Josue 22:1-34
22 Diad saman et tinawag nen Josue iray Rubenita, Gadita, tan say kapalduan tribu nen Manases
2 tan inkuan tod sikara: “Ginawa yoy amin ya ingganggan ed sikayo nen Moises a lingkor nen Jehova,+ tan tinulok yoy amin ya ingganggan kod sikayo.+
3 Anggad natan et agyon balot pinaulyanan iray agagi yo;+ tan sinumpal yoy obligasyon yo unong ed ganggan nen Jehova a Dios yo.+
4 Natan et inter la nen Jehova a Dios yo so painawa ed saray agagi yo, unong ya insipan tod sikara.+ Kanian nayarian yo lay ompawil ed saray tolda yo diad dalin yo ya inter nen Moises a lingkor nen Jehova diad biek a pagpag* na Jordan.+
5 Balet ta nepeg a maal-alwar yon sumpalen so bilin tan say Ganggan ya inter ed sikayo nen Moises a lingkor nen Jehova,+ diad pangaro yod si Jehova a Dios yo,+ panakar yod amin a dalan to,+ panumpal yod saray bilin to,+ pansiansia yod sikato,+ tan panlingkor yod sikato+ diad interon puso yo tan interon kamarerwa* yo.”+
6 Insan benendisyonan ira nen Josue tan pinasipot to ra, tan sinmempet la rad saray tolda ra.
7 Inter la nensaman nen Moises so tawir na kapalduan tribu nen Manases diad Basan,+ tan inter met nen Josue ed samay sakey nin kapaldua na tribu so dalin ed sagur a pagpag na Jordan,+ a singa saray agagi ra. Benendisyonan met ira nen Josue sanen pinasempet to la rad saray tolda ra
8 tan oniay inkuan tod sikara: “Pawil kayo lad saray tolda yo, ya awit yo ray dakerakel a kayamanan, dakerakel ya ayayep, pilak tan balitok, gansa tan balatyang, tan kawes ya agaylay karakel.+ Kaiba iray agagi yo, ala yoy apag yo ed samsam+ a manlapud kalaban yo.”
9 Kayari na satan et tinaynan la na saray Rubenita, Gadita, tan say kapalduan tribu nen Manases iray arum ya Israelita ed Silo diad dalin na Canaan, tan pinmawil ira ed dalin na Gilead,+ diad dalin a kayarianen da tan panayaman da unong ed ganggan nen Jehova diad panamegley nen Moises.+
10 Sanen sinmabi iray Rubenita, Gadita, tan say kapalduan tribu nen Manases diad saray rehyon na Jordan ed dalin na Canaan, nanggawa ra na balbaleg tan makapadinayew ya altar diad abay na Jordan.
11 Diad saginonor et nadngelan itan na saray arum ya Israelita+ tan inkuan da: “Nanggaway altar iray Rubenita, Gadita, tan say kapalduan tribu nen Manases diad ketegan na dalin na Canaan, ed saray rehyon na Jordan diad pagpag a kayarian na saray Israelita.”
12 Sanen nadngelan iya na saray Israelita, nantitipon ed Silo+ so amin ya Israelita pian miguerra ed sikara.
13 Diad saman et imbaki na saray Israelita si Finehas+ ya anak nen Eleazar a saserdote pian onla ed saray Rubenita, Gadita, tan say kapalduan tribu nen Manases diad dalin na Gilead,
14 tan kaiba toy samploran papangulo, sakey a pangulo ed kada pamilya na amin a tribu na Israel, kada sakey et lider na pamilya na ama to tan kabiangan ed saray nilibo* na Israel.+
15 Sanen sinmabi ra ed saray Rubenita, Gadita, tan say kapalduan tribu nen Manases diad dalin na Gilead, inkuan dad sikara:
16 “Oniay inkuan na amin a totoo nen Jehova: ‘Akin et agkayo nanmatoor+ ed Dios na Israel? Imbeneg yo natan si Jehova diad impanggawa yoy altar parad inkasikayo tan nanrebelde kayo ed si Jehova.+
17 Kasin agni magenap ed sikatayo imay kasalanan a ginawa tayod Peor? Anggaman asalot lad saman iray totoo nen Jehova, siansia nin aakoen tayoy epekto na saman a kasalanan.+
18 Tan natan et ontunda kayo lan ontumbok ed si Jehova! No manrebelde kayo natan ed si Jehova, sikatoy onsanok nabuas ed amin a totoo na Israel.+
19 No agmalinis so dalin a kayarian yo, ombaliw kayo a mamaarap ed dalin a kayarian nen Jehova+ a diman so kawalaan na tabernakulo nen Jehova+ tan manayam kayod limog mi, balet agkayo manrerebelde ed si Jehova, tan agyo kami pagmamaliwen a rebelde nisengeg ed impanggawa yoy altar pian iyarum yo ed altar nen Jehova a Dios tayo.+
20 Sanen si Acan+ ya anak nen Zera et agnanmatoor lapud samay nigana ed kadederal, agta alanor so amin a totoo na Israel ed sanok na Dios?+ Tan aliwan sikato labat so too ya inatey lapud kasalanan to.’”+
21 Diad saman et inmebat iray Rubenita, Gadita, tan say kapalduan tribu nen Manases ed saray ulo na saray nilibo* na Israel:+
22 “Si Jehova a Dios na saray dirios!* Si Jehova a Dios na saray dirios!+ Sikato so makaamta, tan naamtaan met na Israel. No rebelyoso tan agkami matoor ed si Jehova, agmo kami ililiktar ed sayan agew.
23 No talagan nanggawa kami na altar mi pian ontunda kami lan ontumbok ed si Jehova tan mangiyapay kami ditan na saray apay a popoolan, apay a kakanen, tan bagat a pandurungoan, si Jehova a mismo so manusa ed sikami.+
24 Andi, ginawa mi iya lapud walay sananey a pampapagaan mi, ta inkuan min, ‘Diad arapen et ompan oniay ibaga na saray ananak yo ed saray ananak mi: “Antoy pibabali yo ed si Jehova a Dios na Israel?
25 Inyan nen Jehova so Jordan bilang ketegan ed baetan mi tan sikayo ran Rubenita tan Gadita. Anggapoy pibibiang yo ed si Jehova.” Tan sebelan na saray ananak yo iray ananak mi a mandayew* ed si Jehova.’
26 “Kanian inkuan mi, ‘Manggawa tayoy sakey ya altar, aliwan parad saray apay a popoolan odino bagat,
27 noagta onkanan tasi ed baetan mi tan sikayo+ tan ed saray kapolian* ya ontumbok ed sikatayo pian makapanlingkor kami ed si Jehova tekep na saray apay min popoolan tan saray bagat mi, tan saray bagat min pandurungoan,+ pian diad arapen et ag-ibaga na saray ananak yo ed saray ananak mi: “Anggapoy pibibiang yo ed si Jehova.”’
28 Kanian inkuan mi, ‘No bilang ta diad arapen et ontan so ibaga rad sikami tan ed saray kapolian* mi, oniay ibaga mi: “Nengneng yoy ginawa na kaamaan mi ya altar a kaparpara na altar nen Jehova, ya aliwan parad saray apay a popoolan odino bagat, noagta onkanan tasi ed baetan mi tan sikayo.”’
29 Agmin balot nagawaan so manrebelde ed si Jehova tan ontunda lan ontumbok ed si Jehova+ diad panggawa mi na altar parad saray apay a popoolan, apay a kakanen, tan bagat, nilikud ed samay altar nen Jehova a Dios tayo a walad arapan na tabernakulo to!”+
30 Sanen nadngel nen Finehas a saserdote tan saray kaiba ton papangulo na totoo tan saray ulo na saray nilibo* na Israel iray salita na saray kailalakan nen Ruben, Gad, tan Manases, aliketan ira.+
31 Kanian oniay inkuan nen Finehas ya anak nen Eleazar a saserdote ed saray kailalakan nen Ruben, Gad, tan Manases: “Natan et amta min walad pegley tayo si Jehova, ta agkayo nanrebelde ed si Jehova. Inliktar yo natan iray Israelita manlapud lima nen Jehova.”
32 Insan tinaynan la nen Finehas ya anak nen Eleazar a saserdote tan saray papangulo iray Rubenita tan Gadita diad dalin na Gilead pian onla ed dalin na Canaan, tan impaamta rad arum ya Israelita so agawa.
33 Tan aliketan iray Israelita ed imbalita ra. Diad saman et indayew na saray Israelita so Dios, tan agda la nantongtongan so piguerra ed saray Rubenita tan Gadita pian deralen so dalin a panaayaman da.
34 Kanian nginaranan na saray Rubenita tan Gadita imay altar,* ta “sakey itan a tasi ed baetan tayo a si Jehova so tuan Dios.”
Paimanod leksab
^ Salanti, diad bukig a pagpag.
^ Odino “saray boleg.”
^ Odino “saray boleg.”
^ Odino “Say Makapanyari a Dios, si Jehova.”
^ Literal, “ontakot.”
^ Literal, “saray henerasyon.”
^ Literal, “saray henerasyon.”
^ Odino “saray boleg.”
^ Unong ed nibagan eksplinasyon, say altar et nayarin inngaran a Tasi.
