Say Kansion nen Solomon 7:1-13
7 “Marakdakep iray salim ya akasandalyas,O maomaong ya anak a bii!
Saray balibalin ulpom et singa alahas,Ginawa na eksperton komikimey.
2 Say puseg mo et singa malimpek a yaong.
Ag-itan komon onkulang na tinimplaan ya alak.
Say eges mo et singa lusbo na trigoYa apaliberan na saray lirio.
3 Saray susom et singa duaran kilaw ya ulsa,Saray lason na ulsa a gazela.+
4 Say beklew mo+ et singa torin garing.*+
Saray matam+ et singa saray tiponay danum ed Hesbon+Diad abay na puerta na Bat-rabbim.
Say eleng mo et singa tori ed Lebanon,A manantandag ed Damasco.
5 Say ulom et singa Carmel ya akakorona ed sika,+Tan say andukey a buek mo+ et singa kolor-ube ya abel.*+
Say ari et naayat ed inkakulaney na buek mo.
6 Talagan maganggana ka, tan makapaliket kaEd amin na saray panliliketan a maong, O biin inad-arok!
7 Say alagey mo et singa kiew a palma,Tan saray susom et singa monil na datiles.+
8 Inkuan ko, ‘Onkalab ak ed kiew a palmaPian bembenan ko ray pugnel na bunga to.’
Saray susom et magmaliw komon a singa saray monil na ubas,Say ingas mo et singa komon kabalingit na saray mansanas,
9 Tan say sangim* et singa komon sankaabigan a klase na alak.”
“Komon ta balibali itan ya inumen parad lakin pinabpablik,A kalkalnan onaagus ed bibil na saramay naugip.
10 Para ak labat ed pinabpablik,+Tan siak labat so pipilaleken to.
11 O pinabpablik, gala,Onla tad kaumaan;
Manpainawa tad kawalaan na saray tanaman a hena.+
12 Ombangon tay masakbay tan onla tad kaubasanPian nanengneng ta no sinmimit* la ray ubas,No binmuskag la ray rosas,+Tan no nanrosas la ray kiew a granada.+
Diman et ipatnag koy panangarok ed sika.+
13 Binmalingit la ray tanaman a mandragoras;*+Diad saray puerta mi et wadman so amin a klase na masamit iran prutas.+
Saray kapanburbor tan saray abayag lan aburborEt inyatol ko parad sika, O pinabpablik.
Paimanod leksab
^ Diad Ingles et ivory. Sakey a klase na mablin materyales a manlalapud saray amputin pasingil na saray elepante tan arum ni ran ayayep.
^ Odino “kolor-ube ya abel a gawad bagoy karnero.”
^ Literal, “ngalangalam.”
^ Odino “nanrosas.”
^ Sayan prutas et papanisiaan a makatulong ed panlukon.
