Nehemias 3:1-32
-
Impaalagey lamet iray padir (1-32)
3 Say atagey a saserdoten si Eliasib+ tan saray agagi ton saserdote et ginapoan dan ipaalagey so Puerta na Saray Karnero.+ Pinasanto* ra itan+ tan inikdan da na saray kapot; pinasanto ra itan anggad Tori na Mea,+ ya anggad Tori nen Hananel.+
2 Tan diad abay da, say mangipapaalagey et saray lalaki na Jerico;+ insan diad abay da, say mangipapaalagey et si Zacur ya anak nen Imri.
3 Impaalagey na ananak nen Hasenaa so Puerta na Sira;+ inggawaan da itan na hamba+ tan inikdan da na saray kapot, talak, tan balewet.
4 Tan diad abay da, say angapiger et si Meremot+ ya anak nen Urias ya anak nen Hakoz, tan diad abay da, say angapiger et si Mesulam+ ya anak nen Berekias ya anak nen Mesezabel, tan diad abay da, say angapiger et si Zadok ya anak nen Baana.
5 Tan diad abay da, say angapiger et saray Tekoita,+ balet saray prominentin lalaki ed sikara et agda labay ya iyabebay inkasikara a mibiang ed* panaglingkor na saray katawan da.
6 Si Joiada ya anak nen Pasea tan si Mesulam ya anak nen Besodias so angapiger ed Puerta na Daan a Syudad;+ inggawaan da itan na hamba tan inikdan da na saray kapot, talak, tan balewet.
7 Diad abay da, say angapiger et si Melatias a Gibeonita+ tan si Jadon a Meronotita, saray lalakin taga Gibeon tan Mizpa+ a walad pakauley na gobernador na rehyon a walad Nibaliw na Ilog.*+
8 Diad abay da, say angapiger et si Uziel ya anak nen Harhaias, sakey ed saray managpanday na balitok, tan diad abay to, say angapiger et si Hananias, sakey ed saray managgaway puyok;* tan dinantal da* so Jerusalem ya anggad Malapar a Padir.+
9 Tan diad abay da, say angapiger et si Refaias ya anak nen Hur, a prinsipe ed kapaldua na distrito na Jerusalem.
10 Tan diad abay da, si Jedaias ya anak nen Harumaf so angapiger ed samay walad arap na abung to, tan diad abay to, say angapiger et si Hatus ya anak nen Hasabnias.
11 Inapiger nen Malkias ya anak nen Harim+ tan si Hasub ya anak nen Pahat-moab+ so sananey nin parte,* pati samay Tori na Saray Pugon.+
12 Tan diad abay da, say angapiger et si Salum ya anak nen Halohes, prinsipe ed kapaldua na distrito na Jerusalem, a kaiba to ray ananak ton bibii.
13 Inapiger nen Hanun tan saray manaayam ed Zanoa+ so Puerta na Lawak;+ impaalagey da itan tan inikdan da na saray kapot, talak, tan balewet, tan inapiger da so 1,000 kasiko* na padir ya anggad Puertay Bunton na Dapol.+
14 Si Malkias ya anak nen Recab, a prinsipe ed distrito na Bet-hakerem,+ so angapiger ed Puertay Bunton na Dapol; impaalagey to itan tan inikdan to na saray kapot, talak, tan balewet.
15 Si Salun ya anak nen Colhoza, a prinsipe ed distrito na Mizpa,+ so angapiger ed Puerta na Bobon;+ impaalagey to itan tan inatepan to, inikdan to na saray kapot, talak, tan balewet tan inapiger to met so padir na Tiponay-danum+ na Kanal paonlad Hardin na Ari+ ya anggad Takayan+ a palasur manlapud Syudad nen David.+
16 Say onsublay et si Nehemias ya anak nen Azbuk, a prinsipe ed kapaldua na distrito na Bet-zur,+ ya inapiger to so manlapud arap na Saray Ponponan nen David+ anggad samay artipisyal a tiponay-danum+ ya anggad Abung na Saray Makapanyari.
17 Say onsublay et saray Levita ya angapiger: si Rehum ya anak nen Bani; tan diad abay to, si Hasabias, a prinsipe ed kapaldua na distrito na Keila,+ ya angapiger parad distrito to.
18 Say onsublay et saray agagi ra ya angapiger: si Bavai ya anak nen Henadad, a prinsipe ed kapaldua na distrito na Keila.
19 Tan diad abay to, si Ezer ya anak nen Jesua,+ a prinsipe na Mizpa, so angapiger ed sananey nin parte diad arap na samay tatatdangan paonlad Panagsinopay-armas diad Pampasekder na Padir.+
20 Say onsublay et si Baruc ya anak nen Zabai,+ a maseseg a nankimey tan inapiger toy sananey nin parte, manlapud Pampasekder na Padir ya anggad lolooban na abung na atagey a saserdoten si Eliasib.+
21 Say onsublay et si Meremot+ ya anak nen Urias ya anak nen Hakoz, ya angapiger ed sananey nin parte, manlapud lolooban na abung nen Eliasib ya anggad sampot na abung to.
22 Tan say onsublay ya angapiger et saray saserdote, saray lalaki ed distrito na Jordan.*+
23 Say onsublay et si Benjamin tan si Hasub, ya angapiger ed samay walad arap na abung da. Tan say onsublay et si Azarias ya anak nen Maasias ya anak nen Ananias, ya angapiger ed samay walad asingger ed abung to.
24 Say onsublay et si Binui ya anak nen Henadad, ya angapiger ed sananey nin parte, manlapud abung nen Azarias anggad samay Pampasekder na Padir+ ya anggad suyok.
25 Say onsublay et si Palal ya anak nen Uzai, ya angapiger ed samay arap na Pampasekder na Padir tan tori ya akapaway manlapud Abung* na Ari,+ samay bandad tagey a walad abay na Sular na Guardia.+ Say onsublay et si Pedaias ya anak nen Paros.+
26 Tan saray lingkor ed templo*+ a manaayam ed Ofel+ et inapiger da so anggad arap na Puerta na Danum+ diad bukig tan say akalungdaw a tori.
27 Say onsublay et saray Tekoita+ ya angapiger ed sananey nin parte, manlapud arap na baleg a torin akalungdaw ya anggad padir na Ofel.
28 Samay walad bandad tagey na Puerta na Kabayo+ et inapiger na saray saserdote, a kada sakey et inapiger toy walad arap na abung to.
29 Say onsublay et si Zadok+ ya anak nen Imer, ya angapiger ed samay walad arap na abung to.
Tan say onsublay ya angapiger et si Semaias ya anak nen Secanias, a bantay na Puerta ed Bukig.+
30 Say onsublay et si Hananias ya anak nen Selemias tan si Hanun a komanem ya anak nen Zalaf, ya angapiger ed sananey nin parte.
Say onsublay et si Mesulam+ ya anak nen Berekias, ya angapiger ed samay walad petek na baleg a kuarto to.
31 Say onsublay et si Malkias a kaibad grupo na saray managpanday na balitok, ya angapiger anggad samay abung na saray lingkor ed templo*+ tan saray negosyante, samay walad arap na Puertan Panag-usisaan ya anggad tagey a kuarto ed suyok.
32 Tan samay walad baetan na tagey a kuarto ed suyok tan say Puerta na Saray Karnero+ et inapiger na saray managpanday na balitok tan saray negosyante.
Paimanod leksab
^ Odino “Indedika.”
^ Literal, “agda inyan so beklew da ed.”
^ Odino “na Trans-Eufrates.”
^ Odino “saray managgaway pabalingit.”
^ Odino “dinantal da na batobato.”
^ Odino “sinukat a parte.”
^ Manga 445 metro (1,460 piye). Nengnengen so Apendise B14.
^ Odino posiblin, “asingger a distrito.”
^ Odino “Palasyo.”
^ Odino “saray Netineo.” Literal, “saray inter a totoo.”
^ Odino “saray Netineo.” Literal, “saray inter a totoo.”
