Numeros 5:1-31
5 Onia ni inkuan nen Jehova ed si Moises:
2 “Iganggan mo ray Israelita ya ipaway dad kampo so siopaman ya akating+ tan siopaman a walay ompapaway ed sikato+ tan siopaman ya agmalinis lapud impaniwit to ed sakey ya inatey a too.*+
3 Balanglan laki odino bii et nepeg yon papawayen. Nepeg yo ran papawayen ed kampo pian agda naalisan+ so interon kampo, a diad pegley na satan so panaayaman* ko.”+
4 Kanian ontan so ginawa na saray Israelita tan pinapaway da ra ed kampo. Unong ya imbaga nen Jehova ed si Moises, ontan so ginawa na saray Israelita.
5 Onia ni inkuan nen Jehova ed si Moises:
6 “Ibagam ed saray Israelita, ‘No say sakey a laki odino bii et akagawa na kasalanan a kaslakan a gagawaen na katooan tan agnanmatoor ed si Jehova, walay eebatan na satan a too.*+
7 Nepeg ton* ipatua+ so kasalanan to* tan ipawil toy interon kantidad bilang bayar parad kasalanan to tan aruman to ni itan na kakalima na samay kantidad;+ nepeg ton iter itan ed samay akapankasalananan to.
8 Balet no samay biktima et anggapoy maapit a kanayon to a mangawat ed bayar, nepeg ya ipawil itan ed si Jehova tan magmaliw a kien na saserdote, likud nid kalakian a karnero parad pananakbong ya usaren ton manggaway pananakbong parad samay nankasalanan.+
9 “‘Amin a masanton kontribusyon+ a nanlapud saray Israelita a niiter ed saserdote et magmaliw a kien to.+
10 Antokaman a masanton bengatla ya iter na balang sakey et mansiansian kien to. Nakayarian na saserdote so antokaman ya iter ed sikato na balang sakey.’”
11 Onia ni inkuan nen Jehova ed si Moises:
12 “Mansalita kad saray Israelita tan ibagam ed sikara, ‘Oniay nepeg a gawaen no say asawa na sakey a laki et nankasalanan tan agnanmatoor ed asawa to
13 tan akiakdol ed sikato so sakey a laki,+ a lapud satan et dinutakan toy inkasikato, balet ag-itan amta na asawa to tan nansiansia itan a maamot, tan anggapoy tasi sumpad sikato tan sikatoy agni narel:
14 Balanglan mangiimon imay asawan laki tan paniinapan toy inkamatoor na asawa to ta diad tua et dinutakan toy sarili to, odino balanglan sikatoy mangiimon tan paniinapan toy inkamatoor na asawa to anta diad tua et agto dinutakan so sarili to,
15 nepeg ya iyakar na laki ed saserdote so asawa to, pati say apay a parad asawa to, a kakaplo na sakey efa* na arinan sebada. Agto itan nepeg ya ikdan na larak odino olibano, lapud sakey itan ya apay a kakanen nipaakar ed imon, sakey ya apay a kakanen a mangipanonot ed kasalanan.
16 “‘Sikatoy iyasingger na saserdote tan paalageyen tod arapan nen Jehova.+
17 Mangala so saserdote na masanton danum a walad banga, tan mangala so saserdote na daiset a dabok ed datal na tabernakulo tan ikarga tod danum.
18 Tan paalageyen na saserdote so bii ed arapan nen Jehova tan ibuskag to so buek na bii tan iyan to ed saray dakulap na bii so apay a kakanen a mangipanonot, salanti, say apay a kakanen nipaakar ed imon,+ tan egnaan na saserdote so ampait a danum a mangiter na ayew.+
19 “‘Diad saman et sikatoy pansambaen na saserdote, ya ibaga tod bii: “No anggapoy arum a lakin akiakdol ed sika legan a wala kad pakauley na asawam+ tan agka nankasalanan tan nagmaliw a marutak, nibulos ka komon ed epekto na sayan ampait a danum a mangiter na ayew.
20 Balet no nankasalanan ka legan a wala kad pakauley na asawam diad impanutak mod sarilim, tan akiakdol kad sananey a laki+ nilikud ed asawam—”
21 Diad saman et pansambaen na saserdote so bii na sakey a samba a mangilaktip ed sakey ya ayew, tan ibaga na saserdote ed bii: “Gawaen komon nen Jehova a say ngaran mo et usaren diad pangayew tan pansamba ed pegley na kabaleyan mo, ta ipelag* nen Jehova so ulpom* tan palaragen toy eges mo.
22 Sayan danum a mangiter na ayew so onloob ed saray pait mo tan palaragen toy eges mo tan ipelag* toy ulpom.”* Diad saya et ibaga na bii: “Amen! Amen!”*
23 “‘Insan isulat na saserdote diad libro irayan ayew tan urasan to iratan ed ampait a danum.
24 Insan ipainum tod bii imay ampait a danum a mangiter na ayew, tan onloob ed sikato so danum a mangiter na ayew tan magmaliw ya ampait so resulta.
25 Tan alaen na saserdote ed lima na bii imay apay a kakanen nipaakar ed imon+ tan ipayapay to ed arapan nen Jehova so apay a kakanen, tan iyasingger to itan ed altar.
26 Mangala so saserdote na sankaakop ed samay apay a kakanen bilang apay a mangirepresenta tan paaseweken to itan ed altar,+ tan kayari na satan et ipainum tod bii so danum.
27 Sano nipainum to lad sikato imay danum, no dinutakan toy sarili to tan agnanmatoor ed asawa to, say danum a mangiter na ayew et onloob ed sikato tan magmaliw ya ampait so resulta, tan onlarag so eges to, tan napelag* so ulpo* to, tan say bii et magmaliw a sakey a bengatlan usaren diad pangayew ed limog na kabaleyan to.
28 Balet no agdinutakan na bii so sarili to tan sikatoy malinis, diad saman et sikatoy bulos lad satan a dusa, tan sikatoy makapanlukon tan nawalaay ananak.
29 “‘Saya so ganggan nipaakar ed imon,+ sano nankasalanan so sakey a bii tan dinutakan toy sarili to legan a walad pakauley na asawa to,
30 odino sano mangiimon so sakey a laki tan paniinapan to ya agmatoor so asawa to; paalageyen to so asawa to ed arapan nen Jehova, tan nepeg a sumpalen na saserdote iyan interon ganggan parad sikato.
31 Bulos lad kasalanan so laki, balet ebatan na asawa to so dilin kasalanan to.’”
Paimanod leksab
^ Odino “pantatabernakuloan.”
^ Odino “kamarerwa.”
^ Literal, “dan.”
^ Literal, “da.”
^ Say kakaplo na sakey ya efa et 2.2 litro. Nengnengen so Apendise B14.
^ Odino “pakapuyen.” Nayarin manutukoy iya ed agla pakaanak.
^ Mapatnag a manutukoy ed seksual a kayarian.
^ Odino “pakapuyen.” Nayarin manutukoy iya ed agla pakaanak.
^ Mapatnag a manutukoy ed seksual a kayarian.
^ Odino “Ontan pa komon! Ontan pa komon!”
^ Odino “onkapuy.” Nayarin manutukoy iya ed agla pakaanak.
^ Mapatnag a manutukoy ed seksual a kayarian.
