Say Kansion nen Solomon 5:1-16
5 “Linmoob ak ed hardin ko,+O agik, O nobyak.
Angala ak na mira tan tanaman a pampabalingit.+
Inakan koy dilok manlapud mismon ubong na bayaong;*Ininum koy alak ko tan say gatas ko.”+
“Mangan kayo, pinablin kakaaro!
Inum kayo tan manbuek kayod panangaro!”+
2 “Naugip ak, balet aliing so pusok.+
Narerengel kon ontotoktok so pinabpablik!”
‘Lukasan mo ak, O agik, O inarok,O malapatik, ya andiay pakabalawan!
Ta say ulok et abasay linaew,Say buek ko et abasay kelpa na labi.’+
3 Inekal ko lay andukey a kawes ko.
Kasin isulong ko ni lamet?
Inurasan ko la ray salik.
Kasin dutakan ko lamet?
4 Inekal na pinabpablik so lima to ed abot na kapot,Tan aliing so liknaan kod sikato.
5 Binmangon ak pian lukasan koy pinabpablik;Saray limak et manterter na mira,Tan saray gamet ko et manterter na larak a mira,Ya akabemben ed talak na puerta.
6 Nilukasan koy puerta,Balet linma la may pinabpablik, anggapo la.
Naermenan ak* sanen sikatoy inmalis.*
Inanap ko balet agko aromog.+
Tinawag ko balet ag-inmebat.
7 Saray bantay ya onliliber ed syudad et anengneng da ak.
Kinabil da ak, sinugatan da ak.
Saray bantay ed padir et inala rad siak so kolibemben* ko.
8 O anak a bibii na Jerusalem, sambaan yod siak:
No naromog yoy pinabpablik,Ibaga yod sikaton makapkapuy ak la lapud pakakailiw kod sikato.”
9 “Panon a mas maong so pinabpablim nen say siopaman a papablien,O sankagangganaan ed amin a bibii?
Panon a mas maong so pinabpablim nen say siopaman a papablien,Kanian pansasambaen mo kami?”
10 “Say pinabpablik et guapguapo tan ambalbalangay baog* to;Diad samplon libo et sikatoy sankaimano.
11 Say ulo to et singa karakep na balitok, say sankaabigan a klase na balitok.
Say buek to et singa saray ompapalasipas a bulong na palma,*Singa kareket na wawak.
12 Saray mata to et singa ra malapati diad abay na manag-agus a danum,A manaames ed gatas
Tan walad abay na napnapnon tiponay danum.*
13 Saray aping to et singa taneman na saray pampabalingit,+Singa saray pukdol na ambalbalingit iran tanaman.
Say bibil to et singa saray lirio, a manterter na larak a mira.+
14 Saray gamet na lima to et balitok ya inikday baton crisolito.
Say kabalgan to et pinasileng a garing* a napnoy safiro.
15 Saray bikking to et lusek a marmol a walad saray patoonan a gawad sankaabigan a klase na balitok.
Say itsura to et marakdakep a singa Lebanon, ag-itan naparaan a singa saray kiew a sedro.+
16 Masamsamit so sangi* to,Tan makapalikliket so amin a nipaakar ed sikato.+
Saya so pinabpablik, tan saya so lakin inarok, O anak a bibii na Jerusalem.”
Paimanod leksab
^ Odino “ampingilan.”
^ Odino posiblin, “Tinaynan ak na kamarerwak sanen sikatoy nansalita.”
^ Odino “Naandi so kamarerwak.”
^ Odino “pandong.”
^ Odino “katat.”
^ Odino posiblin, “singa monil na datiles.”
^ Odino posiblin, “tambib na subol.”
^ Diad Ingles et ivory. Sakey a klase na mablin materyales a manlalapud saray amputin pasingil na saray elepante tan arum ni ran ayayep.
^ Literal, “ngalangala.”
