Proverbio 11:1-31
11 Say masaol a panagsukat et kabkabusol nen Jehova,Balet say suston simbangan* et makapaliket ed sikato.+
2 Sano onsabi inkamapaatagey, ontumbok so kababaingan,+Balet say karunongan et walad saray mapaabeba.+
3 Say integridad na saray maptek so mangiwawanwan ed sikara,+Balet say panamalikdo na saray agmatoor so maneral ed sikara.+
4 Say kayamanan* et agnapinabangan diad agew na sanok,+Balet say inkatunong so mangiliktar ed ipapatey.+
5 Say inkatunong na samay andiay pakabalawan so mangipepetek ed basbas to,Balet say mauges et natumba lapud dilin kaugsan to.+
6 Say inkatunong na saray maptek so mangiliktar ed sikara,+Balet saray agmatoor et nakalotan na saray dilin pilalek da.+
7 Sano ompatey so mauges a too, naandi so ilalo to;Tan naandi met so panmamatalek to ed dilin biskeg to.+
8 Say matunong so nisalba ed gonigon,Tan say mauges so onsalat ed pasen to.+
9 Lapud sangi na apostata* et nipapaarap ed kadederal so kaabay to,Balet lapud kakabatan et nililiktar so matunong.+
10 Say kamaongan na matunong et mamapaliket ed sakey a syudad,Balet sano naandi so mauges, walay paneyag ed liket.+
11 Lapud bendisyon na samay maptek, nitatandoro so sakey a syudad,+Balet say sangi na mauges so mangigegeba ed satan.+
12 Siopaman ya andiay maong a pakatebek* et mumudmoraen* toy kaabay to,Balet say toon walaan na suston pakatalos et marendeen labat.+
13 Say sakey a managpauges et manliliberliber pian ipaamta toy kompidensyal a tongtongan,+Balet say napanmatalkan a too* et iyaamot toy sekreto.*
14 Sano anggapoy makabat a panangigiya, saray totoo et mansumpal ed kadederal,Balet sikaray ontalona* no dakel so mananimbawa.+
15 Siopaman a manggagarantiya ed utang na agkabat a too et seguradon aliwliway pansumpalan to,+Balet siopaman a papaliisan* toy mipasamano pian mangisipan et magmaliw a maligen.
16 Say maomaong* a bii et makakaawat na kagalangan,+Balet saray agmapangasin lalaki et manasamsam na kayamanan.
17 Say lakin mangipapatnag na kaabigan* et nagugunggonaan,*+Balet say maruksan too et mangiyaakar na problema ed* sarili to.+
18 Say nanaalmo na sakey a mauges et andi-kakanaan ya upa;+Balet samay mantatanem na inkatunong et mangaawat na tuan tumang.+
19 Samay malet ton tatalindegan so inkatunong et mangawat na bilay,+Balet samay uusilan toy kaugsan et mansumpal ed ipapatey.
20 Saramay mauges so puso ra et kabkabusol nen Jehova,+Balet saramay manbibilay ya andiay pakabalawan et makapaliket ed sikato.+
21 Makaseguro kad saya:* Say mauges a too et agto natakasan so dusa,+Balet saray ananak na matunong et makaliktar.
22 Singa balitok a singsing ed sungot na baboySo magangganan bii a mangipupulisay ed maong a pakatebek.
23 Say pipirawaten na matunong et mansumpal ed maabig,+Balet samay iilaloan na mauges et mansumpal ed sanok.
24 Walay sakey a mabunlok a mangiiter* tan lalon naaaruman;+Wala met so sakey ya isisiblet toy nepeg ton iter, balet mansusumpal ed kairapan.+
25 Say mabunlok a too* et onaligwas,*+Tan siopaman a paiinawaen toy* arum et nainawaan met.+
26 Samay mangisisiblet na ilik to et isamba na totoo,Balet samay mangilalako ed satan et bendisyonan da.
27 Samay manggugunaet a manggaway kaabigan ed arum et napaboran,+Balet samay manaanap na kaugsan—seguradon onsabi itan ed sikato.+
28 Samay manmamatalek ed kayamanan to et napelag,+Balet say matunong et ombulaslas a singa bulobulong.+
29 Siopaman a mangaawit na gulo* ed sankaabungan to et dagem so tawiren to,+Tan say makulangkulang et magmaliw a lingkor na samay walaan na puson marunong.
30 Say bunga na matunong et kiew na bilay,+Tan samay makakatangguyor ed arum a manggaway maong et marunong.+
31 Sirin, no say matunong diad dalin et babalesen,Nagkalalo la so mauges tan say makasalanan!+
Paimanod leksab
^ Odino “say suston baton panagsimbang.”
^ Odino “Saray mablin bengatla.”
^ Odino “na toon agmanisia ed Dios.”
^ Literal, “mankaukolan na puso.”
^ Odino “bubusolen.”
^ Literal, “say sakey a matoor so espiritu to.”
^ Literal, “sasakbongan toy sakey a bengatla.”
^ Odino “niliktar.”
^ Literal, “bubusolen.”
^ Odino “makapasagyat.”
^ Odino “matoor a panangaro.”
^ Odino “et manggagaway kamaongan ed sarili to.”
^ Odino “et iiyan tod kababaingan so.”
^ Literal, “Lima ed lima.”
^ Literal, “mangikakayat.”
^ Odino “kamarerwa.”
^ Literal, “napataba.”
^ Literal, “mabulos a manasalog ed.”
^ Odino “kababaingan.”
