Numeros 8:1-26
8 Oniay inkuan nen Jehova ed si Moises:
2 “Mitongtong kad si Aaron tan ibagam ed sikato, ‘Sano selselan mo ray lamparaan, nepeg a naliwawaan na pitoran lamparaan so pasen ed arap na kandelero.’”+
3 Kanian ginawa itan nen Aaron: Sinelselan to ray lamparaan pian naliwawaan so pasen ed arap na kandelero,+ unong ya ingganggan nen Jehova ed si Moises.
4 Oniay inkagawa na kandelero: Satan et gawad pinanday a balitok; pinanday itan manlapud sengeg ya anggad saray rosas to.+ Say kandelero et ginawa unong ed pasingawey+ ya impanengneng nen Jehova ed si Moises.
5 Oniay inkuan lamet nen Jehova ed si Moises:
6 “Alam iray Levita ed saray Israelita, tan linisan mo ra.+
7 Oniay nepeg mon panlinis ed sikara: Walsikan mo ra na danum a panaglinis na kasalanan, tan nepeg dan kiskisan na labahas so interon laman da, ipesak da iray kawes da, tan linisan day sarili da.+
8 Insan mangala ra na kilaw a kalakian+ a baka tan say kaiba na satan ya apay a kakanen+ a gawad pinon arina a nilaokay larak, tan mangala kay sakey nin kilaw a kalakian a baka bilang apay parad kasalanan.+
9 Tan iyakar mo ray Levita ed arap na tolda a pantitiponan tan tipon moy amin ya Israelita.+
10 Sano iyakar mo iray Levita diad arapan nen Jehova, nepeg ya itapew na saray Israelita iray lima ra ed saray Levita.+
11 Tan iyapay* nen Aaron ed si Jehova iray Levita bilang apay ya ipapayapay+ a nanlapud saray Israelita, tan sumpalen da so panaglingkor da parad si Jehova.+
12 “Insan itapew na saray Levita iray lima ra ed ulo na saray kalakian a baka.+ Kayari na satan, iyapay da ed si Jehova imay sakey bilang apay parad kasalanan tan samay sakey bilang apay a popoolan pian manggawa na pananakbong+ parad saray Levita.
13 Tan paalagey mo iray Levita diad arapan nen Aaron tan saray ananak to tan iyapay* mo ra bilang apay ya ipapayapay parad si Jehova.
14 Nepeg mon ibiig iray Levita ed saray Israelita, tan magmaliw a kayarian ko ray Levita.+
15 Kayari na satan et onloob iray Levita pian manlingkor diad tolda a pantitiponan. Ontan so nepeg mon panlinis ed sikara tan iyapay* mo ra bilang apay ya ipapayapay.
16 Ta niiter ira ed siak manlapud saray Israelita. Bilang kasalat na amin a panguloan* na saray Israelita,+ alaen ko ra parad siak.
17 Ta kayarian koy amin a panguloan ed saray Israelita, balanglan too odino ayep.+ Pinasantok ira parad siak diad samay agew a pinatey koy amin a panguloan diad dalin na Ehipto.+
18 Alaen ko ray Levita bilang kasalat na amin a panguloan na saray Israelita.
19 Iter ko ray Levita manlapud saray Israelita bilang saray nibiig a parad si Aaron tan ed saray ananak to, pian sumpalen da so panaglingkor da diad tolda a pantitiponan+ parad saray Israelita tan manggawa ray pananakbong parad saray Israelita, pian agnasalot iray Israelita+ lapud onaasingger irad masanton pasen.”
20 Ontan so ginawa nen Moises tan si Aaron tan amin ya Israelita ed saray Levita. Unong ed amin ya ingganggan nen Jehova ed si Moises nipaakar ed saray Levita, ontan so ginawa na saray Israelita.
21 Kanian nilinisan na saray Levita so sarili da tan impesak da ray kawes da,+ tan kayari na satan et inyapay* ira nen Aaron bilang apay ya ipapayapay diad arapan nen Jehova.+ Insan nanggaway pananakbong si Aaron parad sikara pian nalinisan ira.+
22 Kayari na saman et linmoob iray Levita pian sumpalen da so panaglingkor da diad tolda a pantitiponan ed arapan nen Aaron tan saray ananak to. Ontan so ginawa da unong ya ingganggan nen Jehova ed si Moises nipaakar ed saray Levita.
23 Natan et oniay inkuan nen Jehova ed si Moises:
24 “Saya so totontonen parad saray Levita: Say sakey a laki a manedad na 25 a patagey et nepeg a mibiang ed saramay manlilingkor ed tolda a pantitiponan.
25 Balet no linmampas lad edad a 50, sikatoy nepeg lan manretiro ed panaglingkor.
26 Nayarian toy ontulong ed saray agagi to a mangaasikaso ed saray responsabilidad da ed tolda a pantitiponan, balet agto nayarin manlingkor ditan. Ontan so nepeg mon gawaen ed saray Levita tan saray responsabilidad da.”+
Paimanod leksab
^ Literal, “ipayapay.”
^ Literal, “ipayapay.”
^ Literal, “ipayapay.”
^ Odino “amin a panguloan a mangilulukas ed eges.”
^ Literal, “impayapay.”
