Numeros 19:1-22
-
Say ambalangan baka tan say danum a panaglinis (1-22)
19 Oniay inkuan lamet nen Jehova ed si Moises tan Aaron:
2 “Saya so ganggan ya inter nen Jehova, ‘Ibagam ed saray Israelita ya iyalaan da kay andiay depekton ambalangan baka+ tan anggapo ni pako a nipasakbat ed satan.
3 Iter yo itan ed si Eleazar a saserdote, tan ipaway tod kampo tan pakgeran itan ed arapan to.
4 Insan mangala si Eleazar a saserdote na daiset a dala na satan ed panamegley na gamet to tan maminpito ton iwalsik diad arap na tolda a pantitiponan.+
5 Insan poolan so baka diad arapan to. Poolan so katat tan karne tan dala pati say dutak na satan.+
6 Tan mangala so saserdote na tabla a sedro,+ tanaman a hisopo, tan ambalbalangan tinebey, tan ibuntok to iratan ed apoy a pamoolan ed baka.
7 Insan ipesak na saserdote iray kawes to tan amesen toy sarili to,* tan kayari na satan et nayarian to lay onloob ed kampo; balet say saserdote et agmalinis ya anggad labi.
8 “‘Samay amool ed baka et ipesak to iray kawes to tan amesen toy sarili to,* tan sikatoy magmaliw ya agmalinis ya anggad labi.
9 “‘Tiponen na sakey a malinis a too so dapol na samay baka+ tan iyan to iratan ed paway na kampo diad malinis a pasen, tan nepeg ya isinop iratan na saray Israelita pian ilaok dad danum ya usaren ed panaglinis.+ Sakey itan ya apay parad kasalanan.
10 Samay manitipon ed dapol na baka et ipesak to iray kawes to tan magmaliw ya agmalinis ya anggad labi.
“‘Saya et onkanan manbayag a ganggan parad saray Israelita tan dayon manaayam ed pegley da.+
11 Siopaman a maniwit ed inatey a too* et magmaliw ya agmalinis ed loob na pitoy agew.+
12 Nepeg ton linisay sarili to ed panamegley na samay danum* diad komatlon agew, tan sikatoy magmaliw a malinis ed komapiton agew. Balet no agto linisay sarili to diad komatlon agew, sikatoy mansiansian agmalinis ed komapiton agew.
13 Siopaman a maniwit ed bangkay na too* tan agto linisay sarili to et pinabanday to so tabernakulo nen Jehova,+ tan nepeg ya ekalen* itan a too* ed Israel.+ Lapud agniwalsik ed sikato so danum a panaglinis,+ sikatoy mantultuloy ya agmalinis. Mansiansia ed sikato so agto inkamalinis.
14 “‘Saya so ganggan ya onaplika sano ompatey so sakey a too diad loob na tolda: Siopaman ya onloob ed tolda tan siopaman a dati lan walad loob na tolda et magmaliw ya agmalinis ed loob na pitoy agew.
15 Amin a pananginan ya akalukas tan andiay nibedber a sakob et agmalinis.+
16 Siopaman a walad uma ya aniwit ed sakey ya inatey ed espada odino sakey a bangkay odino pukel na too odino sakey a ponponan et magmaliw ya agmalinis ed loob na pitoy agew.+
17 Nepeg dan iyalaan imay agmalinis na daiset a dapol na pinoolan ya apay parad kasalanan tan ikarga dad sakey a pananginan insan da kalboay danum a nanlapud subol.
18 Insan sakey a malinis a too+ so mangala na tanaman a hisopo+ tan ilebleb tod samay danum tan iwalsik tod tolda tan ed amin a pananginan tan ed saray totoo* a wadtan tan ed samay aniwit na pukel, toon pinatey, bangkay, odino ponponan.
19 Iwalsik itan na samay malinis a too ed samay agmalinis a too diad komatlon agew tan ed komapiton agew, tan linisan tod kasalanan diad komapiton agew;+ insan ipesak na samay agmalinis a too iray kawes to tan manames, tan sikatoy magmaliw a malinis diad labi.
20 “‘Balet say toon agmalinis tan agto linisay sarili to, satan a too* et nepeg ya ekalen* ed kongregasyon,+ ta pinabanday to so santuaryo nen Jehova. Agniwalsik ed sikato so danum a panaglinis, kanian sikatoy agmalinis.
21 “‘Saya et onkanan manbayag a ganggan parad sikara: Samay mangiwalsik na danum a panaglinis+ et nepeg ton ipesak iray kawes to, tan samay maniwit ed danum a panaglinis et magmaliw ya agmalinis ya anggad labi.
22 Antokaman a diwiten na samay agmalinis et magmaliw ya agmalinis, tan samay too* ya aniwit ed satan et magmaliw ya agmalinis ya anggad labi.’”+
Paimanod leksab
^ Literal, “laman to.”
^ Literal, “laman to.”
^ Literal, “satan.”
^ Odino “kamarerwa.”
^ Odino “pateyen.”
^ Odino “saray kamarerwa.”
^ Odino “kamarerwa.”
^ Odino “pateyen.”
^ Odino “kamarerwa.”
