Numeros 34:1-29
34 Tan onia ni inkuan nen Jehova ed si Moises:
2 “Saraya so bilin ya iter mod saray Israelita: ‘Sano onloob kayod dalin na Canaan,+ saya so dalin a niiter ed sikayo bilang sakey a tawir, say dalin na Canaan unong ed saray ketegan to.+
3 “‘Say ketegan yo ed bandad abalaten et manlapud kalawakan na Zin diad abay na Edom, tan say ketegan yo ed abalaten diad bandad bukig et manlapud sampot na Dayat na Asin.*+
4 Manguman so direksion na ketegan yo ya ondalan ed patatdang na Akrabim+ tan ontuloy ed Zin, tan manampot diad abalaten na Kades-barnea.+ Insan onsabi itan ed Hazar-adar+ tan ontuloy ed Azmon.
5 Manguman ed Azmon so direksion na ketegan a mamaarap ed Kulos* na Ehipto, tan manampot ed Dayat.*+
6 “‘Say ketegan yod bandad sagur et say baybay na Baleg a Dayat.* Satan so magmaliw a ketegan yod sagur.+
7 “‘Natan et saya so ketegan yo ed amianen: Manlapud Baleg a Dayat et markaan yo so ketegan yo ya anggad Palandey Hor.
8 Manlapud Palandey Hor et markaan yo so ketegan ya anggad Lebo-hamat,*+ tan manampot so ketegan diad Zedad.+
9 Tan onsabi so ketegan anggad Zifron, tan manampot ed Hazar-enan.+ Satan so magmaliw a ketegan yo ed amianen.
10 “‘Insan nepeg yon markaan bilang ketegan yo ed bukig so manlapud Hazer-enan ya anggad Sefam.
11 Say ketegan et manlapud Sefam ya anggad Ribla diad bukig na Ain, tan mamaleksab so ketegan tan ombaliw ed saray pukdol ed bandad bukig na Dayat na Kineret.*+
12 Say ketegan et onnatnat ya anggad Jordan, tan manampot ed Dayat na Asin.+ Satan so magmaliw a dalin yo+ tan saray ketegan ed paliber na satan.’”
13 Kanian binilin nen Moises iray Israelita, ya inkuan to: “Saya so dalin ya apagen yo bilang kayarian yo diad panamegley na pampapalaranan,+ unong ya ingganggan nen Jehova ya iter ed siamera tan kapalduan tribu.
14 Ta say tribu na saray Rubenita unong ed pamilya na kaamaan da, say tribu na saray Gadita unong ed sankaabungan na patriarka ra, tan say kapaldua ed tribu nen Manases, et inala da lay tawir da.+
15 Inala la na duara tan kapalduan tribu so tawir da ed bandad bukig na rehyon na Jordan ya asingger ed Jerico, diad bubutayan na agew.”+
16 Onia ni inkuan nen Jehova ed si Moises:
17 “Saraya so kangaranan na lalaki a mangapag ed dalin a nakayarian yo: si Eleazar+ a saserdote tan si Josue+ ya anak nen Nun.
18 Tan ipila yoy sakey a pangulo manlapud kada tribu pian ontulong a mangapag ed dalin bilang tawir yo.+
19 Saraya so kangaranan na lalaki: manlapud tribu nen Juda+ et si Caleb+ ya anak nen Jefune;
20 manlapud tribu na saray ananak nen Simeon+ et si Semuel ya anak nen Amihud;
21 manlapud tribu nen Benjamin+ et si Elidad ya anak nen Kislon;
22 manlapud tribu na saray ananak nen Dan+ et sakey a pangulo, salanti, si Buki ya anak nen Jogli;
23 diad saray ananak nen Jose+ manlapud tribu na saray ananak nen Manases+ et sakey a pangulo, salanti, si Haniel ya anak nen Efod;
24 manlapud tribu na saray ananak nen Efraim+ et sakey a pangulo, salanti, si Kemuel ya anak nen Siftan;
25 manlapud tribu na saray ananak nen Zebulon+ et sakey a pangulo, salanti, si Elizafan ya anak nen Parnac;
26 manlapud tribu na saray ananak nen Isacar+ et sakey a pangulo, salanti, si Paltiel ya anak nen Azan;
27 manlapud tribu na saray ananak nen Aser+ et sakey a pangulo, salanti, si Ahihud ya anak nen Selomi;
28 manlapud tribu na saray ananak nen Neftali+ et sakey a pangulo, salanti, si Pedahel ya anak nen Amihud.”
29 Sikara so ingganggan nen Jehova a mangapag-apag na dalin na Canaan parad saray Israelita.+
Paimanod leksab
^ Salanti, say Inatey a Dayat.
^ Salanti, say Baleg a Dayat, say Mediteraneo.
^ Salanti, say Mediteraneo.
^ Odino “lolooban na Hamat.”
^ Salanti, say dayat na Genesaret, odino say Dayat na Galilea.
