Miqueas 1:1-16
1 Say mensahe nen Jehova a sinmabi ed si Miqueas*+ a taga Moreset, diad panaon na arari na Juda+ a si Jotam,+ Ahaz,+ tan Hezekias,+ tan anengneng to iya ed pasingawey nipaakar ed Samaria tan Jerusalem:
2 “Dengel kayo, amin yon totoo!
Talineng ka, O dalin tan say amin a walad sika,Tan mantasi komon so Soberanon Katawan a Jehova sumpad sikayo+—Si Jehova manlapud masanton templo to.
3 Ta ompaway si Jehova manlapud pasen to;Sikatoy onleksab tan onggatin ed saray atagey a pasen ed dalin.
4 Natunaw iray palandey ed leksab na saray sali to,+Tan onletak iray lawak,*Singa sebo* a natunaw lapud apoy,Singa saray danum ya onaagus ed aralem a kelas.
5 Nagawa irayan amin lapud impanrebelde na Jacob,Lapud saray kasalanan na sankaabungan na Israel.+
Siopay natetel lapud impanrebelde na Jacob?
Agta say Samaria?+
Tan siopay natetel lapud saray atagey a pasen na Juda?+
Agta say Jerusalem?
6 Pagmaliwen kon bunton na geray ed uma so Samaria,Sakey a pasen a pantaneman na saray kaubasan;Ibasileng* kod lawak iray bato to,Tan igebak iray pundasyon to.
7 Namisimisi so amin ya imahen to,+Tan napoolan so amin a regalon inawat to bilang upa to.*+
Deralen ko so amin ya idolo to.
Ta atipon to iratan lapud saray upa tod pilalawanan to,Tan magmaliw lamet iratan ya upa parad paabang a bibii.”
8 Onakis ak tan manugaog ak lapud satan;+Manakar ak a kasalisali tan lakseb.+
Onakis ak a singa saray ason jakal,Tan manermen ak a singa saray ostrits.
9 Ta agla natambal so sugat to;+Akasabi itan ya anggad Juda.+
Kinmayat so salot anggad puerta na syudad na totook, diad Jerusalem.+
10 “Agyo itan ipapakabat diad Gat;Agkayon balot onaakis.
Mantulintulin kayod dabok diad Bet-afra.*
11 Taynan kayon labos tan kababaing, O sikayo ran manaayam* ed Safir.
Agni pinmaway iray manaayam* ed Zaanan.
Walay nagawan pannangis diad Bet-ezel, tan ekalen na satan ed sikayo so suporta to.
12 Ta maabig so inalagar na saray manaayam* ed Marot,Balet mauges so indapo nen Jehova diad puerta na Jerusalem.
13 Isinta yoy karwahe ed saray kabayo, O sikayo ran manaayam* ed Lakis.+
Sikayo so sengegan na impankasalanan na biin anak na Sion,Ta aromog ed sika iray impanrebelde na Israel.+
14 Kanian mangiter ka na saray regalon panamatanir ed Moreset-gat.
Saray kaabungan na Aczib+ et nagmaliw a makapalikdo ed arari na Israel.
15 O sikayo ran manaayam* ed Maresa,+ iyakar kod sikayo so managsakop.*+
Onsabi ya anggad Adulam+ so gloria na Israel.
16 Manpakalbo kayo, tan kiskisan yoy ulo yo parad saray pinabli yon ananak.
Manpakalbo kayo a singa ulo na agila,
Lapud niyarawi rad sikayo tan nibantak ira ed arum a dalin.”+
Paimanod leksab
^ Arum a porma na ngaran a Miguel (a mankabaliksay “Siopa so Mipara ed Dios?”) odino Miqaias (a mankabaliksay “Siopa so Mipara ed si Jehova?”).
^ Odino “iray abeban patar.”
^ Nayarin tutukoyen na saya imay wax a papawalaen na saray bayaong.
^ Literal, “Iyibung.”
^ Odino “amin ya upa tod pilalawanan to.”
^ Odino “abung na Afra.”
^ Literal, “O biin manaayam.”
^ Literal, “so biin manaayam.”
^ Literal, “na biin manaayam.”
^ Literal, “O biin manaayam.”
^ Literal, “O biin manaayam.”
^ Odino “managsamsam.”
