Oseas 10:1-15
10 “Say Israel et singa makapuy* a sengeg na manbubungan ubas.+
No kapigan ondarakel so bunga to, paparakelen to met iray altar to.+No kapigan mas maabig so bunga na dalin to, mas marakep met iray sagradon lusek to.+
2 Mansimpisimpitan* so puso ra;Natan et napaneknekan iran nankasalanan.
Walay mamuyak ed saray altar da tan deralen to iray lusek da.
3 Ibaga ra natan ya, ‘Anggapoy ari mi,+ ta agmi tatakotan si Jehova.
Tan antoy nagawaan na ari parad sikami?’
4 Mangibabaga ira na andiay kabaliksan iran salita, mansasamba ray tila,+ tan manggagawa ray sipanan;Kanian say ompaway a panangukom et singa saray makasamal a dika a tinmubo ed saray gulis na binaka diad uma.+
5 Ontakot iray manaayam ed Samaria lapud imahen na kilaw a baka ed Bet-aven,+
Manermen iray totoo lapud satan,Pati saray saserdote na sananey a dirios a nanliket lapud satan tan lapud gloria to,Ta ontaynan itan ed sikara tan nibantak ed arum a dalin.
6 Awiten da itan ed Asirya bilang regalo ed sakey a makapanyarin ari.+
Nabaingan so Efraim,Tan nabaingan so Israel lapud simbawan tinumbok to.+
7 Naandi* so Samaria tan say ari to,+A singa aputer a sanga ya akaletaw ed danum.
8 Sigpot a naderal iray atagey a pasen na Bet-aven,+ say kasalanan na Israel.+
Ontubo ed saray altar da iray sabisabit tan dikarikan masabit.+
Ibaga na saray totoo ed saray palandey, ‘Iyamot yo kami!’
Tan ed saray pukdol, ‘Saniban yo kami!’+
9 Nankasalanan ka, O Israel, manlapu lad samay agawad Gibea.+
Ag-ira anguman.
Agnabotan* na guerra iray agmatunong ya ananak ed Gibea.
10 Disiplinaen ko met ira no labayen ko.
Tan natipon iray totoo ya onsumpad sikara,Sano nipasakbat ed sikara so duaran kasalanan da.*
11 Say Efraim nensaman et singa nipasal a malangwer a baka a labalabay toy manilik,Kanian agko diniwit so balibalin tenger to.
Natan et mangiyan ak na mangabayo ed* Efraim.+
Say Juda so manbaka; say Jacob so mansagar parad sikato.
12 Mantanem kayoy bukel ed inkatunong tan manani kayoy matoor a panangaro.
Manbaka kayoy dalin a dadalusan+Legan a wala ni panaon na pananap ed si Jehova,+Anggad sikatoy onsabi tan ibangat to kayo ed inkatunong.+
13 Balet nambaka kayoy kaugsan,Nanani kayoy ag-inkatunong,+Tan kinan yoy bunga na panagsaol;Ta nanmatalek kayo ed dalan yo,Diad karakel na saray sundalo yo.
14 Guloen da ray totoo yo,Tan naderal iray apadiran a syudad yo,+A singa impaneral nen Salman ed abung nen Arbel,Diad agew na panlalaban sano natemek iray kainaan a kaiba iray ananak da.
15 Ontan so nagawad sikayo, O Bethel,+ lapud alablabas ya inkauges yo.
Diad palbangon et ompatey* so ari na Israel.”+
Paimanod leksab
^ Odino posiblin, “onkakayat.”
^ Odino “Andanglel.”
^ Literal, “Napareen.”
^ Odino “Agsigpot a dineral.”
^ Salanti, sano akoen day pakadusa ra a singa pako.
^ Odino “et isintak so.”
^ Literal, “napareen.”
