Numeros 21:1-35
21 Sanen say Canaanitan ari na Arad,+ a manaayam ed Negeb, et nadngelan ton sinmabi so Israel diad dalan na Atarim, inataki to so Israel tan inerel to so arum ed sikara.
2 Kanian oniay insipan na Israel ed si Jehova: “No iyawat mod limak irayan totoo, deralen ko iray syudad da.”
3 Diad saman et dinengel nen Jehova so Israel tan inyawat tod sikara iray Canaanita, tan dineral da ra tan saray syudad da. Kanian satan a pasen et inngaran day Horma.*+
4 Legan a manbiabiahe ra manlapud Palandey Hor+ diad dalan a mamaarap ed Ambalangan Dayat pian onliber irad dalin na Edom,+ ag-akaanos so totoo* ed biahe.
5 Tan agtinmundan nansalita iray totoo sumpad Dios tan si Moises,+ ya inkuan da: “Akin et impaway yo kamid Ehipto pian ompatey ed kalawakan? Anggapoy naakan tan danum,+ tan onsasawa* kami la* ed sayan makapataman tinapay.”+
6 Lapud satan et inyakar nen Jehova ed saray totoo iray madita* ya uleg, tan kineketket da ra, kanian amayamay ya Israelita so inatey.+
7 Kanian linmad si Moises iray totoo tan inkuan da: “Nankasalanan kami diad impansalita mi sumpad si Jehova tan sumpad sika.+ Mikasi kad si Jehova pian ekalen to ray uleg.” Kanian akikasi si Moises parad saray totoo.+
8 Insan inkuan nen Jehova ed si Moises: “Manggawa kay bengatlan kaparpara na madita* ya uleg tan iyan mo itan ed sakey a palitek. Insan no walay aketket, sikatoy nepeg ya onnengneng ed satan pian manbilay.”
9 Nanggawan tampol si Moises na gansan uleg+ tan inyan to itan ed palitek,+ tan sano naketket na uleg so sakey a too tan onnengneng ed gansan uleg, sikatoy nabilay.+
10 Kayari na satan et binmuat iray Israelita tan nankampo rad Obot.+
11 Insan ira tinmaynan ed Obot tan nankampo rad Iye-abarim,+ diad kalawakan ya akaarap ed Moab, diad bandad bukig.
12 Manlapud man et binmuat ira tan nankampo rad Lawak* na Zered.+
13 Manlapud man et binmuat ira tan nankampo rad rehyon na Arnon,+ a walad kalawakan ya anggad ketegan na saray Amoreo, ta say Arnon so ketegan na Moab, diad baetan na Moab tan saray Amoreo.
14 Kanian asalita ed libro na Saray Guerra nen Jehova so “Vaheb diad Sufa tan saray lawak* na Arnon,
15 tan say palasur* ed saray lawak,* ya anggad panaayaman na Ar tan abay na ketegan na Moab.”
16 Insan linma rad Beer. Saya imay bobon a tinukoy nen Jehova sanen inkuan tod si Moises: “Tipon mo ray totoo, ta ikdan ko ra na danum.”
17 Diad saman et oniay inkansion na Israel:
“Onsubol ka, O bobon!—Ebatan* yo itan!
18 Say bobon a kinotkot na saray prinsipe, a kinotkot na saray gagalangen a totoo,Diad panamegley na baston na manuley tan saray dilin baston da.”
Insan manlapud kalawakan et linma rad Matana,
19 manlapud Matana et linma rad Nahaliel, tan manlapud Nahaliel et linma rad Bamot.+
20 Manlapud Bamot et linma ra ed lawak a walad teritorya* na Moab,+ diad toktok na Pisga,+ a sankabantag ditan so Jesimon.*+
21 Natan et angibaki na saray mensahero so Israel ed si Sihon ya ari na saray Amoreo, ya inkuan to:+
22 “Padalan mo kami pad dalin mo. Agkami onsamar ed uma odino kaubasan. Agkami oninum na danum ed dinanman a bobon. Manakar kamid Dalan na Ari ya anggad makalampas kami ed teritoryam.”+
23 Balet ag-inabuloyan nen Sihon ya ondalan so Israel diad teritorya to. Imbes, tinipon nen Sihon so amin a totoo to tan pinmaway ira pian onsumpad Israel diad kalawakan tan sinmabi rad Jahaz tan akilaban irad Israel.+
24 Balet sikatoy tinalo na Israel ed panamegley na espada+ tan inala ray dalin to+ manlapud Arnon+ ya anggad Jabok,+ ya asingger ed saray Ammonita, balet ag-ira linmampas ed Jazer,+ ta satan so ketegan na teritorya na saray Ammonita.+
25 Kanian inala na Israel irayan amin a syudad, tan nanayam irad amin a syudad na saray Amoreo,+ diad Hesbon tan ed amin ya angkekelag* a baley na satan.
26 Ta say Hesbon et syudad nen Sihon ya ari na saray Amoreo, ya akilaban nensaman ed ari na Moab tan inala ton amin so dalin to ya anggad Arnon.
27 Satan so sengegay inkiwala na onian balikas a panagkantiaw:
“Gali diad Hesbon.
Komon ta nipaalagey tan niletneg a malet so syudad nen Sihon.
28 Ta pinmaway so apoy ed Hesbon, sakey a dalang na apoy manlapud baley nen Sihon.
Inupot to so Ar na Moab, saray katawan na atagey iran pasen na Arnon.
29 Pakaskasi ka la, Moab! Naderal kayo, O totoo nen Kemos!+
Saray ananak ton lalaki et pagmaliwen ton takas tan saray ananak ton bibii et pagmaliwen ton aripen nen Sihon, say ari na saray Amoreo.
30 Panaen tayo ra;Naderal so Hesbon ya anggad Dibon;+Deralen tayo itan ya anggad Nofa;Ontayak so apoy ya anggad Medeba.”+
31 Kanian nanayam so Israel ed dalin na saray Amoreo.
32 Insan angibaki si Moises na pigaran lalaki a man-espiya ed Jazer.+ Diad saman et asakop da ray angkekelag* a baley na satan tan pinataynan da ray Amoreo a wadtan.
33 Kayari na satan et amaarap ira ed Dalan na Basan. Tan pinmaway si Og+ ya ari na Basan a kaibay amin a totoo to, pian miguerrad sikara diad Edrei.+
34 Inkuan nen Jehova ed si Moises: “Agka natatakot ed sikato,+ ta sikatoy iyawat kod limam,+ pati amin a totoo to tan say dalin to, tan gawam ed sikato so singa ginawam ed si Sihon ya ari na saray Amoreo, a nanayam nensaman ed Hesbon.”+
35 Kanian sikatoy pinatey da, pati saray ananak to tan amin a totoo to, anggapoy akaliktar ed saray totoo to,+ tan inala ray dalin to.+
Paimanod leksab
^ Kabaliksan toy “Pangigana ed Kadederal.”
^ Odino “nadidimla.”
^ Odino “onsasawa lay kamarerwa mi.”
^ Odino “mangapoy-apoy.”
^ Odino “mangapoy-apoy.”
^ Odino “Kulos.”
^ Odino “kulos.”
^ Literal, “sangi.”
^ Odino “kulos.”
^ Odino “Kansionan.”
^ Literal, “uma.”
^ Odino posiblin, “desierto; kalawakan.”
^ Odino “walad kaliberliber.”
^ Odino “walad kaliberliber.”
