Numeros 36:1-13
-
Ganggan ed piasawa na bibiin mananawir (1-13)
36 Saray ulo na pamilya na saray kapolian nen Gilead ya anak nen Makir+ ya anak nen Manases manlapud saray pamilya na saray ananak nen Jose et inmasingger tan nansalita ed arapan nen Moises tan saray papangulo, saray ulo na pamilya na saray Israelita.
2 Inkuan da: “Ingganggan nen Jehova so katawan mi pian apag-apagen to so dalin ed saray Israelita bilang sakey a tawir diad panamegley na pampapalaranan;+ tan ingganggan nen Jehova so katawan mi ya iter to so tawir nen Zelofehad ya agi mi, ed saray ananak ton bibii.+
3 No miasawa rad lalaki a nanlapud sananey a tribu na Israel, say tawir na saratan a bibii et naekal met ed tawir na kaamaan mi tan niarum ed tawir na tribu a magmaliw a kawalaan da, kanian naekal itan ed tawir mi a niiter ed panamegley na pampapalaranan.
4 Natan, no onsabi so Jubileo+ parad saray totoo na Israel, say tawir na saratan a bibii et niarum met ed tawir na tribu a magmaliw a kawalaan da, kanian say tawir da et naekal ed tawir na tribu na kaamaan mi.”
5 Diad saman et ingganggan nen Moises iray Israelita diad ganggan nen Jehova: “Duga so ibabaga na tribu na saray ananak nen Jose.
6 Saya so salitan ingganggan nen Jehova parad saray bibiin ananak nen Zelofehad: ‘Nayarian day miasawa ed siopaman a labay da. Balet nepeg a say piasawaan da et manlapud sakey a pamilya ed tribu nen ama ra.
7 Say tawir na saray Israelita et agnepeg a niyalis-alis ed nanduruman tribu, ta nepeg a pansiansiaen na saray Israelita so tawir na tribu na saray inmuunan atateng da.
8 Tan balang anak a bii a walaay tawir ed saray tribu na Israel et nepeg a miasawa ed sakey a nanlapud tribu nen ama to,+ pian napansiansia na saray Israelita so tawir na saray inmuunan atateng da.
9 Say tawir et agnepeg a niyalis-alis ed nanduruman tribu, ta nepeg a pansiansiaen na saray tribu na Israel so dilin tawir da.’”
10 Ginawa na saray bibiin ananak nen Zelofehad so ingganggan nen Jehova ed si Moises.+
11 Kanian akiasawa si Mahla, Tirza, Hogla, Milca, tan Noa, a bibiin ananak nen Zelofehad,+ ed saray ananak na agagi nen ama ra.
12 Nagmaliw iran kaasawaan na lalakin nanlapud saray pamilya nen Manases ya anak nen Jose, pian mansiansia so tawir dad tribu na pamilya nen ama ra.
13 Saraya so bilin tan ganggan ya inter nen Jehova ed saray Israelita ed panamegley nen Moises diad saray patar a desierto na Moab ed abay na Jordan diad Jerico.+
