Josue 2:1-24
2 Insan masekreton angibaki si Josue ya anak nen Nun na duaran lalaki manlapud Sitim+ pian man-espiya. Inkuan tod sikara: “La kayo tan nengneng yoy dalin, nagkalalo lad Jerico.” Kanian linma ra tan sinmabi rad abung na sakey a paabang a bii a manngaray Rahab,+ tan nampundo ra diman.
2 Oniay nipasabi ed ari na Jerico: “Wala ray Israelitan lalaki a linma dia ed sayan labi pian man-espiya ed dalin tayo.”
3 Diad saman et impasabi na ari ed si Rahab iyan mensahe: “Ipaway mo ray lalakin manpupundo ed abung mo, ta linma ra dia pian man-espiya ed interon dalin.”
4 Balet inyamot na bii so duaran lalaki. Insan inkuan to: “On, linmad siak iraman a lalaki, balet agko amta no taga iner ira.
5 Tan sanen mansirunget la, sakbay a nikapot so puerta na syudad, pinmaway ira. Agko amta no iner so nila ra, balet no usilan yo ran tampol, naabotan yo ni ra.”
6 (Balet inyakar to la rad atep tan tinabonan to ra na saray abedber a tanaman a lino ya adasig ed atep.)
7 Kanian inusilan ira na saray lalaki diad dalan a mamaarap ed Jordan diad atapew a danum,+ tan inkapot da so puerta na syudad kapaway na saramay manguusil ed sikara.
8 Antis ya onugip iramay duaran espiya, nila to ra diad atep.
9 Inkuan to ed saray lalaki: “Amtak ya iter nen Jehova ed sikayo iyan dalin,+ kanian natatakot kamid sikayo.+ Tinmalaw so amin a manaayam ed sayan dalin lapud sikayo,+
10 ta nadngelan mi no panon a pinaekat nen Jehova iray danum na Ambalangan Dayat diad arapan yo sanen tinmaynan kayo ed Ehipto+ tan no antoy ginawa yo ed duaran arari na saray Amoreo, salanti, si Sihon+ tan si Og,+ a pinatey yo diad biek a pagpag* na Jordan.
11 Sanen nadngelan mi iya, kinmapuy so linawa mi,* tan naandi so pakpel* mi lapud sikayo, ta anengneng min si Jehova a Dios yo so Dios ed katawenan tan ed dalin.+
12 Ipangasi yo, mansamba kayo ed siak natan diad arapan nen Jehova, ya ipatnag yo met so matoor a panangaro ed sankaabungan nen amak, lapud impatnag kod sikayo so matoor a panangaro; tan ikdan yo ak na napanmatalkan a tanda.*
13 Agyo papateyen so amak tan inak, saray agagik a lalaki tan bibii, tan amin a walad sikara, tan iliktar yo kami* ed patey.”+
14 Diad saman et inkuan ed sikato na saray lalaki: “Iter mi so bilay mi parad sikayo!* No agyo ibaga so nipaakar ed getma mi, ipatnag mid sikayo so matoor a panangaro tan inkamatoor sano iter nen Jehova ed sikami iyan dalin.”
15 Kayari na saya et pinaepas to ra diad bintana ed panamegley na lubir, ta say abung to et walad padir na syudad.+
16 Insan inkuan tod sikara: “La kayod mapalandey a rehyon tan amot kayo diman a taloy agew, pian agkayo naromog na saramay manguusil ed sikayo. Insan, nayarian yo lay onalis no pinmawil la iramay manguusil.”
17 Insan inkuan ed sikato na lalaki: “Tooren mi labat iyan impaisambam ed sikami+
18 no diad iloob mid sayan dalin et isinger mod bintana iyan lubir a gawad ambalbalangan tinebey ya inusar mo pian makaleksab kami. Nepeg mon tiponen ed loob na abung so amam, inam, agagim, tan say interon sankaabungan nen amam.+
19 No walay ompaway ed abung mo, ebatan ton mismo* so dala to, tan agkami mankasalanan. Balet no narisgo so* siopaman a nansiansian kaibam ed abung, ebatan min mismo so dala to.
20 Balet no idalem mo so nipaakar ed getma mi,+ anggapoy eebatan mi ed samba ya impaisambam ed sikami.”
21 Oniay inyebat to: “Nagawa komon so unong ed imbaga yo.”
Diad saman et pinasipot to ra, tan amaarap la rad dalan da. Kayari na saman et insinger tod bintana so ambalbalangan lubir.
22 Kanian linma la rad mapalandey a rehyon tan nansiansia ra diman a taloy agew, anggad akapawil iramay manguusil. Diad amin a dalan et inanap ira na saramay manguusil, balet agda ra aromog.
23 Insan linmasur ed mapalandey a rehyon iramay duaran lalaki tan binmaliw ira ed ilog tan linma rad si Josue ya anak nen Nun. Imbaga rad sikato so amin ya agawa ed sikara.
24 Insan inkuan dad si Josue: “Inyawat la nen Jehova ed sikatayo so interon dalin.+ Diad tua, tinmalaw so liknaan na amin a manaayam ed saman a dalin lapud sikatayo.”+
Paimanod leksab
^ Salanti, diad bukig a pagpag.
^ Literal, “espiritu.”
^ Literal, “atunaw so puso mi.”
^ Odino “napandependian a tanda.”
^ Odino “so kamarerwa mi.”
^ Odino “Say kamarerwa mi so ompatey imbes a sikayo!”
^ Literal, “niiyan ed mismon ulo to.”
^ Odino “no walay liman ondapo ed.”
