Josue 18:1-28
18 Insan nantitipon ed Silo+ so amin ya Israelita, tan impaalagey da diman so tolda a pantitiponan,+ ta say dalin et asakop da la natan.+
2 Balet wala ni pitoran tribu na saray Israelita ya agni naikdan na tawir.
3 Kanian inkuan nen Josue ed saray Israelita: “Anggad kapigan so pampaleen yon onla pian kayarianen so dalin ya inter ed sikayo nen Jehova a Dios na saray inmuunan atateng yo?+
4 Mangiyakar kayod siak na taloran lalaki ed kada tribu pian ibakik ya onliber ed dalin tan igawaan day mapa unong ed tawir da. Insan ira ompawil ed siak.
5 Nepeg dan apagen itan ed pitoran parte.+ Mansiansia so Juda ed teritorya to diad abalaten,+ tan mansiansia so sankaabungan nen Jose ed teritorya ra diad amianen.+
6 Igawaan yoy mapa so dalin tan apagen yod pitoran parte, insan yo dia iyakar ed siak, tan manggawa ak na pampapalaranan+ parad sikayo ed arapan nen Jehova a Dios tayo.
7 Balet saray Levita ed limog yo+ et ag-ikdan na apag, lapud say tawir da et say panlingkor da bilang saserdote nen Jehova;+ tan inala la na Gad, Ruben, tan kapaldua na tribu nen Manases+ so tawir da diad bukig a pagpag na Jordan, ya inter ed sikara nen Moises a lingkor nen Jehova.”
8 Namparaan a linma iramay lalaki, tan oniay ingganggan nen Josue ed sarayan manggaway mapa na dalin: “La kayo tan liber yo so dalin tan igawaan yo na mapa insan kayo ompawil ed siak, tan manggawa ak dia na pampapalaranan parad sikayo ed arapan nen Jehova diad Silo.”+
9 Diad saman et linma iramay lalaki tan niliber da so dalin tan inggawaan da na mapa tan inapag da ed pitoran parte unong ed saray syudad, ya insulat da itan ed sakey a libro. Kayari na satan et pinmawil ira ed si Josue diad kampo ed Silo.
10 Nanggaway pampapalaranan si Josue parad sikara ed arapan nen Jehova diad Silo.+ Inapag ditan nen Josue so dalin ed saray Israelita unong ed saray betang da.+
11 Niiter so unonan apag ed tribu nen Benjamin unong ed saray pamilya ra, tan say teritorya na apag da et diad baetan na saray totoo na Juda+ tan totoo na Jose.+
12 Say ketegan da diad bandad amianen et onggapo ed Jordan, tan mamaatagey itan ed gilig na Jerico+ diad amianen tan mamaatagey ed palandey ed bandad sagur, tan onsabi anggad kalawakan na Bet-aven.+
13 Tan manlapu ditan, say ketegan et onsabi ed Luz, diad bandad abalaten a gilig na Luz, salanti, say Bethel;+ say ketegan et mamalasur ya anggad Atarot-adar+ diad palandey a walad abalaten na Abeban Bet-horon.+
14 Tan say ketegan et onsabi ed sagur a pagpag tan mamaarap ed abalaten manlapud palandey ya akaarap ed Bet-horon diad abalaten; mangangga itan ed Kiriat-baal, salanti, say Kiriat-jearim,+ sakey a syudad na Juda. Saya so ketegan ed sagur.
15 Say ketegan ed abalaten a pagpag et manlapud sampot na Kiriat-jearim, tan anggad sagur; onsabi itan ed kawalaay subol na danum na Neftoa.+
16 Say ketegan et mamalasur ya anggad sampot na palandey ya akaarap ed Lawak na Anak nen Hinom,+ a walad Lawak* na Refaim+ diad amianen, tan mamalasur ed Lawak nen Hinom, diad gilig na syudad na saray Jebuseo+ diad abalaten, tan mamalasur ed En-rogel.+
17 Tan onnatnat itan ed bandad amianen tan onsabi ed En-semes insan ompaway ed Gelilot, a walad petek na patatdang na Adumim,+ tan mamalasur ed bato+ nen Bohan+ ya anak nen Ruben.
18 Tan onsabi itan ed bandad amianen a gilig na palandey a walad petek na Araba tan mamalasur ed Araba.
19 Tan say ketegan et onsabi ed bandad amianen a gilig na Bet-hogla,+ tan mangangga ed bandad amianen a baybay na Dayat na Asin*+ diad abalaten a sampot na Jordan. Saya so ketegan ed abalaten.
20 Tan say Jordan so ketegan ed bukig. Saya so tawir na saray kailalakan nen Benjamin unong ed saray pamilya ra, unong ed saray ketegan ed paliber na satan.
21 Tan saraya so syudad na tribu nen Benjamin unong ed saray pamilya ra: Jerico, Bet-hogla, Emek-keziz,
22 Bet-araba,+ Zemaraim, Bethel,+
23 Avim, Para, Ofra,
24 Kefar-amoni, Ofni, tan Geba+—12 syudad tan saray baryo ditan.
25 Say Gibeon,+ Rama, Beerot,
26 Mizpa, Kefira, Moza,
27 Rekem, Irpeel, Tarala,
28 Zela,+ Ha-elef, say syudad na saray Jebuseo, salanti, Jerusalem,+ Gibea,+ tan Kiriat—14 a syudad tan saray baryo ditan.
Saya so tawir na saray kailalakan nen Benjamin unong ed saray pamilya ra.
