Josue 9:1-27
9 Sanen nadngelan iya na amin ya arari a walad sagur a pagpag na Jordan,+ saramay walad mapalandey a rehyon, diad Sefela, diad interon baybay na Baleg a Dayat,*+ tan diad arap na Lebanon—saray Heteo, Amoreo, Canaanita, Perizeo, Heveo, tan saray Jebuseo+—
2 nanmumuyong ira pian miguerra ed si Josue tan say Israel.+
3 Nadngelan met na saray manaayam ed Gibeon+ so ginawa nen Josue ed Jerico+ tan Ai.+
4 Kanian makabat iran kinmiwas tan inyan dad daan iran sako iray abasto ra tan inlugan dad saray asno ra, pati saray daan a katat a panagkargaay alak ya apilat tan dinait la;
5 nansulong met ira na saray daan tan sinakaban a sandalyas tan daan iran kawes. Amin a tinapay a binalon da et amagaan la tan mainomay a natemek.
6 Insan linma rad si Josue diad kampo ed Gilgal+ tan oniay inkuan dad sikato tan ed saray lalaki na Israel: “Nanlapu kami ed arawrawin dalin. Kanian ipangasi yo, misipanan kayod sikami.”
7 Balet oniay inkuan na saray lalaki na Israel ed saray Heveo:+ “Ompano asingsingger dia so panaayaman yo. Kanian akin et misipanan kami ed sikayo?”+
8 Inmebat ira ed si Josue: “Sikami ray lingkor* mo.”
Insan inkuan nen Josue ed sikara: “Siopa kayo, tan iner so nanlapuan yo?”
9 Diad saman et inkuan dad sikato: “Linma dia ray lingkor mo a nanlapu nid arawrawin dalin+ lapud ngaran nen Jehova a Dios mo, ta nadngelan mi so inkabantog to tan amin a ginawa tod Ehipto+
10 tan amin a ginawa tod saray duaran ari na saray Amoreo a walad biek* na Jordan, salanti, si Arin Sihon+ na Hesbon tan si Arin Og+ na Basan, a walad Astarot.
11 Kanian oniay inkuan ed sikami na saray mamatatken mi tan amin a manaayam ed dalin mi, ‘Mangawit kayoy abasto yo diad pambiahe yo tan la kayod sikara. Ibaga yod sikara: “Magmaliw kamin lingkor yo;+ kanian ipangasi yo, misipanan kayo ed sikami.”’+
12 Sayan binalon min tinapay et ampetang ni diad samay agew na insipot mid kaabungan mi pian onla dia ed sikayo. Balet sankanengneng yo natan ya amagaan la iya tan mainomay lan natemek.+
13 Tan sarayan katat a panagkargaan et balo ni sanen pinano mi na alak, balet natan et apilat la.+ Tan dinmaan la ray kawes tan sandalyas mi lapud andukey ya impanbiahe mi.”
14 Diad saman et inala* na lalaki iray arum ya abasto ra, balet ag-ira tinmupleg ed si Jehova.+
15 Kanian akikareenan si Josue ed sikara+ tan akisipanan ya abuloyan to ran manbilay, tan ontan so insamba ed sikara na saray papangulo na totoo.+
16 Diad pansampot na taloy agew, kayari na impisipanan dad sikara, nadngelan da ya asingger manaya ed sikara so panaayaman da.
17 Kanian diad komatlon agew et binmuat iray Israelita tan nila da rad saray syudad da, salanti, diad Gibeon,+ Kefira, Beerot, tan Kiriat-jearim.+
18 Balet ag-ira inataki na saray Israelita, ta nansamba ed sikara iray papangulo na totoo diad arapan nen Jehova+ a Dios na Israel. Kanian nanmeremere so amin a totoon nantitipon sumpad saray papangulo.
19 Diad saya et oniay inkuan na saray papangulo ed amin a totoon nantitipon: “Agtayo ra nayarin sakitan, ta nansamba kami ed sikara diad arapan nen Jehova a Dios na Israel.
20 Oniay gawaen tayo: Abuloyan tayo ran manbilay, pian ag-onsanok so Dios ed sikatayo lapud samay samba tayod sikara.”+
21 Tan inkuan ni na saray papangulo: “Abuloyan yo ran manbilay, balet pagmaliw yo ran managkiew tan manag-asol na danum parad amin a totoo.” Ontan so insipan ed sikara na saray papangulo.
22 Tinawag ira natan nen Josue tan inkuan tod sikara: “Akin et tinilaan yo kami, ya inkuan yon, ‘Nanlapu kami ed pasen ya arawrawi ed kawalaan yo,’ anta asingsingger manaya ed sikami so panaayaman yo?+
23 Manlapud natan et naayew kayo,+ tan magmaliw kayon ariripen tan mansiansia kayon ontan, bilang managkiew tan manag-asol na danum parad abung na Dios ko.”
24 Inmebat irad si Josue: “Ginawa mi iya+ lapud malinew a nikuan ed saray lingkor mo a si Jehova a Dios mo et ingganggan toy Moises a lingkor to pian iter ed sikayo so interon dalin tan upoten tod arapan yo so amin a manaayam ditan.+ Kanian tinmakot kamin maong ed sikayo lapud bilay* mi.+
25 Natan et wala kami ed pakayarim.* Gawam ed sikami no antoy iisipen mon maabig tan duga.”
26 Tan ontan so ginawa tod sikara; inliktar to rad lima na saray Israelita, tan agda ra pinatey.
27 Balet diad saman ya agew et impagmaliw ira nen Josue a managkiew tan manag-asol na danum parad totoo+ tan parad altar nen Jehova diad pasen a pilien To,+ tan nansiansia ran ontan anggad sayan agew.+
Paimanod leksab
^ Salanti, say Mediteraneo.
^ Odino “ariripen.”
^ Salanti, diad bukig a pagpag.
^ Odino “ninengneng.”
^ Odino “kamarerwa.”
^ Literal, “ed saray limam.”
