Proverbio 15:1-33
15 Say maulimek* ya ebat et pakepaen toy pasnok,+Balet say ansakit* a panagsalita et palooren toy sanok.+
2 Say dila na marunong et dugay panguusar to ed kakabatan,+Balet say sangi na andiay kalakal et mangibabalikas na inkamakulangkulang.
3 Saray mata nen Jehova et akanengneng ed amin a pasen,Manbabantay ed saray mauges tan saray maong.+
4 Say kalmadon dila* et kiew na bilay,+Balet say mapalikdon panagsalita et pansesengegay ermen.*
5 Say makulangkulang et agto rerespetoen so disiplina nen ama to,+Balet say makabat a too et mangaawat na panametek.+
6 Diad abung na matunong et walay dakel a kayamanan,Balet say naaani* na mauges et mangiiter ed sikato na problema.+
7 Say bibil na marunong et mangikakayat na kakabatan,+Balet aliwan ontan so puso na makulangkulang.+
8 Say bagat na mauges et makapadimla ed si Jehova,+Balet say pikakasi na maptek et makapaliket ed Sikato.+
9 Kabkabusol nen Jehova so dalan na mauges,+Balet aaroen to imay manseseet a mangipatnag na inkatunong.+
10 Say disiplina et mauges* ed pakanengneng na samay onsisian ed dalan,+Balet siopaman a kabusol toy panametek et ompatey.+
11 Say Lubok* tan say pasen na kadederal* et sankanengneng ya amin nen Jehova.+
Nagkalalo la sirin so kapusoan na totoo!+
12 Say mabalaw et agto inaro so mangipepetek* ed sikato.+
Sikatoy ag-onkonsulta ed marunong.+
13 Say maliket a puso et paligsaen toy lupa,Balet say puson asakitan et paermenen toy espiritu.+
14 Say puson makatalos et manaanap na kakabatan,+Balet say sangi na andiay kalakal et mangakan na* inkamakulangkulang.+
15 Amin ya agew na samay maniirap et mauges,+Balet samay maligligsa* so puso to et naynay a manpipiesta.+
16 Mas maong ni daiset no walay takot ed si Jehova+Nen say dakel a kayamanan a walay katekep ton kapagaan.*+
17 Mas maong ni mangan na pisipising a walay aroan+Nen say mangan na karne na pinataban* baka a walay busolan.+
18 Say toon mipepetang so ulo to et mamapawalay kolkolan,+Balet samay matantan a manpasnok et pakekepaen toy sangsangan.+
19 Say dalan na mangiras et singa alar a sabisabit,+Balet say basbas na maptek et singa marantal a karsada.+
20 Say marunong ya anak et papaliketen toy ama to,+Balet say makulangkulang a too et balbalawen toy ina to.+
21 Say inkamakulangkulang et panliliketan na samay andian na maong a pakatebek,*+Balet say toon makatebek et diretson mamapaarap ed laen to.+
22 Agnasumpal iray plano no anggapoy pantotongtong,*Balet walay nagawaan no dakel so mananimbawa.+
23 Panliliketan na too so pangibagay dugan ebat,*+Tan say salitan imbalikas ed dugan panaon et alay abig!+
24 Diad sakey a makabat, say dalan na bilay et patagey,+Pian sikatoy nipaliis ed Lubok* a walad leksab.+
25 Igeba nen Jehova so abung na mapaatagey,+Balet pansiansiaen to so ketegay dalin na balon bii.+
26 Bubusolen nen Jehova iray pakana na samay mauges,+Balet saray salitan makapaliket et malinis ed pakanengneng To.+
27 Samay mangaawat na agmanepeg a nabang et mangaawit na gulo* ed dilin sankaabungan to,+Balet samay kabusol toy pasuksok et mantultuloy a manbilay.+
28 Say puso na matunong et mandadalepdep antis ya onebat,*+Balet say sangi na mauges et mangibebesngaw na makapuy iran bengatla.
29 Si Jehova et arawrawi ed mauges,Balet dedengelen toy pikakasi na matunong.+
30 Say liwawa na saray mata* et paliketen toy puso;Say maong a balita et pakasilen toy pukepukel.*+
31 Samay ondedengel ed panametek a mangitonton ed bilayEt komportable ed limog na saray marunong.+
32 Siopaman ya agmangawat na disiplina et kabusol toy bilay* to,+Balet siopaman ya ondedengel ed panametek et onggagamor na pakatalos.*+
33 Say takot ed si Jehova et ipasal toy too ed karunongan,+Tan say inkamapaabeba et mangitonton ed kagalangan.+
Paimanod leksab
^ Odino “mauyamo.”
^ Odino “maruksa.”
^ Odino “Say makapaabig a dila.”
^ Literal, “pakaderal na espiritu.”
^ Odino “nanaalmo.”
^ Odino “alablabas.”
^ Odino “tan Abaddon.”
^ Odino “mamabano.”
^ Odino “aanapen toy.”
^ Odino “maong.”
^ Odino “kaguloan.”
^ Literal, “na papakanen ed atotong a.”
^ Literal, “mankaukolan na puso.”
^ Odino “kompidensyal a tongtongan.”
^ Literal, “ebat na sangi to.”
^ Odino “kababaingan.”
^ Odino “mannononot a maong no panon so iyebat to; maniisip ni antis a mansalita.”
^ Literal, “mamapataba ed pukepukel.”
^ Odino “Say maligsan mata.”
^ Odino “kamarerwa.”
^ Literal, “puso.”
