Numeros 4:1-49
4 Oniay inkuan natan nen Jehova ed si Moises tan Aaron:
2 “Nepeg ya alaen so sensus na saray ananak nen Kohat+ ed limog na saray ananak nen Levi, unong ed saray tribu ra tan unong ed saray pamilya na kaamaan da,
3 amin iramay mantaon na 30+ ya anggad 50,+ amin a kabiangan na grupon apabtangan a mankimey ed tolda a pantitiponan.+
4 “Saya so kimey na saray ananak nen Kohat diad tolda a pantitiponan.+ Sakey iyan bengatlan sankasantosan:
5 Sano ombuat so kampo, onloob si Aaron tan saray ananak to tan ileksab da so akasanib a kurtina+ insan isakbong da itan ed kaban+ na Testimonya.
6 Sakbongan da itan na katat na poka* tan tapewan da itan na asul ya abel tan iyan dad satan iramay panagsakbatan.+
7 “Apisan da met na asul ya abel so lamisaan na iyaapay a tinapay,+ tan iyan da ditan iray plato, kopa, yaong, tan saray pitsil na apay ya iinumen;+ mansiansia ditan so tinapay a regular ya iyaapay.+
8 Sakoban da iratan na ambalbalangan abel tan sakbongan day katat na poka so lamisaan tan iyan dad satan iramay panagsakbatan.+
9 Insan mangala ra na asul ya abel tan sakbongan da so kandelero+ a pansisilew, pati saray lamparaan,+ saray panagsipit, saray kargaay ngalab na satan,+ tan amin a panagkargaan na larak ya uusaren ed kandelero.
10 Balkoten da itan na katat na poka pati say amin a kagawaan na satan tan iyan da itan ed baras a panagsakbatan.
11 Tan kubotan da na asul ya abel so balitok ya altar,+ sakbongan da itan na katat na poka, tan iyan dad satan iray panagsakbatan.+
12 Insan alaen da so amin a kagawaan+ a regular dan uusaren ed panaglingkor diad masanton pasen tan iyan da iratan ed asul ya abel tan sakbongan da na katat na poka tan iyan da iratan ed baras a panagsakbatan.
13 “Nepeg dan ekalen iray dapol* ed altar+ tan kubotan da itan na kolor-ube ya abel.*
14 Itapew dad satan so amin a kagawaan ya uusaren diad panlilingkor dad altar: saray kargaay ngalab, saray tinidor, saray pala, saray palanggana, amin a kagawaan na altar;+ tan sakbongan da itan na katat na poka tan iyan dad satan iray panagsakbatan.+
15 “Sumpalen nen Aaron tan saray ananak to so panakbong ed masanton pasen+ tan ed amin a kagawaan diad masanton pasen sano ombuat la so kampo. Insan onloob iray ananak nen Kohat pian awiten da iratan,+ balet agda nepeg a diwiten so masanton pasen pian ag-ira ompatey.+ Sarayan bengatla so responsabilidad* na saray ananak nen Kohat nipaakar ed tolda a pantitiponan.
16 “Tan say responsabilidad nen Eleazar+ ya anak nen Aaron a saserdote et say pangasikaso ed larak a parad pansilew,+ say ambalingit ya insenso,+ say regular ya apay a kakanen, tan say larak a panaglana.+ Asikasoen to so interon tabernakulo tan amin a wadtan, pati say masanton pasen tan saray kagawaan na satan.”
17 Onia ni inkuan nen Jehova ed si Moises tan si Aaron:
18 “Agyo papaulyanan a naandi ray pamilya na saray Kohatita+ ed limog na saray Levita.
19 Gawa yo iya parad sikara pian manbilay ira tan ag-ira ompatey diad iyasingger da ed saray sankasantosan a bengatla.+ Onloob si Aaron tan saray ananak to tan ipabtang dad sikara so kimey na balang sakey tan no antoy awiten to.
20 Ag-ira nepeg ya onloob tan onnengneng ed saray masanton bengatla, anggano maganggano labat. Ta no andi et ompatey ira.”+
21 Insan oniay inkuan nen Jehova ed si Moises:
22 “Nepeg ya alaen so sensus na saray ananak nen Gerson+ unong ed saray pamilya na kaamaan da tan saray tribu ra.
23 Irehistrom ya amin iramay mantaon na 30 ya anggad 50 a kabiangan ed grupon apabtangan a manlingkor ed tolda a pantitiponan.
24 Saya so nipabtang ya asikasoen tan awiten na saray pamilya na saray Gersonita:+
25 Awiten da iray abel na tolda ed tabernakulo,+ say sakbong na satan tan say sakbong a katat na poka a walad tapew na satan,+ say sanib* ed lolooban na tolda a pantitiponan,+
26 saray akasabit a kurtina ed sular,+ say sanib* ed lolooban na sular+ ya akapaliber ed tabernakulo tan altar, saray lubir na tolda tan amin a kagawaan na saratan tan amin ya uusaren ed kimey ditan. Saya so nipabtang ed sikara.
27 Amin a kimey tan sasakbaten na saray Gersonita+ et nepeg ya asikasoen nen Aaron tan saray ananak to; ipabtang mo irayan amin a sasakbaten bilang responsabilidad da.
28 Saya so kimey na saray pamilya na saray Gersonita a nepeg dan sumpalen diad tolda a pantitiponan,+ tan saray responsabilidad da et walad panangiwanwan nen Itamar+ ya anak nen Aaron a saserdote.
29 “Nipaakar ed saray ananak nen Merari,+ irehistrom ira unong ed pamilya ra tan unong ed saray pamilya na kaamaan da.
30 Irehistrom iramay mantaon na 30 ya anggad 50, amin a kabiangan na grupon apabtangan a manlingkor ed tolda a pantitiponan.
31 Saya so responsabilidad dan awiten+ nipaakar ed kimey da diad tolda a pantitiponan: saray hamba+ na tabernakulo, saray baras,+ saray lusek na satan,+ saray patoonan na satan;+
32 saray lusek+ ed liber na sular, saray patoonan,+ saray palpal na tolda,+ tan saray lubir na tolda na saratan pati say amin a kagawaan na saratan tan amin a kimey nipaakar ed sarayan bengatla. Ipabtang mod sikara so kagawaan a responsabilidad dan awiten.
33 Onia so panlingkor na saray pamilya na ananak nen Merari+ diad tolda a pantitiponan, diad panangiwanwan nen Itamar ya anak nen Aaron a saserdote.”+
34 Diad saman et inrehistro nen Moises tan si Aaron tan saray papangulo+ na totoo iray ananak na saray Kohatita+ unong ed saray tribu ra tan unong ed saray pamilya na kaamaan da,
35 amin a mantaon na 30 ya anggad 50 a kabiangan ed grupon apabtangan a mankimey ed tolda a pantitiponan.+
36 Ami-amin a nirehistro unong ed saray pamilya ra et 2,750.+
37 Saraya so nirehistro ed saray pamilya na saray Kohatita, amin a manlilingkor ed tolda a pantitiponan. Inrehistro ira nen Moises tan Aaron lapud ganggan nen Jehova ed panamegley nen Moises.+
38 Nirehistro iray ananak nen Gerson+ unong ed saray tribu ra tan unong ed saray pamilya na kaamaan da,
39 amin a mantaon na 30 ya anggad 50 a kabiangan na grupo ya aturon manlingkor ed tolda a pantitiponan.
40 Ami-amin a nirehistro unong ed saray tribu ra tan unong ed saray pamilya na kaamaan da et 2,630.+
41 Oniay impangirehistro ed saray pamilya na ananak nen Gerson, amin a manlilingkor ed tolda a pantitiponan. Inrehistro ira nen Moises tan si Aaron lapud ganggan nen Jehova.+
42 Nirehistro iray ananak nen Merari unong ed saray tribu ra tan unong ed saray pamilya na kaamaan da,
43 amin a mantaon na 30 ya anggad 50 a kabiangan na grupo ya aturon manlingkor ed tolda a pantitiponan.+
44 Ami-amin a nirehistro unong ed saray pamilya ra et 3,200.+
45 Oniay impangirehistro ed saray pamilya na ananak nen Merari, ya inrehistro nen Moises tan Aaron lapud ganggan nen Jehova ed panamegley nen Moises.+
46 Inrehistro nen Moises tan Aaron tan saray papangulo na Israel so amin a Levita unong ed saray tribu ra tan unong ed saray pamilya na kaamaan da;
47 mantaon ira na 30 ya anggad 50, tan amin da et aturon manlingkor tan mangawit ed saray sasakbaten ed tolda a pantitiponan.+
48 Ami-amin a nirehistro et 8,580.+
49 Nirehistro ira lapud ganggan nen Jehova ed panamegley nen Moises, balang sakey unong ed nipabtang a kimey to tan sasakbaten to; nirehistro ira a singa ingganggan nen Jehova ed si Moises.
Paimanod leksab
^ Say Hebreon salita a tahash et nayarin sakey ya ayep ed dayat a tatawagen ed Ingles a seal. Singa iya kabaleg na dolphin.
^ Odino “iray dapol a nantaba,” salanti, saray dapol ya atalem ed taba na saray bagat.
^ Odino “kolor-ube ya abel a gawad bagoy karnero.”
^ Literal, “sasakbaten.”
^ Odino “kurtina.”
^ Odino “kurtina.”
