Numeros 32:1-42
-
Saray nanayaman ed bukig na Jordan (1-42)
32 Natan, saray ananak nen Ruben+ tan ananak nen Gad+ et dakdakel so ayayep da, tan anengneng dan maabig a pasen parad ayayep so dalin na Jazer+ tan dalin na Gilead.
2 Kanian sarayan ananak nen Gad tan ananak nen Ruben et inmasingger ed si Moises, Eleazar a saserdote, tan ed saray papangulo na totoo tan inkuan da:
3 “Say Atarot, Dibon, Jazer, Nimra, Hesbon,+ Eleale, Sebam, Nebo,+ tan Beon,+
4 say dalin a tinalo nen Jehova ed arapan na amin ya Israelita,+ et maabig a dalin parad saray ayayep, tan dakerakel so ayayep na saray lingkor mo.”+
5 Intuloy dan inkuan: “No agamoran mi so panangabobon mo, saya la komon so dalin a niiter ed saray lingkor mo bilang sakey a kayarian. Agmo kami la pababaliwen ed Jordan.”
6 Insan inkuan nen Moises ed saray ananak nen Gad tan ananak nen Ruben: “Kasin saray agagi yo so onlan miguerra legan a manaayam kayo dia?
7 Akin et dismayaen yo iray totoo na Israel diad ibaliw da ed dalin a seguradon iter nen Jehova ed sikara?
8 Ontan so ginawa na saray kaamaan yo sanen imbakik ira manlapud Kades-barnea pian nengnengen so dalin.+
9 Sanen tinmatdang ira diad Lawak* na Escol+ tan anengneng da so dalin, dinismaya da iray totoo na Israel ya onloob ed dalin ya iter nen Jehova ed sikara.+
10 Dinmalang so sanok nen Jehova ed saman ya agew kanian insamba ton:+
11 ‘Saray lalakin pinmaway ed Ehipto a mantaon na 20 a patagey et agda nanengneng so dalin+ ya insipan kod si Abraham, Isaac, tan Jacob,+ lapud agda ak tinumbok diad interon puso ra—
12 nilikud ed si Caleb+ ya anak nen Jefune a Kenizeo tan si Josue+ ya anak nen Nun, lapud tinumbok day Jehova diad interon puso ra.’+
13 Kanian dinmalang so sanok nen Jehova ed Israel tan impanakar-akar to ra ed kalawakan diad loob na 40 taon,+ anggad angangga so amin a henerasyon a nanggaway kaugsan diad pakanengneng nen Jehova.+
14 Natan et sikayo so sinmalat ed saray kaamaan yo bilang ananak na makasalanan a totoo pian onloor so mandarlang a sanok nen Jehova ed Israel.
15 No agkayo ontumbok ed sikato, seguradon taynan to ra lamet diad kalawakan, tan naderal iyan amin a totoo lapud sikayo.”
16 Inmasingger ira lamet ed sikato tan inkuan da: “Abuloyan mo kamin mangipaalagey dia na saray pukokan a gawad bato parad saray ayayep mi tan saray syudad parad saray ananak mi.
17 Balet siansian manparaan kami parad guerra+ tan onla kamid unaan na saray Israelita ya anggad niyakar mi ra ed pasen da, legan a manaayam iray ananak mi diad saray apadiran a syudad ya arawi ed saray manaayam ed dalin.
18 Agkami ompawil ed saray kaabungan mi ya anggad naawat na kada sakey ed saray Israelita so dalin to bilang sakey a tawir.+
19 Ta agkami mangawat na tawir diad nibaliw na Jordan tan diad lampas nid satan, lapud naawat mi lay tawir mi diad sayan bukig a pagpag na Jordan.”+
20 Inmebat si Moises ed sikara: “No gawaen yo iya: Mila kayon miguerra parad si Jehova;+
21 tan no amin yo et ombaliw ed Jordan diad arapan nen Jehova pian mila kayon miguerra, sano pataynanen tod arapan to iray kakabusol to+
22 anggad nasakop so dalin diad tulong nen Jehova,+ insan nayarian yo lay ompawil+ tan nibulos kayo lad kasalanan diad arapan nen Jehova tan Israel. Diad satan et magmaliw a kayarian yo iyan dalin diad arapan nen Jehova.+
23 Balet no agyo iya gawaen, mankasalanan kayod si Jehova. Diad satan et amtaen yo ya ebatan yo so kasalanan yo.
24 Kanian nayarian yoy mangipaalagey na saray syudad parad saray ananak yo tan saray pukokan parad saray pulok yo,+ balet nepeg yon gawaen so insipan yo.”
25 Oniay inkuan na saray ananak nen Gad tan ananak nen Ruben ed si Moises: “Gawaen na saray lingkor mo so unong ed ingganggan na katawan mi.
26 Manayam iray ananak mi, kaasawaan mi, tan amin ya ayayep mi diman ed saray syudad na Gilead,+
27 balet ombaliw iray lingkor mo, amin a lalakin akaparaan ed guerra pian milaban diad arapan nen Jehova,+ unong ya imbaga na katawan mi.”
28 Kanian say ganggan nipaakar ed sikara et inter nen Moises ed si Eleazar a saserdote, ed si Josue ya anak nen Nun, tan ed saray lider na saray pamilya na saray tribu na Israel.
29 Inkuan nen Moises ed sikara: “No miulop ed sikayo iray ananak nen Gad tan ananak nen Ruben diad ibaliw ed Jordan, amin a lalakin akaparaan a miguerra diad arapan nen Jehova, tan nasakop yo so dalin, nepeg yon iter ed sikara so dalin na Gilead bilang kayarian da.+
30 Balet no ag-ira milan miguerra tan miulop ed sikayo ya ombaliw, manayam irad limog yo diad dalin na Canaan.”
31 Diad saya et oniay inyebat na saray ananak nen Gad tan ananak nen Ruben: “Gawaen mi no antoy imbaga nen Jehova ed saray lingkor mo.
32 Mila kamin miguerra diad arapan nen Jehova tan ombaliw kami a paarap ed dalin na Canaan,+ balet say tawir a nakayarian mi et diad sayan pagpag na Jordan.”
33 Kanian inter nen Moises ed sikara—saray ananak nen Gad, saray ananak nen Ruben,+ tan ed kapalduan tribu nen Manases+ ya anak nen Jose—so panarian nen Sihon+ ya ari na saray Amoreo tan say panarian nen Og+ ya ari na Basan, say dalin a kabiangan na saray syudad a walad saraman a teritorya, tan saray syudad ed akapaliber a dalin.
34 Tan impaalagey* na saray ananak nen Gad so Dibon,+ Atarot,+ Aroer,+
35 Atrot-sofan, Jazer,+ Jogbeha,+
36 Bet-nimra,+ tan Bet-haran,+ saray apadiran a syudad, tan nanggawa ra na saray pukokan a gawad bato parad saray pulok.
37 Tan impaalagey na saray ananak nen Ruben so Hesbon,+ Eleale,+ Kiriataim,+
38 Nebo,+ tan Baal-meon+—asalatan so kangaranan na saratan—tan Sibma; tan sinalatan da ray ngaran na syudad ya impaalagey da lamet.
39 Amaarap iray ananak nen Makir+ ya anak nen Manases ed Gilead tan sinakop da itan tan pinataynan da iray Amoreo a wadtan.
40 Kanian inter nen Moises so Gilead ed si Makir ya anak nen Manases, tan ditan so nanayaman to.+
41 Tan amaarap si Jair ya anak nen Manases ed sikara tan sinakop to ray baryo ra a kawalaan na saray tolda, tan tinawag to iratan a Havot-jair.*+
42 Tan amaarap si Noba ed Kenat tan sinakop to itan tan saray angkekelag* a baley na satan, tan tinawag to itan ed dilin ngaran to a Noba.
Paimanod leksab
^ Odino “Kulos.”
^ Odino “impaalagey lamet.”
^ Kabaliksan toy “Saray Baryo nen Jair a Kawalaan na Saray Tolda.”
^ Odino “walad kaliberliber.”
