Numeros 15:1-41
-
Saray ganggan nipaakar ed panangiyapay (1-21)
-
Parehon ganggan parad saray niyanak ya Israelita tan dayon miaayam (15, 16)
-
-
Saray apay parad agginagalan kasalanan (22-29)
-
Dusa parad ginagalan kasalanan (30, 31)
-
Apapatey imay sinmumlang ed Sabaton (32-36)
-
Kargaay palaguygoy so saloy na saray kawes (37-41)
15 Onia ni inkuan nen Jehova ed si Moises:
2 “Mitongtong kad saray Israelita tan ibagam ed sikara, ‘Sano onloob kayo lad dalin ya iter kon panayaman yo,+
3 tan mangiyapay kayo na apay a pinoolan parad si Jehova manlapud saray baka odino karnero—balanglan apay a popoolan+ odino bagat pian manggaway nikabiig a sipan odino boluntaryon apay+ odino sakey ya apay legan na saray panaon na piesta yo,+ pian manggaway ambalingit* ya angob parad si Jehova+—
4 samay mangiyaapay et nepeg a mangiyapay met ed si Jehova na apay a kakanen a gawad pinon arina,+ kakaplo na sakey efa,* a nilaokay kakapat na sakey hin* a larak.
5 Nepeg a mangiyapay kayo met na alak bilang apay ya iinumen, kakapat na sakey hin, a kaiba na apay a popoolan+ odino bagat a kalakian a kordero.
6 Odino kaiba na sakey a kalakian a karnero et mangiyapay kayoy apay a kakanen, a duaran kakaplo na sakey sukat ya efa na pinon arina, a nilaokay kakatlo na sakey hin a larak.
7 Tan nepeg kayon mangiyapay na alak bilang apay ya iinumen, kakatlo na sakey hin, bilang ambalingit* ya angob parad si Jehova.
8 “‘Balet no mangiyapay kayoy kalakian a baka bilang apay a popoolan,+ odino sakey a bagat pian manggawa na nikabiig a sipan,+ odino saray bagat a pandurungoan parad si Jehova,+
9 mangiyapay kayo met na apay a kakanen,+ a taloran kakaplo na sakey sukat ya efa na pinon arina, a nilaokay kapaldua na sakey hin a larak a kaiba na kalakian a baka.
10 Mangiyapay kayo met na alak bilang apay ya iinumen,+ kapaldua na sakey hin, bilang apay a pinoolan, a walaay ambalingit* ya angob parad si Jehova.
11 Ontan so nepeg a gawaen parad kada kalakian a baka odino kada kalakian a karnero odino kada kalakian a kordero odino kanding.
12 Anggan pigaray iyapay yo, ontan so nepeg yon gawaen ed kada sakey, unong ed bilang da.
13 Ontan so nepeg a pangiyapay na balang sakey a niyanak ya Israelita ed apay ton pinoolan, bilang ambalingit* ya angob parad si Jehova.
14 “‘No samay dayon miaayam ed sikayo odino samay walad limog yo ed dakel la ran henerasyon yo et mangiyapay met na apay a pinoolan, bilang ambalingit* ya angob parad si Jehova, nepeg ton gawaen so singa gagawaen yo.+
15 Saksakey so ganggan a parad sikayo a kabiangan na kongregasyon tan say dayon miaayam ed sikayo. Satan et manbayag a ganggan parad amin a henerasyon yo. Say dayo et anggapoy pidumaan tod sikayo diad pakanengneng nen Jehova.+
16 Nepeg a saksakey so bilin tan saksakey so ganggan a parad sikayo tan parad dayon miaayam ed sikayo.’”
17 Onia ni inkuan nen Jehova ed si Moises:
18 “Mitongtong kad saray Israelita tan ibagam ed sikara, ‘Sano onloob kayo lad dalin a pangiyakaran kod sikayo,
19 tan mangan kayoy antokaman a tinapay* diad dalin,+ nepeg kayon mangiter na kontribusyon ed si Jehova.
20 Nepeg kayon mangiter na kontribusyon a magasal ya arinan nanlapud unona iran bunga+ a ginawan kurti-singsing iran tinapay. Say paraan na pangiter yod satan et singa say kontribusyon manlapud panag-ilikan.
21 Nepeg yon iter so arum ed saray magasal ya arina yo a nanlapud unona iran bunga bilang kontribusyon parad si Jehova diad amin a henerasyon yo.
22 “‘Natan, no makagawa kayoy lingo tan agyo nasumpal irayan amin a ganggan ya imbaga nen Jehova ed si Moises,
23 amin ya ingganggan nen Jehova ed sikayo ed panamegley nen Moises manlapud samay agew ya inter nen Jehova so ganggan a mantultuloy ya anggad onsublay iran henerasyon yo,
24 tan no ag-itan ginagala tan ag-amta na totoo, nepeg ya iyapay na amin a totoo so sakey a kilaw a kalakian a baka bilang apay a popoolan a walaay ambalingit* ya angob parad si Jehova, a kaiba na satan so apay a kakanen tan apay ya iinumen unong ed kaslakan lan gagawaen,+ tan sakey a kilaw a kanding bilang apay parad kasalanan.+
25 Manggaway pananakbong so saserdote parad amin ya Israelita, tan naperdona ra,+ lapud ag-itan ginagala, tan angiyakar ira na apay da a pinoolan parad si Jehova tan apay da parad kasalanan diad arapan nen Jehova, parad impakalingo ra.
26 Naperdona so amin ya Israelita tan say dayon miaayam ed limog da, ta ag-itan ginagala na totoo.
27 “‘No agginagalan makapankasalanan so siopaman a too,* sikatoy nepeg a mangiyapay na kabatyan a kanding a mantaon na sakey bilang apay parad kasalanan.+
28 Tan manggaway pananakbong so saserdote parad samay too* ya agto ginagalay nankasalanan ed si Jehova, pian makapanggaway pananakbong parad satan, tan sikatoy naperdona.+
29 Parad saray Israelita tan saray dayon miaayam ed limog yo, nepeg a walay saksakey a ganggan parad sikayo nipaakar ed saray agginagalan kasalanan.+
30 “‘Balet samay too* a gagalaen toy mankasalanan,+ balanglan sakey ya Israelita odino dayo, et mumudmoraen toy Jehova tan nepeg ya ekalen* ed kabaleyan to.
31 Lapud pinabanday toy salita nen Jehova tan sinumlang toy ganggan to, nepeg a pateyen itan a too.*+ Ebatan toy dilin kasalanan to.’”+
32 Legan a walad kalawakan iray Israelita, anengneng day sakey a toon mantitipon na kiew diad agew na Sabaton.+
33 Saramay akanengneng ed sikaton mantitipon na kiew so angiyakar ed sikato ed si Moises tan Aaron tan ed amin a totoo.
34 Sikatoy inkulong da+ lapud agni malinew ed ganggan no antoy manepeg a gawaen ed sikato.
35 Tan oniay inkuan nen Jehova ed si Moises: “Nepeg a pateyen itan a too,+ tan sikatoy tupaken na amin a totoo diad paway na kampo.”+
36 Kanian sikatoy inyakar na amin a totoo diad paway na kampo tan sikatoy tinupak da ya anggad inatey, unong ya ingganggan nen Jehova ed si Moises.
37 Onia ni inkuan nen Jehova ed si Moises:
38 “Mitongtong kad saray Israelita tan ibagam ed sikara a diad amin a henerasyon da et nepeg dan igawaan na palaguygoy iray saloy na kawes da, tan mangiyan iray asul a tinebey diad tagey na palaguygoy na saloy.+
39 ‘Nepeg a walay palaguygoy yo pian nanengneng yo itan tan nanonotan yoy amin a ganggan nen Jehova tan sumpalen yo iratan.+ Agyo uunoren so dilin puso tan mata yo, a mangitonton ed sikayo ed espiritual a prostitusyon.+
40 Ontulong iyan mangipanonot ed sikayo pian sumpalen yoy amin a ganggan ko tan magmaliw kayon masanto parad Dios yo.+
41 Siak si Jehova a Dios yo, ya angipaway ed sikayo diad dalin na Ehipto pian magmaliw ak a Dios yo.+ Siak si Jehova a Dios yo.’”+
Paimanod leksab
^ Odino “makapakepay liknaan; makapakalmay liknaan.” Literal, “makapainawa.”
^ Say kakaplo na sakey ya efa et 2.2 litro. Nengnengen so Apendise B14.
^ Say sakey a hin et 3.67 litro. Nengnengen so Apendise B14.
^ Odino “makapakepay liknaan; makapakalmay liknaan.” Literal, “makapainawa.”
^ Odino “makapakepay liknaan; makapakalmay liknaan.” Literal, “makapainawa.”
^ Odino “makapakepay liknaan; makapakalmay liknaan.” Literal, “makapainawa.”
^ Odino “makapakepay liknaan; makapakalmay liknaan.” Literal, “makapainawa.”
^ Odino “kakanen.”
^ Odino “makapakepay liknaan; makapakalmay liknaan.” Literal, “makapainawa.”
^ Odino “kamarerwa.”
^ Odino “kamarerwa.”
^ Odino “kamarerwa.”
^ Odino “pateyen.”
^ Odino “kamarerwa.”
