Numeros 16:1-50
16 Insan si Kora+ ya anak nen Izhar,+ ya anak nen Kohat,+ ya anak nen Levi,+ et akikasakey ed si Datan tan Abiram ya ananak nen Eliab,+ tan si On ya anak nen Peleth, ya ananak nen Ruben.+
2 Nankakasakey ira pian onsumpad si Moises, a kaiba ray 250 lalakin Israelita, saray papangulo na totoo, saray pinili ed kongregasyon, bantog a lalaki.
3 Kanian nantitipon iran sinmumpad+ si Moises tan Aaron tan inkuan dad sikara: “Nalalabas ki la! Masanto lay amin a totoo,+ tan walad pegley da si Jehova.+ Akin et iyaatagey yoy sarili yo diad kongregasyon nen Jehova?”
4 Sanen nadngel iya nen Moises, sikatoy tampol a dinmakmomo.
5 Insan inkuan tod si Kora tan ed amin ya onsusuporta ed sikato: “Diad kaimbuasan et ipaamta nen Jehova no siopay kayarian to+ tan no siopay masanto tan no siopay nepeg ya onasingger ed sikato,+ tan siopaman a pilien to+ et sikatoy onasingger ed sikato.
6 Gawa yo iya: Mangala kayoy kargaan na ngalab,+ sika Kora tan amin ya onsusuporta ed sika,+
7 tan nabuas et ikdan yoy apoy iratan tan mangiyan kayoy insenso ed saratan diad arapan nen Jehova, tan say lakin pilien nen Jehova+ so masanto. Nalalabas ki lan ananak nen Levi!”+
8 Insan inkuan nen Moises ed si Kora: “Dengel kayo, ipangasi yo, sikayo ran ananak nen Levi.
9 Baliwala tad sikayo ya imbiig kayoy Dios na Israel manlapud amin ya Israelita+ tan inabuloyan to kayon onasingger ed sikato pian makapanlingkor kayod tabernakulo nen Jehova tan makaalagey kayod arapan na totoo ta pian manlingkor ed sikara,+
10 tan inyasingger to ka ed sikato a pati amin ya agagim ya ananak nen Levi a kaibam? Labay yo ta met ya alaen so inkasaserdote?+
11 Lapud saya, sika tan say amin a nantitipon ya onsusuporta ed sika et onsusumpa ed si Jehova. Balet, siopa ta si Aaron pian manmeremere kayo sumpad sikato?”+
12 Diad saginonor et impatawag nen Moises si Datan tan si Abiram+ ya ananak nen Eliab, balet inkuan da: “Agkami onla!
13 Baliwala tay impangipaway mod sikami ed dalin a manag-agus so gatas tan dilo pian ompatey kami diad kalawakan?+ Natan et labay mo kami met a sigpot ya uleyan?*
14 Diad tua et agmo kami inyakar ed inerman a dalin a manag-agus so gatas tan dilo+ odino inter ed sikami so tawir min uma tan kaubasan. Labay mo kasin sukiten so kamataan na sarayan lalaki? Agkami onla!”
15 Kanian nampasnok a maong si Moises tan inkuan tod si Jehova: “Agmo iimanoen so apay dan kakanen. Anggapoy anggan sakey ya asno ya inalak ed sikara, tan agko sinakitan so anggan sakey ed sikara.”+
16 Insan inkuan nen Moises ed si Kora: “Nabuas, la kad arapan nen Jehova a kaibam so amin ya onsusuportad sika, on, sika tan sikara tan si Aaron.
17 Nepeg ya awiten na balang sakey so kargaan toy ngalab tan ikdan toy insenso itan, tan iyakar na balang sakey so kargaan toy ngalab diad arapan nen Jehova, 250 kargaan na ngalab, pati sika tan si Aaron, awiten na balang sakey so kargaan toy ngalab.”
18 Kanian inala na balang sakey so kargaan toy ngalab, tan inikdan da itan na apoy tan insenso, tan inmalagey irad lolooban na tolda a pantitiponan a pati si Moises tan Aaron.
19 Sanen atipon nen Kora iray onsusuportad sikato+ pian onsumpad sikara diad lolooban na tolda a pantitiponan, pinmatnag so gloria nen Jehova ed amin a totoon nantitipon.+
20 Inkuan natan nen Jehova ed si Moises tan Aaron:
21 “Biig kayod sayan grupo, pian upoten ko rad sankasikmat.”+
22 Diad saya et dinmakmomo rad dalin tan inkuan da: “O Dios, say Dios a panlalapuan na espiritu na amin a totoo,*+ kasin onsanok kad amin a totoo lapud kasalanan na sakey a too?”+
23 Insan oniay inkuan nen Jehova ed si Moises:
24 “Mitongtong kad saray totoo tan ibagam ed sikara, ‘Arawian yo ray tolda di Kora, Datan, tan Abiram!’”+
25 Insan linmay Moises ed si Datan tan Abiram, tan akilad sikato ray mamatatken+ na Israel.
26 Inkuan tod saray totoo: “Ipangasi yo, arawian yo ray tolda na sarayan mauges a lalaki tan agyo didiwiten so antokaman a kayarian da, pian agkayo naderal lapud amin a kasalanan da.”
27 Tampol dan inarawian iray tolda di Kora, Datan, tan Abiram, manlapud amin a diking, tan pinmaway si Datan tan Abiram, nanalagey irad lolooban na saray tolda ra, a pati saray kaasawaan da, tan saray ananak da.
28 Insan inkuan nen Moises: “Diad saya et naamtaan yon imbaki ak nen Jehova pian gawaen irayan amin a bengatla, ya agnanlapud dilin pusok:*
29 No sarayan totoo et ompatey a singa ed kaslakan ya ipapatey na amin a totoo, tan no say dusa ra et mipara ed amin a katooan, diad ontan et agak imbaki nen Jehova.+
30 Balet no makapakelaw a bengatla so gawaen nen Jehova ed sikara, tan onsangi so dalin tan akmonen to ra pati say amin a kayarian da tan onlasur iran mabilay diad Lubok,* naamtaan yon sarayan totoo et agda nirespeto si Jehova.”
31 Kapangibaga tod saya, sinmangi so dalin ya akaalageyan da.+
32 Tan sinmangi so dalin tan inakmon to ra, pati saray sankaabungan da tan amin a kaiba nen Kora+ tan amin a kayarian da.
33 Kanian sikara tan amin a kaiba ra et naplag a mabilay ed Lubok,* tan atabonan ira na dalin, kanian naandi rad pegley na kongregasyon.+
34 Binmatik so amin ya Israelita a walad liber da lapud paneyag da, ta inkuan da: “Natatakot kami ompan akmonen kami na dalin!”
35 Insan walay apoy a pinmaway a nanlapud si Jehova+ tan inupot toy 250 lalakin mangiyaapay na insenso.+
36 Inkuan natan nen Jehova ed si Moises:
37 “Ibagam ed si Eleazar ya anak nen Aaron a saserdote ya ekalen tod apoy iramay kargaan na ngalab,+ ta masanto iraman. Ibagam met ed sikato ya itayak to so apoy diad bandad arawi.
38 Saray kargaan na ngalab na lalakin nankasalanan a sengegay impakabalang dad bilay da* et nepeg a pagmaliwen a maimpis iran metal ya ibalkot ed altar,+ ta inyakar da iratan ed arapan nen Jehova, tan nagmaliw iratan a masanto. Onkana iratan a tanda parad saray Israelita.”+
39 Kanian inala nen Eleazar a saserdote iray gansan kargaan na ngalab ya inyakar na saramay apoolan, tan pinitpit da iratan pian ibalkot ed altar,
40 unong ya imbaga nen Jehova ed sikato diad panamegley nen Moises. Sakey itan a panonot ed saray Israelita, ya anggapoy toon agmakanepegan* tan aliwan ilalak nen Aaron a nepeg ya onasingger pian mamool na insenso diad arapan nen Jehova,+ pian anggapoy siopaman a magmaliw a singa si Kora tan saramay sinmuporta ed sikato.+
41 Diad tinmumbok ya agew et nanmeremere so amin ya Israelita ed si Moises tan Aaron,+ ya inkuan dan: “Sikayon dua so amatey ed saray totoo nen Jehova.”
42 Sanen nantitipon iray totoo pian onsumpad si Moises tan Aaron, linmingaw irad tolda a pantitiponan, tan anengneng dan sinakbongan itan na lurem, tan pinmatnag so gloria nen Jehova.+
43 Tan linmay Moises tan Aaron ed arap na tolda a pantitiponan,+
44 tan oniay inkuan nen Jehova ed si Moises:
45 “Sikayon lalaki, ekal kayod sarayan totoo, pian upoten ko rad sankasikmat.”+ Diad saman et dinmakmomo rad dalin.+
46 Insan oniay inkuan nen Moises ed si Aaron: “Mangala kay kargaan na ngalab tan ikdan moy apoy a manlapud altar+ tan ikdan moy insenso tan la kan tampol ed saray totoo tan manggawa kay pananakbong parad sikara,+ ta mandarlang so sanok nen Jehova. Ginmapo lay salot!”
47 Inalan tampol itan nen Aaron, unong ya imbaga nen Moises, tan binmatik ed pegley na kongregasyon, tan anengneng ton ginmapo lay salot ed limog na totoo. Kanian inyan toy insenso ed kargaan na ngalab tan nanggaway pananakbong parad saray totoo.
48 Sikatoy nansiansian akaalagey ed baetan na saray inatey tan mabilay, tan tinmundan siansia so salot.
49 Say bilang na saramay inatey ed salot et 14,700, likud nid saramay inatey lapud si Kora.
50 Tinmunda lay salot sanen akapawil lay Aaron ed si Moises diad lolooban na tolda a pantitiponan.
Paimanod leksab
^ Odino “labay mo met so magmaliw a katawan mi?”
^ Literal, “saray espiritu na amin a laman.”
^ Odino “dilin panlabayan ko.”
^ Odino “nankasalanan ed dilin kamarerwa ra.”
^ Literal, “anggapoy estranghero.”
