Numeros 13:1-33
13 Oniay inkuan natan nen Jehova ed si Moises:
2 “Mangibaki kay lalaki a man-espiya* ed dalin na Canaan, ya iter kod saray Israelita. Mangibaki kay sakey a laki manlapud kada tribu na inmuunan atateng da, kada sakey et pangulo+ ed limog da.”+
3 Kanian imbaki ira nen Moises manlapud kalawakan na Paran+ diad ganggan nen Jehova. Amin iratan a lalaki et ulo ed saray Israelita.
4 Saraya so kangaranan da: manlapud tribu nen Ruben et si Samua ya anak nen Zacur;
5 manlapud tribu nen Simeon et si Safat ya anak nen Hori;
6 manlapud tribu nen Juda et si Caleb+ ya anak nen Jefune;
7 manlapud tribu nen Isacar et si Igal ya anak nen Jose;
8 manlapud tribu nen Efraim et si Hosea+ ya anak nen Nun;
9 manlapud tribu nen Benjamin et si Palti ya anak nen Rafu;
10 manlapud tribu nen Zebulon et si Gadiel ya anak nen Sodi;
11 manlapud tribu nen Jose,+ parad tribu nen Manases+ et si Gaddi ya anak nen Susi;
12 manlapud tribu nen Dan et si Amiel ya anak nen Gemali;
13 manlapud tribu nen Aser et si Setur ya anak nen Miguel;
14 manlapud tribu nen Neftali et si Nabi ya anak nen Vofsi;
15 manlapud tribu nen Gad et si Geuel ya anak nen Maki.
16 Saraya so kangaranan na saray lalakin imbaki nen Moises a man-espiya ed dalin. Tan inngaran nen Moises na Josue*+ si Hosea ya anak nen Nun.
17 Sanen imbaki ira nen Moises a man-espiya ed dalin na Canaan, inkuan tod sikara: “La kayo ed Negeb, insan kayo ontatdang ed mapalandey a rehyon.+
18 Nengneng yo no anton klase itan a dalin+ tan no kasin saray totoon manaayam diman et mabiskeg odino makapuy, daiset odino dakel,
19 tan no kasin say dalin et maong odino mauges tan no kasin saray syudad a panaayaman da et diad saray tolda odino apadiran.
20 Tan amtaen yo no kasin say dalin et mabuna* odino agmabuna,*+ tan no kasin wala ray kakiewan ditan odino anggapo. Manpakpel kayo+ tan mangala kayoy daiset a bunga na dalin.” Natan et panaon iman na saray unonan aluton bunga na ubas.+
21 Kanian linma ra tan nan-espiya rad dalin manlapud kalawakan na Zin+ ya anggad Rehob,+ ya asingger ed Lebo-hamat.*+
22 Sanen tinmatdang irad Negeb, akasabi rad Hebron+ a panaayaman na saray Anakim+ a di Ahiman, Sesai, tan Talmai.+ Say Hebron et pitoy taon lan nipaalagey antis na Zoan ed Ehipto.
23 Sanen akasabi rad Lawak* na Escol,+ amuter iray sanga a walaay sakey monil ya ubas, a kaukolan a sakbaten na duaran lalaki ed panamegley na tubo, ontan met ed daiset iran prutas a granada tan igos.+
24 Tinawag dan Lawak* na Escol*+ itan a pasen lapud monil a pinuter na saray Israelita ditan.
25 Diad pansampot na 40 agew+ et pinmawil ira manlapud impan-espiya ra ed dalin.
26 Kanian linma rad si Moises tan Aaron tan ed amin ya Israelita diad kalawakan na Paran, diad Kades.+ Impasabi ray balita ed amin a totoo tan impanengneng dad sikara so bunga na dalin.
27 Oniay imbalita rad si Moises: “Linmoob kami ed dalin ya angibakian mod sikami, tan tua a manag-agus diman so gatas tan dilo,+ tan saraya so bunga to.+
28 Balet mabibiskeg iray totoon manaayam diman, tan angkakabaleg iray apadiran a syudad da. Anengneng mi met diman iray Anakim.+
29 Saray Amalekita+ so manaayam diad dalin na Negeb,+ tan saray Heteo, Jebuseo,+ tan Amoreo+ so manaayam ed mapalandey a rehyon, tan saray Canaanita+ so manaayam ed abay na dayat+ tan diad gilig na Jordan.”
30 Diad saman et sinali nen Caleb a pakalmaen iray totoo ed arapan nen Moises diad impangibaga ton: “Ontatdang tayon tampol, tan seguradon nakayarian tayo iman, ta seguradon natalo tayo iman.”+
31 Balet oniay inkuan na saramay lalakin kaiba ton tinmatdang: “Agtayo nayarian a labanan iraman a totoo, lapud mabiskeg ira nen say sikatayo.”+
32 Tan nantultuloy iran angipasabi na mauges a balita+ ed saray Israelita nipaakar ed dalin a nan-espiyaan da, ya inkuan da: “Say dalin a nila min nan-espiyaan et sakey a dalin a mangaakmon ed saray manaayam diman, tan amin a totoon anengneng mi diman et lalakin nikadkadumay kabaleg da.+
33 Tan anengneng mi diman iray Nefilim, saray ananak nen Anak,+ a nanlapu rad* saray Nefilim, tan diad pakanengneng mi et singa tayo labat duron, ontan met so pakanengneng dad sikatayo.”
Paimanod leksab
^ Odino “manusisa.”
^ Odino “Jehosue,” a kabaliksan toy “Si Jehova so Kilalaban.”
^ Literal, “mabeng.”
^ Literal, “mataba.”
^ Odino “lolooban na Hamat.”
^ Odino “Kulos.”
^ Odino “Kulos.”
^ Kabaliksan toy “Monil na Saray Ubas.”
^ Odino “a kapolian na.”
