Oseas 1:1-11
1 Say mensahe nen Jehova a sinmabi ed si Oseas* ya anak nen Beeri diad saray agew nen Uzias,+ Jotam,+ Ahaz,+ tan Hezekias,+ ya arari na Juda,+ tan diad saray agew nen Jeroboam+ ya anak nen Joas,+ say ari na Israel.
2 Sanen ginapoan nen Jehova ya ibaga so salita to ed panamegley nen Oseas, oniay inkuan nen Jehova ed si Oseas: “La ka, mangasawa kay sakey a paabang a bii,* tan nawalaan kay ananak lapud prostitusyon,* ta saray totoo na dalin et sigpot dan imbeneg si Jehova lapud prostitusyon.”*+
3 Kanian sikatoy linma tan inasawa toy Gomer ya anak nen Diblaim, tan sikatoy nanlukon tan angiyanak na sakey a laki.
4 Insan oniay inkuan nen Jehova ed sikato: “Sikatoy ngaranan moy Jezreel,* ta agmanbayag et dusaen koy sankaabungan nen Jehu+ lapud impamaagus day dala ed Jezreel, tan panampoten koy panarian na Israel.+
5 Diad satan ya agew et puteren koy pana na Israel diad Lawak* na Jezreel.”
6 Sikatoy nanlukon lamet tan angiyanak na sakey a bii. Tan oniay inkuan na Dios ed si Oseas: “Sikatoy ngaranan moy Lo-ruhamah,* ta agko la kasian+ so sankaabungan na Israel, lapud pataynanen ko ra.+
7 Balet kasian koy sankaabungan na Juda,+ tan iliktar ko ra, siak, si Jehova a Dios da;+ balet agko ra iliktar ed panamegley na pana, odino espada, guerra, kabayo, odino ed panamegley na saray sundalon de-kabayoan.”+
8 Kayari ton pinakso si Lo-ruhamah, sikatoy nanlukon tan angiyanak na sakey a laki.
9 Insan inkuan na Dios: “Sikatoy ngaranan moy Lo-ami,* lapud aliwan sikayo so totook tan agak magmaliw a Dios yo.
10 “Tan say bilang na saray totoo* na Israel et magmaliw a singa saray buer ed dayat ya agnasukat odino nabilang.+ Tan diad samay pasen a nibagad sikaran, ‘Aliwan sikayo so totook,’+ et ibaga ed sikaran, ‘Sikayo iray ananak na mabilay a Dios.’+
11 Tan saray totoo na Juda tan Israel et natipon a mankakasakey+ tan manuro ira na saksakey a lider da tan ompaway irad dalin, lapud magmaliw iyan alay abig ya agew parad Jezreel.+
Paimanod leksab
^ Pinatikey a ngaran a Hosaias, a kabaliksan toy “Inliktar nen Jah; Si Jah so Angiliktar.”
^ Odino “imoral a bii.”
^ Odino “imoralidad.”
^ Odino “imoralidad.”
^ Kabaliksan toy “Say Dios so Mantanem na Bini.”
^ Odino “Abeban Patar.”
^ Kabaliksan toy “Agkinasian.”
^ Kabaliksan toy “Aliwan Totook.”
^ Literal, “saray lalakin ananak.”
