad tan saray baryo ditan.
52 Say Arab, Duma, Esan,
53 Janim, Bet-tapua, Afeca,
54 Humta, Kiriat-arba, salanti, say Hebron,+ tan Sior—siameran syudad tan saray baryo ditan.
55 Say Maon,+ Carmel, Zif,+ Juta,
56 Jezreel, Jokdeam, Zanoa,
57 Kain, Gibea, tan Timna+—samploran syudad tan saray baryo ditan.
58 Say Halhul, Bet-zur, Gedor,
59 Maarat, Bet-anot, tan Eltekon—anemiran syudad tan saray baryo ditan.
60 Say Kiriat-baal, salanti, say Kiriat-jearim,+ tan Raba—duaran syudad tan saray baryo ditan.
61 Saray syudad ed kalawakan et say Bet-araba,+ Midin, Secaca,
62 Nibsan, say Syudad na Asin, tan En-gedi+—anemiran syudad tan saray baryo ditan.
63 Nipaakar ed saray Jebuseo+ a manaayam ed Jerusalem,+ ag-ira apataynan na saray lalaki ed Juda,+ kanian nantultuloy a nanayam ed Jerusalem iray Jebuseo a kaiba iray totoo na Juda ya anggad sayan agew.
Paimanod leksab
^ Odino “niiter ed panamegley na pampapalaranan.”
^ Salanti, say Inatey a Dayat.
^ Salanti, say Baleg a Dayat, say Mediteraneo.
^ Salanti, say Inatey a Dayat.
^ Odino “Abeban Patar.”
^ Odino “Abeban Patar.”
^ Salanti, say Mediteraneo.
^ Odino posiblin, “sikatoy tinmipak legan ya akalugan ed asno.”
^ Odino “Negeb.”
^ Kabaliksan toy “Saray Palanggana (Saray Yaong) na Danum.”
^ Odino posiblin, “Gedera tan saray pukokan na karnero ditan.”
^ Odino “walad kaliberliber.”
^ Odino “walad kaliberliber.”
^ Salanti, say Mediteraneo.