Josue 8:1-35
8 Insan oniay inkuan nen Jehova ed si Josue: “Agka natatakot odino nakekebbiew.+ Ipilam so amin a sundalo tan tatdang kad Ai. Nia, inyawat ko lad limam so ari na Ai, saray totoo to, say syudad to, tan say dalin to.+
2 Gawam ed Ai tan ed ari to so singa ginawam ed Jerico tan ed ari to,+ balet nayari yon alaen iray samsam tan saray ayayep ditan. Iparaan yoy pantambang yo diad beneg na syudad.”
3 Kanian linmad Ai si Josue tan saray amin a sundalo. Amili si Josue na 30,000 mabibiskeg a sundalo tan imbaki to ra diad labi.
4 Oniay ingganggan tod sikara: “Sikayo so mantambang diad beneg na syudad. Agkayo onaarawin maong ed syudad, tan manparaan kayon amin.
5 Siak tan say amin a kaibak so onasingger ed syudad, tan sano ompaway ira pian milaban ed sikami a singa nen inmuna,+ onatras kami.
6 Ompaway ira pian usilan da kami anggad napaarawi mi ra ed syudad, ta ibaga ran, ‘Ibabatikan da itayo a singa nen inmuna.’+ Tan onatras kami.
7 Insan ompaway kayo ed pantatambangan yo tan sakop yoy syudad; iyawat itan ed sikayo nen Jehova a Dios yo.
8 Sano asakop yo lay syudad, nepeg yon poolan itan.+ Gawa yo so unong ed salita nen Jehova. Saya so ganggan ko.”
9 Insan imbaki ira nen Josue, tan linma ra ed pasen a pantambangan da; pinmuesto ra ed baetan na Bethel tan Ai, diad bandad sagur na Ai, balet nansanlabi si Josue ed kawalaan na saray arum a sundalo.
10 Kabkabuasan a binmangon si Josue tan inorganisa to ray sundalo, insan sikato tan saray mamatatken na Israel so angidaulo ed sikara a paarap ed Ai.
11 Tinmatdang so amin a sundalon+ kaiba to tan inmabante rad arapan na syudad. Nankampo rad bandad amianen na Ai, a walad baetan da tan say Ai so lawak.
12 Kaleganan na satan et sikatoy angala na 5,000 lalaki tan impantambang to+ ra ed baetan na Bethel+ tan Ai, diad bandad sagur na syudad.
13 Kanian impasen na saray sundalo so manunan kampo diad bandad amianen na syudad,+ tan saray sundalon walad beneg et diad bandad sagur na syudad,+ insan diad saman a labi et linmay Josue ed pegley na lawak.*
14 Tan sanen anengneng itan na ari na Ai, sikato tan saray lalaki ed syudad et kabkabuasan a pinmaway pian miguerra ed Israel diad sakey a pasen a sankabantag so patar a desierto. Balet agto amta a walay manatambang ed sikato diad beneg na syudad.
15 Sanen inmataki iray lalaki na Ai, batik si Josue tan say interon Israel ed dalan a mamaarap ed kalawakan.+
16 Insan amin a totoon walad syudad et atawag ya onusil ed sikara; tan niyarawi rad syudad sanen inusilan day Josue.
17 Anggapoy atilak a laki diad Ai tan Bethel ya ag-inmusil ed Israel. Ataynanan dan akalukas so syudad ta inusilan da so Israel.
18 Inkuan natan nen Jehova ed si Josue: “Itagey mo so sankaegnaan mon jabelin tan ipaarap mod Ai,+ ta iyawat ko itan ed limam.”+ Kanian intagey nen Josue so sankaegnaan ton jabelin tan impaarap tod syudad.
19 Sanen intagey toy lima to, tampol a pinmaway ed pasen da iray manatambang, tan binmatik ira ed syudad tan sinakop da itan. Tampol dan pinoolan so syudad.+
20 Sanen linmingaw iray lalaki na Ai, anengneng dan onaatagey ed tawen so asewek ed syudad, tan agda la nayariay ombatik ed anggan iner. Insan pinuliktaran na saramay sundalon ombabatik ed kalawakan iramay manguusil ed sikara.
21 Sanen anengneng nen Josue tan say interon Israel a say syudad et asakop la na saramay manatambang tan onaatagey so asewek ditan, pinmuliktar ira tan pinapatey da ray lalaki na Ai.
22 Tan pinmaway iramay anakop ed syudad pian abeten ira, kanian ag-akaalis ed pegley iray lalaki na Ai, ta saray arum ya Israelita et walad sayan pagpag tan say arum et walad sananey a pagpag, tan pinapatey da ra ya anggad anggapoy akaliktar odino akatakas.+
23 Balet narel dan mabilay so ari na Ai+ tan inawit dad si Josue.
24 Kayarin pinatey na Israel so amin a manaayam ed Ai, diad kalawakan ya angusilan dad sikara, tan naupot la ran amin ed panamegley na espada, pinmawil ed Ai so interon Israel tan kinabil da itan ed panamegley na espada.
25 Amin iramay inatey ed saman ya agew, manlapud laki ya anggad bii, et manbilang na 12,000, amin a totoo ed Ai.
26 Ag-inyabeba nen Josue so lima ton angitagey ed jabelin+ ya anggad aderal+ ton amin so manaayam ed Ai.
27 Balet inala na Israel iray ayayep tan saray samsam ed satan a syudad, unong ed samay ingganggan nen Jehova ed si Josue.+
28 Insan pinoolan nen Josue so Ai tan ginawa ton permanentin bunton na geray,+ a nansiansian ontan anggad sayan agew.
29 Imbitay tod poste* so ari na Ai ya anggad onlalabi la, tan antis ya onselek so agew et ingganggan nen Josue ya iyepas day bangkay to manlapud poste.+ Insan imbantak da diad lolooban ed puerta na syudad tan tinabonan da na baleg a bunton na bato, a wadman ni anggad sayan agew.
30 Diad saman et nanggaway Josue na altar a parad si Jehova a Dios na Israel, diad Palandey Ebal,+
31 unong ya ingganggan nen Moises a lingkor nen Jehova ed saray Israelita tan singa nisulat ed libro na Ganggan+ nen Moises: “Sakey ya altar a gawad agtinabas iran bato ya ag-inusaran na balatyang a kagawaan.”+ Angiyapay ira ditan na saray apay a popoolan parad si Jehova tan saray bagat a pandurungoan.+
32 Insan insulat tod saray bato so sakey a kopya na Ganggan+ ya insulat nen Moises diad arapan na saray Israelita.+
33 Say interon Israel, saray mamatatken da, opisyal da, tan saray ukom da et akaalagey ed biek tan biek na Kaban, diad arapan na saray saserdoten Levita a manasakbat ed kaban na sipanan nen Jehova. Wadman iray dayo tan saray niyanak ya Israelita.+ Kapaldua ed sikara et akaalagey ed arap na Palandey Gerizim, tan say sakey a kapaldua et diad arap na Palandey Ebal+ (unong ya ingganggan la nen Moises a lingkor nen Jehova),+ pian mamendisyon ed saray totoo na Israel.
34 Kayari na satan et binasa ton maksil so amin a salita na Ganggan,+ saray bendisyon+ tan saray ayew,+ unong ed amin a nisulat ed libro na Ganggan.
35 Kada salita ed amin ya ingganggan nen Moises et maksil a binasa nen Josue diad arapan na interon kongregasyon na Israel,+ kaiba iray bibii tan ugugaw tan saray dayon+ manaayam* ed limog da.+