Levitico 22:1-33
22 Onia ni inkuan nen Jehova ed si Moises:
2 “Ibagam ed si Aaron tan ed saray ananak to a nepeg iran manalwar no panon dan bembenan iray* masanton apay na saray Israelita pian agnapabanday so masanton ngaran ko+ nipaakar ed saray papasantosen da parad siak.+ Siak si Jehova.
3 Ibagam ed sikara, ‘Siopaman ed saray ilalak yo diad amin a henerasyon yo ya onasingger ed saray masanton bengatla a papasantosen na saray Israelita parad si Jehova, legan a sikatoy agmalinis, satan a too* et nepeg ya ekalen* ed arapan ko.+ Siak si Jehova.
4 Agnayarin mangan na saray masanton bengatla so siopaman ed saray ilalak nen Aaron ya akating+ odino walay ompapaway ed sikato+ ya anggad sikatoy magmaliw a malinis,+ pati samay aniwit ed siopaman a nagmaliw ya agmalinis lapud sakey ya inatey a too,*+ odino samay lakin walay pinmaway a semilya ed sikato,+
5 odino sakey a lakin aniwit na antokaman ed saray agmalinis ya amungkog a pinalsa+ odino samay aniwit na sakey a lakin agmalinis lapud antokaman a rason, tan siopaman a manggawa ed sikaton agmalinis.+
6 Say too* ya aniwit ed dinanman ed sarayan bengatla et magmaliw ya agmalinis ya anggad labi tan agnayarin mangan na antokaman ed saray masanton bengatla, balet sikatoy nepeg a manames.+
7 No sinmelek lay agew, sikatoy magmaliw lan malinis, tan kayari na satan et nayarian to lay mangan na saray masanton bengatla lapud satan so kakanen to.+
8 Ontan met, agto nayarin mangan na antokaman ya ayep ya inatey la odino biningbingkas na saray atap ya ayep ta magmaliw ya agmalinis lapud satan.+ Siak si Jehova.
9 “‘Nepeg dan sumpalen so obligasyon dad siak, pian ag-ira mankasalanan tan ompatey nisengeg ed satan lapud papabandayen da itan. Siak si Jehova a mamapasanto ed sikara.
10 “‘Anggapoy toon agmakanepegan* a nayarin mangan na antokaman a masanto.+ Agnayarin mangan na antokaman a masanto so sakey a dayo a miaayam ed saserdote odino sakey ya uupaan a trabahador.
11 Balet no saliwen na saserdote so sakey a too* ya usaren toy kuarta to, sayan too et nayarin mangan ed satan. Saray aripen a niyanak ed abung to et nayarin mangan met ed no antoy kakanen to.+
12 No say biin anak na saserdote et miasawa ed sakey ya aliwan saserdote,* agto nayarin mangan ed saray masanton kontribusyon.
13 Balet no say biin anak na saserdote et nabalo odino idiborsyo na asawa to tan anggapoy anak to tan sikatoy ompawil ed abung nen ama to a singa nen kaugawan to, sikatoy nayarin mangalay kanen to ed kakanen nen ama to;+ balet ag-itan nayarin kanen na toon agmakanepegan.*
14 “‘Natan no say sakey a too et agto ginagalay mangan na masanton bengatla, nepeg ton aruman na kakalima so balor na satan tan iter tod saserdote so masanton apay.+
15 Kanian agda nepeg a pabandayen iray masanton bengatla na saray Israelita, a saratan et kontribusyon da parad si Jehova,+
16 lapud nadusa rad pakasumlang da diad pangan da ed saray masanton bengatla a kontribusyon da; ta siak si Jehova a mamapasanto ed sikara.’”
17 Onia ni inkuan nen Jehova ed si Moises:
18 “Mansalita kad si Aaron tan ed saray ananak to tan ed amin ya Israelita tan ibagam ed sikara, ‘Sano mangiyapay so sakey ya Israelita odino sakey a dayon manaayam ed Israel na apay a popoolan+ parad si Jehova pian sumpalen iray sipan to odino pian manggaway boluntaryon apay,+
19 nepeg a sikatoy mangiyapay na sakey ya andiay depekton kalakian a baka+ manlapud pulok, saray kilaw a kalakian a karnero, odino saray kanding, pian naabobonan.
20 Agkayo nepeg a mangiyapay na antokaman a bengatlan walaay depekto,+ ta agkayo naabobonan ed satan.
21 “‘No mangiyapay so sakey a too na bagat a pandurungoan+ parad si Jehova pian sumpalen toy sipan to odino bilang boluntaryon apay, nepeg ya andiay depekton ayep itan a manlapud pulok na saray baka odino ed pulok na saray karnero, pian naabobonan. Nepeg ya anggapon balot so depekto na satan.
22 Agnepeg ya iyapay so bulag, apiley, walaay sugat, butil, burog, odino kular; agyo nepeg ya iyapay ed si Jehova so dinanman ed saratan odino iyapay iratan ed altar parad si Jehova.
23 Nayarian mon iyapay so sakey a kalakian a baka odino karnero ya andukey odino antikey so sakey a sali to bilang boluntaryon apay, balet ag-itan naabobonan bilang apay ya insipan.
24 Agmo nepeg ya iyapay ed si Jehova imay ayep a say paltak to et aderal odino aterak odino akapon, tan agyo nepeg ya iyapay iratan ya ayayep diad dalin yo.
25 Tan agyo nepeg ya iyapay so dinanman ed saratan manlapud lima na sakey a dayo bilang tinapay a parad Dios yo, ta walaay depekto iratan. Ag-iratan naabobonan parad sikayo.’”
26 Onia ni inkuan nen Jehova ed si Moises:
27 “Sano niyanak so sakey a kalakian a baka odino kilaw a kalakian a karnero odino sakey a kanding, mansiansia itan ed ina to diad loob na pitoy agew,+ balet manlapud komawalon agew et nayari lan abobonan itan bilang apay, sakey ya apay a pinoolan parad si Jehova.
28 Nipaakar ed sakey a baka odino sakey a karnero, agyo nepeg a pakgeran itan tan say kilaw to diad parehon agew.+
29 “No mangiyapay kayo na bagat parad pisasalamat ed si Jehova,+ nepeg yon iyapay itan ed paraan a nagamoran yoy panangabobon to.
30 Nepeg a kanen itan diad satan ya agew. Agkayo mangikekera na antokaman ed satan ya anggad kabuasan.+ Siak si Jehova.
31 “Nepeg yon sumpalen iray ganggan ko tan unoren iratan.+ Siak si Jehova.
32 Agyo papabandayen so masanton ngaran ko,+ tan nepeg a napasanto ak ed pegley na saray Israelita.+ Siak si Jehova a mamapasanto ed sikayo,+
33 say angipaway ed sikayo diad dalin na Ehipto pian magmaliw ak a Dios yo.+ Siak si Jehova.”
Paimanod leksab
^ Literal, “ibiig so sarili da ed saray.”
^ Odino “kamarerwa.”
^ Odino “pateyen.”
^ Odino “lapud sakey a kamarerwa.”
^ Odino “kamarerwa.”
^ Literal, “Anggapoy estranghero,” salanti, sakey ya agkabiangan ed pamilya nen Aaron.
^ Odino “kamarerwa.”
^ Odino “miasawa ed sakey a dayo.”
^ Literal, “estranghero,” salanti, sakey ya agkabiangan ed pamilya nen Aaron.
