Nahum 3:1-19
3 Pakaskasi la so syudad a managpaagus na dala!
Sikatoy napno na panagsaol tan panagtakew.
Walan naynay so biktima to!
2 Narengel ditan so tanol na siplat tan dalagurog na dalig,Say manbagtik a kabayo tan manlukson karwahe.
3 Say lakin akakabayo, mankirlap ya espada, tan say mankidyam a gayang,Saray amayamay ya apatey tan saray abunton a bangkay—Agnabilang iray inaatey.
Napapatakba rad saray bangkay.
4 Satan et lapud karakel na prostitusyon a gagawaen na sayan imoral a bii,Sikato a maganggana tan makapaayat, tan marunong ed panagsalamangka,A mamapatit ed saray nasyon diad panamegley na pilalawanan to tan ed saray pamilya diad panamegley na panagsalamangka to.
5 “Onsumpa ak ed sika,”* so imbaga nen Jehova na saray armada,+“Ilukayab ko anggad lupam so sapey mo;Ipanengneng kod saray nasyon so inkalabos-lakseb mo,Tan ed saray panarian so kababaingan mo.
6 Tan tupaken ta kay dutakTan gawaen ta kan kabkabusol;Pagmaliwen ta kan sakey a bengatlan makapataktakot.+
7 Onarawi ed sika so amin a makanengneng ed sika+ tan ibaga ran,‘Aderal lay Ninive!
Siopay miambegya ed sikato?’
Iner so pananapan koy manligliwa ed sika?
8 Mas maong ka ni kasi nen say No-amon,*+ a walad abay na saray kanal na Nilo?+
Sikatoy apaliberan na danum;Say dayat so kayamanan to tan say dayat so padir to.
9 Say Etiopia so lapuan na agaylan biskeg to, ontan met ed Ehipto.
Say Put+ tan saray taga Libya so ontutulong ed sikato.+
10 Balet siansian sikatoy nibantak ed arum a dalin;Sikatoy naaripen.+
Saray ananak to et abuybuyak so laman da ed suyok na saray karsada.*
Nampapalaranan da iray gagalangen a totoo to,Tan abalor na gulonggulong so amin a bantog a totoo to.
11 Nabuek ka met;+Manamot-amot ka.
Pasalimbengan ka ed kalaban.
12 Amin a padir mo et singa kiew ya igos a walaan na saray unonan aluton bunga;Sano nayugayog iratan et napelag ed sangi na saray manag-akmon.
13 Saray sundalom et singa saray bibii a walad sika.
Nalukasan iray puerta na dalin mo parad saray kalaban mo.
Upoten na apoy iray balewet na saray puertam.
14 Asol kay danum parad panaon na panagkubkob!+
Paelet mo ray padir mo.
La kad pitek tan gatin-gatinan mo itan;Manggawa kay laryo.
15 Balet siansia nin akmonen kay apoy.
Itumba kay espada.+
Akmonen ka na satan a singa gagawaen na saray agni nampayak a duron.+
Manparakel ka a singa saray agni nampayak a duron!
On, manparakel ka a singa saray duron!
16 Pinarakel mo iray managlakom a mas dakel ni nen saray bitewen ed tawen.
Manlulupos so agni nampayak a duron insan ira ontikyab.
17 Singa duron iray guardiam,Tan singa amungkog a duron iray opisyal mo.
Mankakampo rad saray pukokan a gawad bato diad agew ya ambetel,Balet kasinag na agew et ontikyab la ra;Tan anggapoy makaamta no iner so kawalaan da.
18 Mantemeg iray managpastol mo, O ari na Asirya;Nansiansia iray gagalangen a totoom diad saray ayaman da.
Nitaytayak ed kapalandeyan iray totoom,Tan anggapoy manitipon ed sikara.+
19 Anggapoy remedyo ed pakaderal mo.
Agla napaabig so sugat mo.
Ontipak so amin a makadngel na balita nipaakar ed sika;+Ta siopay agnanirap lapud agaylan inkaruksam?”+
