Josue 4:1-24
-
Saray bato ya onkanan pakanodnonotan (1-24)
4 Sanen akabaliw lad Jordan so interon nasyon, oniay inkuan nen Jehova ed si Josue:
2 “Tawag mo iramay 12 lalaki manlapud saray totoo, sakey ed kada tribu,+
3 tan oniay iganggan mod sikara: ‘Mangala kayoy 12 bato diad pegley na Jordan, diad samay pasen a nanalageyan na saray saserdote,+ tan awit yo iratan tan igaton yo diad pasen a pansanlabian yo.’”+
4 Kanian tinawag nen Josue iramay 12 lalakin tinuro to manlapud saray Israelita, sakey ed kada tribu,
5 tan inkuan nen Josue ed sikara: “La kayod pegley na Jordan diad unaan na Kaban nen Jehova a Dios yo, tan manakbat na sakey a bato so kada sakey ed sikayo, unong ed bilang na saray tribu na saray Israelita,
6 pian onkana iyan tanda parad sikayo. No bilang ta diad arapen et tepetan kayo na saray ananak* yo, ‘Akin et inyan yo dia irayan bato?’+
7 oniay ibaga yod sikara: ‘Lapud tinmundan inmagus iray danum na Jordan diad arap na kaban+ na sipanan nen Jehova. Sanen imbaliw itan ed Jordan, tinmundan inmagus iray danum na Jordan. Sarayan bato et onkanan andi-anggaan a pakanodnonotan na* saray totoo na Israel.’”+
8 Kanian ginawa na saray Israelita iyan ingganggan nen Josue. Angala ray 12 bato diad pegley na Jordan, unong ya imbaga nen Jehova ed si Josue, a mipetekan ed bilang na saray tribu na saray Israelita. Inawit da iratan ed pasen a nansanlabian da tan inggaton da iratan diman.
9 Angiyan met si Josue na 12 bato ed pegley na Jordan diad samay pasen a nanalageyan na saray saserdote a nansakbat ed kaban na sipanan,+ tan wadman ni iratan a bato anggad sayan agew.
10 Nanalagey ed pegley na Jordan iray saserdoten nansakbat ed Kaban anggad asumpal so amin ya ingganggan nen Jehova ed si Josue a papagawa tod saray totoo, unong ed amin ya ingganggan nen Moises ed si Josue. Diad saman et nanapuran binmaliw iray totoo.
11 Sanen akabaliw la ran amin, binmaliw iray saserdote a sankasakbat da so Kaban nen Jehova, diad pakanengneng na saray totoo.+
12 Tan saray Rubenita, Gadita, tan say kapalduan tribu nen Manases et binmaliw ya akaparaan parad guerra+ diad unaan na saray arum ya Israelita, unong ya imbaga nen Moises ed sikara.+
13 Manga 40,000 sundalo ya akaparaan a miguerra so binmaliw ed arapan nen Jehova a paarap ed saray patar a desierto na Jerico.
14 Diad saman ya agew et intandoro nen Jehova si Josue ed pakanengneng na interon Israel,+ tan sikatoy nirespeto ran maong* diad amin ya agew na bilay to, a singa impanrespeto ran maong ed si Moises.+
15 Insan inkuan nen Jehova ed si Josue:
16 “Iganggan mo ray saserdoten manasakbat ed kaban+ na Testimonya ya onsakbit la rad Jordan.”
17 Kanian ingganggan nen Josue iray saserdote, ya inkuan to: “Sakbit ki lad Jordan.”
18 Sanen akasakbit la ray saserdote a manasakbat ed kaban+ na sipanan nen Jehova manlapud pegley na Jordan tan akagatin la rad amagan dalin, inmagus lamet iray danum na Jordan tan linmeppua iratan ed saray tambib+ a singa dati.
19 Sinmakbit iray totoo manlapud Jordan diad komasamplon agew na unonan bulan tan nankampo ra ed Gilgal+ diad bandad bukig a ketegan na Jerico.
20 Nipaakar ed saramay 12 bato ya inala ra ed Jordan, impasen iratan nen Josue diad Gilgal.+
21 Insan inkuan to ed saray Israelita: “Sano diad arapen et tepetan kayo na saray ananak yo, ‘Antoy kabaliksan na sarayan bato?’+
22 oniay nepeg yon isalaysay ed saray ananak yo: ‘Binmaliw so Israel ed Jordan diad amagan dalin+
23 sanen pinaekat nen Jehova a Dios yo iray danum na Jordan ed arapan mi anggad akabaliw kami, a singa ginawa nen Jehova a Dios yo diad Ambalangan Dayat sanen pinaekat to itan ed arapan na totoo anggad akabaliw ira.+
24 Ginawa to iya pian naamtaan na amin a totoo ed dalin so inkabiskeg na lima nen Jehova,+ pian naynay yon takotan si Jehova a Dios yo.’”
