Nehemias 11:1-36
-
Naaruman so manaayam ed Jerusalem (1-36)
11 Saray prinsipe na totoo et manaayam ed Jerusalem;+ balet saray arum a totoo et nampapalaranan ira+ pian makapili ra na sakey ed kada samplora a manayam ed Jerusalem a masanton syudad, tan say nakekeraan a siamera et diad arum a syudad.
2 Ontan met, benendisyonan na totoo so amin a namboluntaryon manayam ed Jerusalem.
3 Tan saraya so pangulo na probinsya* a nanayam ed Jerusalem. (Saray nakekeraan ed Israel, saray saserdote, saray Levita, saray lingkor ed templo,*+ tan saray kailalakan na saray lingkor nen Solomon+ et nanayam ed arum nin syudad na Juda, a kada sakey et diad dilin kayarian to a walad syudad to.+
4 Ontan met, nanayam ed Jerusalem so arum ed saray totoo na Juda tan Benjamin.) Diad saray totoo na Juda et si Ataias ya anak nen Uzias ya anak nen Zacarias ya anak nen Amarias ya anak nen Sefatias ya anak nen Mahalalel a nanlapud ananak nen Perez,+
5 tan si Maasias ya anak nen Baruc ya anak nen Colhoza ya anak nen Hazaias ya anak nen Adaias ya anak nen Joiarib ya anak nen Zacarias ya anak na Selanita.
6 Amin a kailalakan nen Perez a manaayam ed Jerusalem et 468 makayarin lalaki.
7 Tan saraya so totoo na Benjamin: si Sallu+ ya anak nen Mesulam ya anak nen Joed ya anak nen Pedaias ya anak nen Kolaias ya anak nen Maasias ya anak nen Itiel ya anak nen Jesaias,
8 tan kaiba met si Gabai tan si Salai, ya ami-amin et 928 lalaki;
9 tan si Joel ya anak nen Zicri so manangasikaso ra, tan si Juda ya anak nen Hasenua so onkokomaduan manangasikaso ed syudad.
10 Diad saray saserdote: si Jedaias ya anak nen Joiarib, si Jakin,+
11 si Seraias ya anak nen Hilkias ya anak nen Mesulam ya anak nen Zadok ya anak nen Meraiot ya anak nen Ahitub,+ a manangidaulo ed abung* na tuan Dios,
12 tan saray agagi ra a manggagawa na kimey ditan, 822 lalaki; tan si Adaias ya anak nen Jeroham ya anak nen Pelalias ya anak nen Amzi ya anak nen Zacarias ya anak nen Pasur+ ya anak nen Malkias,
13 tan saray agagi to, saray lider na saray pamilya na kaamaan, 242 lalaki; tan si Amashai ya anak nen Azarel ya anak nen Azai ya anak nen Mesilemot ya anak nen Imer,
14 tan saray agagi to a mabibiskeg tan makpel a lalaki et 128; tan say manangasikaso ra et si Zabdiel a nanlapud prominentin pamilya.
15 Tan diad saray Levita: si Semaias+ ya anak nen Hasub ya anak nen Azrikam ya anak nen Hasabias ya anak nen Buni,
16 tan si Sabetai+ tan Jozabad,+ a kabiangan ed saray pangulo na Levita, saray mangaasikaso ed saray kimey ed paway na abung na tuan Dios;
17 tan si Matanias+ ya anak nen Miqueas, ya anak nen Zabdi ya anak nen Asaf,+ say mangidadaulo ed panagkansion, a mangibabalikas na panangirayew diad pikakasi,+ tan si Bakbukias ya onkokomaduan manangidaulo ed saray agagi to, tan si Abda ya anak nen Samua ya anak nen Galal ya anak nen Jedutun.+
18 Amin a Levita ed masanton syudad et 284.
19 Tan saray bantay na puerta et sikara di Akub, Talmon,+ tan saray agagi ran mangguaguardia diad saray puerta, 172 lalaki.
20 Saray nakekeraan ed Israel, saray saserdote, tan saray Levita et wala rad arum nin syudad na Juda, a kada sakey et diad tinawir ton kayarian.*
21 Saray lingkor ed templo*+ et manaayam ed Ofel,+ tan si Ziha tan Gispa so manangasikaso ed saray lingkor ed templo.*
22 Say manangasikaso ed saray Levita diad Jerusalem et si Uzi ya anak nen Bani ya anak nen Hasabias ya anak nen Matanias+ ya anak nen Mica, a nanlapud saray ananak nen Asaf, saray managkansion; sikato so mangaasikaso ed kimey diad abung na tuan Dios.
23 Ta walay ganggan na ari parad sikara,+ tan walay niganan probisyon parad saray managkansion unong ed inagew-agew a pankaukolan da.
24 Tan si Petahias ya anak nen Mesezabel a nanlapud saray ananak nen Zera ya anak nen Juda so mananimbawa na ari* ed amin a pamaakaran na totoo.
25 Nipaakar ed saray baryo tan saray uma na saratan, arum ed saray totoo na Juda et nanayam ed Kiriat-arba+ tan diad angkekelag* a baley na satan, diad Dibon tan diad angkekelag a baley na satan, diad Jekabzeel+ tan diad saray baryo na satan,
26 diad Jesua, diad Molada,+ diad Bet-pelet,+
27 diad Hazar-sual,+ diad Beer-sheba tan diad saray angkekelag* a baley na satan,
28 diad Ziklag,+ diad Mecona tan diad saray angkekelag* a baley na satan,
29 diad En-rimon,+ diad Zora,+ tan diad Jarmut,
30 diad Zanoa,+ diad Adulam tan diad saray baryo na saratan, diad Lakis+ tan diad kaumaan na satan, tan diad Azeca+ tan diad saray angkekelag* a baley na satan. Nanayam* ira manlapud Beer-sheba ya anggad Lawak nen Hinom.+
31 Tan saray totoo na Benjamin et walad Geba,+ Micmas, Aya, Bethel+ tan diad saray angkekelag* a baley na satan,
32 Anatot,+ Nob,+ Ananias,
33 Hazor, Rama,+ Gitaim,
34 Hadid, Zeboim, Nebalat,
35 Lod, tan Ono,+ say lawak na saray marunong a komikimey.
36 Tan say arum a grupo na Levita a nanlapud Juda et impanayam ed Benjamin.
Paimanod leksab
^ Odino “nasasakopan a distrito.”
^ Odino “saray Netineo.” Literal, “saray inter a totoo.”
^ Odino “templo.”
^ Odino “dilin tawir to.”
^ Odino “saray Netineo.” Literal, “saray inter a totoo.”
^ Odino “saray Netineo.” Literal, “saray inter a totoo.”
^ Literal, “so walad lima na ari.”
^ Odino “walad kaliberliber.”
^ Odino “walad kaliberliber.”
^ Odino “walad kaliberliber.”
^ Odino “Nankampo.”
^ Odino “walad kaliberliber.”
^ Odino “walad kaliberliber.”
