Josue 7:1-26
7 Balet agnanmatoor iray Israelita nipaakar ed saramay bengatlan nigana ed kadederal, ta si Acan+ ya anak nen Carmi, ya anak nen Zabdi, ya anak nen Zerah, ed tribu nen Juda et inala toy arum ed saramay bengatlan nigana ed kadederal.+ Kanian dinmalang so sanok nen Jehova ed saray Israelita.+
2 Insan angibaki si Josue na saray lalaki manlapud Jerico pian onlad Ai,+ ya asingger ed Bet-aven tan ed bandad bukig na Bethel,+ ya inkuan tod sikara: “Tatdang kayo tan man-espiya kayod satan a dalin.” Kanian linma ray lalaki tan nan-espiya ra ed Ai.
3 Sanen pinmawil irad si Josue, inkuan dad sikato: “Agla nakaukolan a patatdangen so amin a totoo. Magenap lay manga duan libo odino talon libon lalaki pian natalo so Ai. Dagdaiset ira kanian agmo la kekesawen so amin a totoo diad iyakar da diman.”
4 Kanian manga 3,000 lalaki so tinmatdang diman, balet imbatikan da lanlamang iray lalaki ed Ai.+
5 Walay 36 a lalaki ya apatey na saray lalaki ed Ai, tan inusilan da ra manlapud arap na puerta na syudad ya anggad Sebarim,* tan tinalo da ra diad dalan a palasur. Kanian say inkakpel* na saray totoo et singa danum ya atunaw tan inmagus.
6 Diad saman et pinilat nen Josue so kawes to tan dinmakmomo ed dalin diad arapan na Kaban nen Jehova ya anggad labi, sikato tan saray mamatatken na Israel, insan sinabuyagan day dabok iray ulo ra.
7 Inkuan nen Josue: “O Soberanon Katawan a Jehova, akin et imbaliw mo ni ed Jordan irayan totoo pian iyawat mo labat ed lima na saray Amoreo, ta pian naderal kami? Nansiansia kami la komon diad biek a pagpag* na Jordan!
8 Perdonam ak, O Jehova, anto ni ibagak natan ta say Israel et inmatras* ed arapan na saray kalaban to?
9 No narengelan iya na saray Canaanita tan amin a manaayam ed dalin, paliberan da kami tan paandien day ngaran mid dalin, tan antoy gawaen mo nipaakar ed bantog a ngaran mo?”+
10 Inmebat si Jehova ed si Josue: “Alagey ka! Akin et akasubsob so lupam?
11 Nankasalanan so Israel. Sinumlang day sipanan+ ya ingganggan kon sumpalen da. Inala ray arum ed saramay bengatlan nigana ed kadederal,+ a tinakew+ da iratan tan maamot dan inlaok ed saray dilin kayarian da.+
12 Kanian agnatalo na saray Israelita iray kalaban da. Onatras ira tan ibatikan da iray kalaban da, ta nagmaliw iran sakey a bengatlan nigana ed kadederal. Anggad agyo deralen imay nigana ed kadederal a walad pegley yo, agak la miulop ed sikayo.+
13 Alagey ka tan pasantos mo ray totoo!+ Ibagam ed sikara, ‘Pasantos yoy inkasikayo parad onsublay ya agew, ta oniay inkuan nen Jehova a Dios na Israel: “O Israel, walad limog yo imay nigana ed kadederal. Agyo natalo iray kalaban yo anggad agyo ekalen ed pegley yo so bengatlan nigana ed kadederal.
14 Diad kabuasan et mantitipon kayo, kada tribu, tan samay tribu a pilien nen Jehova+ et onasingger, kada pamilya, tan say pamilya a pilien nen Jehova et onasingger, kada sankaabungan, tan say sankaabungan a pilien nen Jehova et onasingger, kada laki.
15 Tan samay nasukayan a walad sikato so bengatlan nigana ed kadederal et nepeg a poolan,+ sikato tan amin a walad sikato, ta sinumlang to so sipanan+ nen Jehova tan nanggawa na mabanday a bengatla ed Israel.”’”
16 Kanian kabkabuasan a binmangon si Josue tan pinaasingger to so Israel, kada tribu, tan apili so tribu nen Juda.
17 Insan pinaasingger to ray pamilya nen Juda tan apili so pamilya na saray Zerahita,+ kayari na satan et pinaasingger to so pamilya na saray Zerahita, kada laki, tan apili si Zabdi.
18 Diad kaunoran et pinaasingger to so sankaabungan nen Zabdi, kada laki, tan apili+ si Acan ya anak nen Carmi, ya anak nen Zabdi, ya anak nen Zera, ed tribu nen Juda.
19 Insan inkuan nen Josue ed si Acan: “Ana’ko, ipangasim, igalang moy Jehova a Dios na Israel, tan ipatuam ed sikato. Ipangasim ya ibagad siak no antoy ginawam. Agmo iyaamot.”
20 Oniay inyebat nen Acan ed si Josue: “Diad tua et siak so walaay kasalanan ed si Jehova a Dios na Israel, tan oniay ginawak.
21 Sanen anengneng ko ed saray asamsam so sakey a marakdakep a kawes a nanlapud Sinar+ tan 200 a siklo* na pilak tan sakey bareta a balitok a manbelat na 50 siklo, pinilalek ko iratan kanian inalak. Akakotkot iratan ed loob na toldak tan say kuarta et walad dalem.”
22 Tampol ya angibaki si Josue na saray igaganggan, tan binmatik ira ed tolda, tan wadman ya akaamot ed tolda to so kawes, tan say kuarta et walad dalem na satan.
23 Kanian impaway da iratan ed tolda tan inyakar dad si Josue tan ed amin ya Israelita, tan inggaton da iratan ed arapan nen Jehova.
24 Insan inala nen Josue tan say interon Israel si Acan+ ya anak nen Zera, say pilak, say marakdakep a kawes, tan say bareta a balitok,+ pati saray ananak ton lalaki tan bibii, saray baka, asno, pulok to, tolda to, tan amin a kayarian to, tan inyakar da ra ed Lawak* na Acor.+
25 Insan inkuan nen Josue: “Akin et inyakar mod sikami so kadederal?*+ Iyakar nen Jehova ed sika natan so desyang.” Diad saman et sikatoy tinupak na interon Israel,+ insan da ra pinoolan.+ Kanian pinatey da ran amin ed panamegley na bato.
26 Tan sikatoy tinabonan day dakel a bato, a nansiansia anggad sayan agew. Diad saman et kinmepay sanok nen Jehova.+ Satan so rason ya inngaran itan a pasen a Lawak na Acor* anggad sayan agew.
Paimanod leksab
^ Kabaliksan toy “Saray Panagtebagan na Bato.”
^ Literal, “puso.”
^ Salanti, diad bukig a pagpag.
^ Odino “binmeneg.”
^ Say sakey a siklo et 11.4 gramo. Nengnengen so Apendise B14.
^ Odino “Abeban Patar.”
^ Odino “gulo; sumpa.”
^ Kabaliksan toy “Kadederal; Sumpa.”
