Unong ed si Juan 11:1-57
11 Natan et walay sakey a lakin mansasakit, a manngaray Lazaro a taga Betania, a ditan met so panaayaman na agagi ton si Maria tan Marta.+
2 Saya imay Maria ya angikalboy ambalingit a larak ed saray sali na Katawan tan pinunasan to iratan na buek to;+ agi to si Lazaro a mansasakit.
3 Kanian oniay mensahen impasabi na saray agagi ton bibii ed si Jesus: “Katawan, nengneng mo! mansasakit imay pinabpablim a kaaro.”
4 Balet sanen nadngel itan nen Jesus, inkuan to: “Sayan sakit et agmansumpal ed ipapatey, noagta ed kigloriaan na Dios,+ pian nigloria so Anak na Dios diad panamegley na satan.”
5 Inar-aro nen Jesus ira di Marta tan say yugtan ton bii tan si Lazaro.
6 Balet sanen nadngelan ton mansasakit si Lazaro, sikatoy nansiansia nin duay agew diman ed kawalaan to.
7 Kayari duay agew, inkuan tod saray disipulo: “Onla itayo lamet ed Judea.”
8 Imbagad sikato na saray disipulo: “Rabbi,+ agano ni may panupak lawari ed sika na saray taga Judea,+ insan onla ka lamet diman?”
9 Inmebat si Jesus: “Agta walay 12 oras no agew?+ No say sakey et manakar no agew, anggapoy antokaman a natalapos to, lapud nanenengneng toy liwawa a parad totoo.
10 Balet no say sakey et manakar no labi, walay natalapos to, lapud anggapo ed sikato so liwawa.”
11 Kayari ton imbaga iraya, inkuan to ni: “Say kaaro tayon si Lazaro et naugip,+ balet onla ak diman pian bangonen ko.”
12 Insan inkuan na saray disipulo ed sikato: “Katawan, no sikatoy naugip, sikatoy onabig sirin.”
13 Balet say imbaga nen Jesus et nipaakar ed impatey nen Lazaro. Ingen ta inisip dan say ibabaga to et panagpainawa ed ugip.
14 Kanian imbaga la nen Jesus ed sikara: “Inatey lay Lazaro,+
15 tan maliket ak ya anggapo ak diman nisengeg ed sikayo, pian manisia kayo. Balet onla itayo ed sikato.”
16 Kanian si Tomas, a tatawagen a say Lason, et inkuan tod saray kapara ton disipulo: “Onla itayo met, pian ompatey tayon kaiba to.”+
17 Sanen sinmabi si Jesus, apat agew lan walad lubok* si Lazaro.
18 Say Betania et asingger ed Jerusalem, manga duaran milya* so distansia.
19 Tan dakel ed saray Judio so linmad si Marta tan Maria pian ligliwaen da rad impatey na agi ra.
20 Sanen nadngel nen Marta a nitan lay Jesus, sikatoy inabet to; balet si Maria+ et akayurong labat ed abung.
21 Insan inkuan nen Marta ed si Jesus: “Katawan, no wadia ka labat, agkomon inatey so agik.
22 Balet anggan natan, amtak ya anggan antoy kerewen mod Dios et iter iratan ed sika na Dios.”
23 Inkuan nen Jesus ed sikato: “Say agim et onoli.”
24 Inkuan nen Marta ed sikato: “Amtak a sikatoy onoli+ diad kaunoran ya agew.”
25 Inkuan nen Jesus ed sikato: “Siak so kioli tan say bilay.+ Say mangipapanengneng na pananisia ed siak, anggano ompatey et ombilay lamet;
26 tan balang sakey a mabilay tan mangipapanengneng na pananisia ed siak et aglan balot ompatey.+ Manisia kad saya?”
27 Inkuan tod sikato: “On, Katawan, manisia ak a sika so Kristo ya Anak na Dios, samay onsabi ed mundo.”
28 Sanen nibaga to la iya, sikatoy tinmaynan tan tinawag toy Maria ya agi to, tan masekreto ton imbaga: “Wadia lay Managbangat+ tan patatawag to ka.”
29 Sanen nadngel iya nen Maria, sikatoy inmalagey a tampol tan linmad sikato.
30 Diad tua et agni akasabi ed baryo si Jesus, noagta wadman nid pasen ya angabetan nen Marta ed sikato.
31 Diad saman et wala ray pigaran Judio a kaiba nen Maria ed abung a manliligliwa ed sikato. Sanen anengneng dan sikatoy inmalagey a tampol tan pinmaway, tinmumbok ira, ta inisip dan sikatoy onlad lubok*+ pian onakis diman.
32 Sanen akasabi si Maria ed kawalaan nen Jesus tan sikatoy anengneng to, dinmakmomo ed salian to, tan inkuan to: “Katawan, no wadia ka labat, agkomon inatey so agik.”
33 Sanen anengneng nen Jesus a sikatoy onaakis pati saray Judio a tinmumbok ed sikato, naney-ey si Jesus ed puso* to tan agonigon.
34 Inkuan to: “Iner so angiponponan yod sikato?” Inkuan da: “Katawan, gala tan nengneng mo.”
35 Akaakis si Jesus.+
36 Kanian inkuan na saray Judio: “Nengneng yo, agaylay panangaro tod sikato!”
37 Balet inkuan na arum ed sikara: “No ayarian ton ilukas so mata na bulag a too,+ agta nayarian to met komon ya amperen so ipatey nen Lazaro?”
38 Kayarin naney-ey si Jesus ed puso to, sikatoy linmad lubok.* Diad tua et sakey itan ya ungib, tan asaraan na sakey a bato.
39 Inkuan nen Jesus: “Ekal yoy bato.” Inkuan ed sikato nen Marta, ya agi na inatey: “Katawan, ambanget la natan, ta apat agew lay apalabas.”
40 Inkuan nen Jesus ed sikato: “Agta imbagak ed sika a no manisia ka et nanengneng moy gloria na Dios?”+
41 Kanian inekal day bato. Insan tinmangay si Jesus ed tawen+ tan inkuan to: “Ama, misalamat ak ed sika ta dinengel mo ak.
42 Tua, amtak a naynay mo ak a dedengelen; balet nansalita ak nisengeg ed saray totoon akaalagey ed kaliberliber, pian manisia ra ya imbaki mo ak.”+
43 Sanen nibaga to la iraya, sikatoy inmeyag: “Lazaro, paway ka!”+
44 Pinmaway imay toon inatey, a saray sali tan lima to et apotipotan na saray abel, tan say lupa to et abalkot na abel. Inkuan nen Jesus ed sikara: “Ukbaran yo tan paulyan yo.”
45 Kanian dakel ed saray Judio a linmad si Maria so anisia ed si Jesus sanen anengneng day ginawa to,+
46 balet arum ed sikara et linmad saray Fariseo tan imbaga da iray ginawa nen Jesus.
47 Kanian tinipon na saray manunan saserdote tan saray Fariseo so Sanhedrin tan inkuan da: “Antoy gawaen tayo, ta amayamay a tanda so gagawaen na sayan too?+
48 No paulyanan tayo labat ed gagawaen to, manisia la ran amin ed sikato, tan onsabi iray Romano tan ekalen dad sikatayo so pasen* tayo tan say nasyon tayo.”
49 Balet inkuan na sakey ed sikara, si Caifas,+ ya atagey a saserdote ed saman a taon: “Anggapon balot so amta yo,
50 tan agyo nanenengneng a pakagunggonaan yo so ipatey na sakey a too parad saray totoo imbes a naderal so interon nasyon.”
51 Balet agto iya imbaga manlapud sarili to, ingen lapud sikatoy atagey a saserdote ed saman a taon, impasakbay ton si Jesus et nepeg ya ompatey parad nasyon,
52 tan aliwan parad nasyon labat, noagta tiponen to met a mankakasakey iray nitaytayak ya ananak na Dios.
53 Kanian manlapu lad saman ya agew et nantotongtongan day pamatey ed sikato.
54 Lapud saya et agla nanakar-akar a maparungtal si Jesus ed kawalaan na saray Judio, noagta sikatoy tinmaynan la diman ya amaarap ed pasen ya asingger ed kalawakan, diad syudad a tatawagey Efraim,+ tan nansiansia diman a kaiba to iray disipulo.
55 Natan et asingger lay Paskua+ na saray Judio, tan dakel so totoon nanlapud saman a pasen a tinmatdang ed Jerusalem sakbay na Paskua pian linisan day inkasikara unong ed ganggan.
56 Inanap day Jesus tan ibabaga rad sakey tan sakey legan iran akaalagey diad loob na templo: “Antoy nibaga yo? Agto lan balot kasi onlad piesta?”
57 Balet ingganggan na saray manunan saserdote tan saray Fariseo a siopaman a makaamta ed kawalaan nen Jesus et nepeg ton ibaga, ta pian naerel* da.
Paimanod leksab
^ Odino “pakanodnonotan a lubok.”
^ Manga taloran kilometro. Literal, “manga 15 estadyo.” Nengnengen so Apendise B14.
^ Odino “pakanodnonotan a lubok.”
^ Literal, “diad espiritu.”
^ Odino “pakanodnonotan a lubok.”
^ Say templo.
^ Odino “naaresto.”
