Levitico 2:1-16
-
Say apay a kakanen (1-16)
2 “‘Natan, no walay siopaman* a mangiyapay na apay a kakanen+ parad si Jehova, say apay to et nepeg a pinon arina, tan patedteran toy larak tan ikdan toy olibano.+
2 Tan awiten to itan ed saray ananak nen Aaron, saray saserdote. Insan mangala so saserdote na sankaakop ed samay pinon arina a nilaokay larak tan amin ya olibano na satan, tan paaseweken to itan ed altar bilang apay a mangirepresenta,*+ bilang apay a pinoolan a walaay ambalingit* ya angob parad si Jehova.
3 Antokaman a nakeraan ed apay a kakanen et kien nen Aaron tan saray ananak to,+ bilang bengatlan sankasantosan+ manlapud saray apay a pinoolan parad si Jehova.
4 “‘No mangiyapay kay apay a kakanen ya inluto ed pugon, nepeg a gawa itan ed pinon arina, kurti-singsing ya andi-lebadura iran tinapay a nilaokay larak odino andi-lebaduran maimpis iran tinapay a pinuraporan na larak.+
5 “‘No say apay mo et apay a kakanen ya inluto ed tirampiak a kawali,+ nepeg a gawa itan ed pino, andi-lebaduran arina a nilaokay larak.
6 Nepeg a pisag-pisagen itan, tan patedteran mo na larak.+ Sakey itan ya apay a kakanen.
7 “‘No say apay mo et apay a kakanen ya inluto ed aralem a kawali, nepeg a gawa itan ed pinon arina a nilaokay larak.
8 Nepeg a gawad saraya so apay a kakanen ya awiten mod si Jehova, tan iyakar itan ed saserdote, a mangiyasingger ed satan diad altar.
9 Tan alaen na saserdote so arum ya apay a kakanen bilang apay a mangirepresenta*+ tan paaseweken to itan ed altar bilang sakey ya apay a pinoolan a walaay ambalingit* ya angob parad si Jehova.+
10 Say akeraan ed apay a kakanen et kien nen Aaron tan saray ananak to, bilang bengatlan sankasantosan manlapud saray apay a pinoolan parad si Jehova.+
11 “‘Agkayo mangiyaapay ed si Jehova na apay a kakanen ya alebaduraan,+ ta agkayo nepeg a manggaway antokaman a pinaakseng a masa odino pinaasewekan a dilo bilang apay a pinoolan parad si Jehova.
12 “‘Nayarian yo iratan ya iyapay ed si Jehova bilang apay ya unona iran bunga,+ balet ag-iratan nepeg a poolan ed altar pian panlapuay ambalingit* ya angob.
13 “‘Nepeg mon timplaan na asin so amin ya ilutom ya apay a kakanen; agmo lilingwanan a kargaay asin so apay mon kakanen, ta say asin so mangipanonot ed sika na impisipanan na Dios. Amin ya iyapay mo et nepeg a naasinan.+
14 “‘No iyapay mod si Jehova so apay a kakanen manlapud saray unonan aluton bunga, nepeg kan mangiyapay na balon ilik,* ya indalan ed apoy tan ag-abayo a maong, bilang apay a kakanen manlapud kien mon unona iran bunga.+
15 Ikdan mo itan na larak tan tapewan mo na olibano. Sakey itan ya apay a kakanen.
16 Paaseweken itan na saserdote bilang apay a mangirepresenta,*+ salanti, daiset ed samay binayon bunga a nilaokay larak, pati amin ya olibano na satan, bilang sakey ya apay a pinoolan parad si Jehova.
Paimanod leksab
^ Odino “kamarerwa.”
^ Odino “bilang pakanodnonotan (mangirerepresenta) a parte na satan.”
^ Odino “makapakepay liknaan; makapakalmay liknaan.” Literal, “makapainawa.”
^ Odino “makapakepay liknaan; makapakalmay liknaan.” Literal, “makapainawa.”
^ Odino “bilang pakanodnonotan (mangirerepresenta) a parte na satan.”
^ Odino “makapakepay liknaan; makapakalmay liknaan.” Literal, “makapainawa.”
^ Odino “mangiyapay na saray birdin dawa.”
^ Odino “bilang pakanodnonotan (mangirerepresenta) a parte na satan.”