Levitico 27:1-34
27 Onia ni inkuan nen Jehova ed si Moises:
2 “Mitongtong kad saray Israelita, tan ibagam ed sikara, ‘No manggaway nikabiig a sipan+ so sakey a too pian iyapay tod si Jehova so mipetekan a bili na sakey a too,*
3 say mipetekan a bili na sakey a laki a mantaon na 20 ya anggad 60 et 50 siklo* a pilak unong ed siklo na masanton pasen.*
4 Balet no sakey a bii itan, say mipetekan a bili et 30 siklo.
5 No say edad et 5 ya anggad 20, say mipetekan a bili na sakey a laki et 20 siklo, tan 10 siklo parad sakey a bii.
6 No say edad et sakey bulan ya anggad limay taon, say mipetekan a bili na sakey a laki et limaran siklo a pilak, tan taloran siklo a pilak parad sakey a bii.
7 “‘No say edad et 60 a patagey, say mipetekan a bili et 15 siklo parad sakey a laki tan 10 siklo parad sakey a bii.
8 Balet no samay mangisisipan et pobpobri kanian agto nabayaran so mipetekan a bili,+ sikatoy onalagey ed arapan na saserdote, tan ibaga na saserdote so bili parad sikato. Kuentaen na saserdote so bili unong ed no antoy nayarian na samay mangisisipan.+
9 “‘No say insipan na sakey a too et sakey ya ayep a matukoy ya iyapay ed si Jehova, antokaman ya iter tod si Jehova et magmaliw a masanto.
10 Agto nayarin salatan itan odino isalat so makapuy parad maabig odino maabig parad makapuy. Balet no isalat to itan ed sakey ya ayep parad sananey ya ayep, samay akauna tan samay insalat tod satan et namparan magmaliw a masanto.
11 No sakey itan ya agmalinis ya ayep+ ya agnayarin iyapay ed si Jehova, paalageyen to itan diad arapan na saserdote.
12 Insan ibaga na saserdote so bili na satan, balanglan maabig odino makapuy. Say bili ya imbaga na saserdote so nepeg a tumboken.
13 Balet no bilang ta labay ton dondonen itan, nepeg ton iter so akuentan bili ya aruman toy kakalima.+
14 “‘Natan, no pasantosen na sakey a too so abung to bilang sakey a bengatlan masanto parad si Jehova, ibaga na saserdote no kaunongay bili na satan, balanglan maabig odino makapuy itan. Unong ed bili ya imbaga na saserdote, saya so nepeg a bili na satan.+
15 Balet no samay mamapasanto ed abung to et labay ton dondonen itan, nepeg ton iter so kuarta parad akuentan bili ya aruman toy kakalima, insan nakayarian to la itan.
16 “‘No say sakey a too et pasantosen to parad si Jehova so arum ed kayarian ton uma, say bili et kuentaen unong ed karakel na bukel ya itanem ditan; say sakey homer* a bukel na sebada et 50 siklo a pilak.
17 No pasantosen toy uma to manlapud taon na Jubileo,+ nepeg a tumboken imay akuentan bili.
18 No pasantosen toy uma to kayari na Jubileo, kuentaen na saserdote parad sikato so bili unong ed saray nakekeran taon ya anggad ontumbok a taon na Jubileo, tan nepeg a bawasan so akuentan bili.+
19 Balet no bilang ta say uma et dondonen na samay mamapasanto ed satan, iter to so kuarta parad akuentan bili ya aruman toy kakalima, tan mansiansia itan a kayarian to.
20 Natan no agto dondonen so uma tan nilako so uma ed sananey a too, agla itan narondon a balot.
21 Sano ipawil so uma diad Jubileo, magmaliw la itan a masanto parad si Jehova, bilang sakey ya uma ya imbiig parad sikato. Magmaliw itan a kayarian na saray saserdote.+
22 “‘No pasantosen na sakey a too parad si Jehova so sakey ya uma a sinaliw to ya agkabiangan ed tawir ton dalin,+
23 kuentaen na saserdote parad sikato so bili ya anggad ontumbok a taon na Jubileo, tan iter to so akuentan bili diad saman ya agew.+ Masanton bengatla itan parad si Jehova.
24 Diad taon na Jubileo et nipawil so uma ed samay angaliwan tod satan, diad samay makankayarian ed dalin.+
25 “‘Nepeg a kuentaen so amin a bili unong ed siklo na masanton pasen. Say siklo et nepeg a 20 gera.*
26 “‘Balet anggapoy nepeg a mamasanto ed panguloan na saray ayayep, lapud niyanak itan bilang panguloan parad si Jehova.+ Balanglan kalakian a baka odino karnero, kayarian la itan nen Jehova.+
27 No nanlapu itan ed saray agmalinis ya ayayep tan dondonen to itan unong ed akuentan bili, nepeg ton aruman na kakalima.+ Balet no agto dondonen, ilako to itan unong ed akuentan bili.
28 “‘Balet agnepeg ya ilako odino dondonen na sakey a too so sakey a bengatlan sigpot ton inggana* parad si Jehova manlapud saray kayarian to, balanglan manlapud katooan odino ayayep odino uma a kayarian to. Amin ya imbiig a bengatla et sakey a bengatlan sankasantosan parad si Jehova.+
29 Ontan met, agnayarin dondonen so sakey a toon asentensiaan* a naderal.+ Nepeg a sikatoy pateyen.+
30 “‘Kada kakaplo+ na amin a bungay dalin, balanglan manlapud bunga na uma odino saray kiew et kayarian nen Jehova. Masanton bengatla itan parad si Jehova.
31 No bilang ta labay na sakey a too a dondonen so antokaman ed kakaplo to, nepeg ton aruman na kakalima.
32 Nipaakar ed kada kakaplo na pulok na saray baka tan karnero, amin ya ondalan ed silong na baston na managpastol, samay komasamplon ayep* et magmaliw a masanton bengatla parad si Jehova.
33 Agto nepeg a nengnengen no kasin maabig odino makapuy itan, odino isalat to itan. Balet no bilang ta salien ton isalat itan, samay akauna tan samay insalat et namparan magmaliw a bengatlan masanto.+ Ag-itan nayarin dondonen.’”
34 Saraya so ganggan ya inter nen Jehova ed si Moises diad Palandey Sinai+ parad saray Israelita.
Paimanod leksab
^ Odino “kamarerwa.”
^ Say sakey a siklo et 11.4 gramo. Nengnengen so Apendise B14.
^ Odino “unong ed masanton siklo.”
^ Say sakey a homer et 220 litro. Nengnengen so Apendise B14.
^ Say sakey a gera et 0.57 gramo. Nengnengen so Apendise B14.
^ Odino “inggana to parad kadederal.”
^ Odino “inggana.”
^ Odino “ulo.”
