Oseas 3:1-5
3 Insan inkuan nen Jehova ed siak: “La ka lamet, arom imay biin aaroen na sananey a laki tan mikakalugoran,+ a singa ed pangaaro nen Jehova ed saray totoo na Israel+ anggaman oonla rad arum a dirios+ tan labalabay da ray bibingka a pasas.”*
2 Kanian sikatoy sinaliw ko na 15 piraso na pilak tan sakey tan kapalduan homer* a sebada.
3 Insan inkuan kod sikato: “Mansiansia kan kaamong ko ed dakel ya agew. Agka manggagaway prostitusyon,* tan agka miaakdol ed sananey a laki, tan ontan met so gawaen kod sika.”*
4 Ta diad andukey a panaon,* saray totoo na Israel et mansiansian andian na ari,+ prinsipe, bagat, lusek, tan efod+ tan saray estatuan terafim.*+
5 Kayari na satan et ompawil iray totoo na Israel tan anapen day Jehova a Dios da+ tan si David ya ari ra;+ tan manggiwgiw iran onlad si Jehova pian nipatnag ed sikara lamet so kaabigan to diad kaunoran iran agew.+
Paimanod leksab
^ Salanti, saramay uusaren ed palson panagdayew.
^ Say sakey a homer et 220 litro. Nengnengen so Apendise B14.
^ Odino “imoralidad.”
^ Odino “agak met miakdol ed sika.”
^ Literal, “dakel ya agew.”
^ Odino “saray dirios ed abung; saray idolo.”
