Nehemias 13:1-31
13 Diad saman ya agew et binasa so libro nen Moises a sankarengel na totoo,+ tan naamtaan ya akasulat ditan ya agbalot nayarin onloob ed kongregasyon na tuan Dios iray Ammonita tan Moabita,+
2 ta agda inikdan na tinapay tan danum iray Israelita, noagta inupaan day Balaam a mangisamba ed sikara.+ Balet pinagmaliw na Dios mi a bendisyon so samba.+
3 Sanen arengel na totoo so ganggan, imbiig dad Israel so amin a nanlapud kapolian na saray dayo.*+
4 Antis na saya, say saserdoten mangaasikaso ed saray kuarton panagsimpenan* diad abung* na Dios mi+ et si Eliasib+ a kanayon nen Tobias.+
5 Impausar tod si Tobias so sakey a baleg a kuarton panagsimpenan,* diman ed datin pangiinan na apay a kakanen, olibano, tan saray kagawaan tan say kakaplo na ilik,* balon alak, tan larak+ a nepeg ya iter ed saray Levita,+ managkansion, tan saray bantay na puerta, kaibay kontribusyon parad saray saserdote.+
6 Tan legan na sayan panaon et anggapo ak ed Jerusalem, ta linma ak ed si Arin Artaxerxes+ na Babilonia diad koma-32 taon+ na uley to; tan ag-abayag et nampatanir ak ed ari ya onalis ak.
7 Kasabik ed Jerusalem et anengneng koy graben ginawa nen Eliasib+ parad si Tobias,+ sanen impausar tod sikato so kuarton panagsimpenan diad sular na abung na tuan Dios.
8 Talagan agko itan agustoan kanian imbabantak kod paway na kuarton panagsimpenan* so amin a muebles nen Tobias.
9 Kayari na satan, angiganggan ak, tan nilinisan da ray kuarton panagsimpenan;* tan impawil ko ditan iray kagawaan na abung na tuan Dios,+ kaibay apay a kakanen tan olibano.+
10 Naamtaan ko met a saray betang na saray Levita+ et ag-iiter ed sikara,+ kanian tinmaynan iray Levita tan managkansion a manlilingkor, a balang sakey et pinmawil diad uma to.+
11 Kanian nampasnokan ko ray kasandin manuley+ tan inkuan ko: “Akin et apaulyanan so abung na tuan Dios?”+ Insan tinipon ko ray Levita tan impawil ko rad kimey a nipabtang ed sikara.
12 Tan say interon Juda et angawit na saray kakaplo+ na ilik, balon alak, tan larak diad saray kuarton panagsimpenan.+
13 Insan si Selemias a saserdote, si Zadok a managkopya,* tan si Pedaias a sakey ed saray Levita et impasen kon mangasikaso ed saray kuarton panagsimpenan, tan si Hanan ya anak nen Zacur ya anak nen Matanias so ontutulong ed sikara, ta sarayan lalaki et ipapasen a napanmatalkan. Responsabilidad day panagbunog ed saray agagi ra.
14 O Dios ko, nonot mo ak+ nisengeg ed saya, tan agmo komon lilingwanan iray impatnag kon matoor a panangaro parad abung mo tan saray panaglingkor* ditan.+
15 Diad saraman ya agew et anengneng kod Juda iray totoon mankikimey diad panagpespesan na ubas legan na Sabaton,+ a mangaawit iray dakdakel ya ilik tan ilulugan da iraya ed saray asno, tan mangaawit met iray alak, ubas, igos, tan nambabangil ni, ya iloloob dad Jerusalem diad agew na Sabaton.+ Kanian pinasakbayan ko ra ed panlalako dad sarayan naakan diad saman ya agew.*
16 Tan saray taga Tiro a manaayam ed syudad et mangaawit na saray sira tan nanduruman klase na produkto, tan ilalako da iratan ed saray taga Juda tan diad Jerusalem no Sabaton.+
17 Kanian nampasnokan ko ray gagalangen a totood Juda tan inkuan kod sikara: “Anto yay mauge-uges a gagawaen yo, a leleglemewen yo ni ingen so agew na Sabaton?
18 Agta oniay ginawa na saray inmuunan atateng yo, kanian indapo na Dios tayo iyan kadederal ed sikatayo tan ed sayan syudad? Natan et lalo yon padadalangen so sanok to ed Israel diad panleleglemew yod Sabaton.”+
19 Kanian kasirunget to diad saray puerta na Jerusalem antis na Sabaton, ingganggan ko ya ikapot iray puerta. Imbagak met ya agda nepeg a lukasan iratan anggad kayari na Sabaton, tan impasen ko ray arum ed saray lingkor ko diad saray puerta pian anggapoy antokaman a niloob ditan diad agew na Sabaton.
20 Kanian saray negosyante tan saray managlako na nanduruman klase na produkto et aminsan odino amiduan amalabas na labi diad paway na Jerusalem.
21 Insan pinasakbayan ko ra tan inkuan kod sikara: “Akin et mamapalabas kayoy labi diad arapan na padir? No gawaen yo ni itan, puersaan ta kayon paekalen.” Manlapud saman et agla ra linma diad Sabaton.
22 Tan inkuan kod saray Levita a nepeg a regular dan linisay inkasikara tan onla ra tan manbantay ira ed saray puerta pian mansiansian masanto so agew na Sabaton.+ O Dios ko, nonoten mo met komon iya parad siak, tan kasian mo ak unong ed kabaleg na matoor a panangarom.+
23 Diad saraman ya agew et wala met iray anengneng kon Judio ya angasawa* na saray bibiin Asdodita,+ Ammonita, tan Moabita.+
24 Kapaldua ed saray ananak da so mansasalita na lenguahe na saray Asdodita tan kapaldua so mansasalita na lenguahe na arum a totoo, balet anggapod saraya so makapansalita na lenguahe na saray Judio.
25 Kanian nampasnokan ko ra tan insambak ira tan impalewet koy arum a lalaki+ tan binagot koy buek da tan impansipan ko ra ed Dios: “Agyo nepeg ya iter iray anak yon bibii ed saray anak dan lalaki, tan agyo nepeg ya awaten so siopaman ed saray anak dan bibii parad saray anak yon lalaki odino parad sikayon mismo.+
26 Agta saraya so sengegan na impankasalanan nen Arin Solomon na Israel? Diad dakel a nasyon et anggapo so ari a singa sikato;+ tan sikatoy inaro na Dios to,+ kanian sikatoy ginawa na Dios ya ari ed interon Israel. Balet sikatoy nilagyat a mankasalanan na saray asawa to a dayon bibii.+
27 Agta agnin balot arengelan a nagawaan yo yan baleg a kaugsan ya agpanmatoor ed Dios tayo diad pangasawa yo na saray dayon bibii?”+
28 Sakey ed saray anak a lalaki nen Joiada+ ya anak nen Eliasib+ ya atagey a saserdote et manugang nen Sanbalat+ a Horonita. Kanian sikatoy pinataynan ko.
29 Nonot mo ra, O Dios ko, lapud dinutakan day inkasaserdote tan say sipanan na inkasaserdote+ tan saray Levita.+
30 Tan nilinisan ko ra ed amin ya inkarutak na saray dayo, tan angipabtang ak na saray kimey a panaglingkor ed balang sakey a saserdote tan Levita,+
31 tan inyuksoy koy pangawit na saray kiew+ diad nigeter iran panaon tan parad saray unonan matakken a bunga.
O Dios ko, maabig* komon so nanonotan mod siak.+
Paimanod leksab
^ Odino “amin a nanlalaok a kapolian.”
^ Odino “kuarton pananganan.”
^ Odino “templo.”
^ Nayarin trigo odino sebada.
^ Odino “kuarton pananganan.”
^ Odino “kuarton pananganan.”
^ Odino “kuarton pananganan.”
^ Odino “eskriba.”
^ Odino “panangasikaso.”
^ Odino posiblin, “pinasakbayan ko ra ed saman ya agew ya ag-ira manlalako na naakan.”
^ Odino “angawit ed kaabungan da.”
^ Odino “parad kamaongan.”
