Proverbio 17:1-28
17 Mas maong ni sakey piraso ya amagan tinapay diad abung a walay kareenan+Nen say abung a napnoy kakanen* balet ta walay kolkolan.+
2 Say lingkor a walaay aralem a pakatalos et uleyan toy anak ya onkikiwas a makapabaing;Tan sikatoy miapag ed tawir a singa sakey ed saray sanaagi.
3 Say bangan panagdalisay et parad pilak tan say hurnoan et parad balitok,+Balet si Jehova so manguusisa ed kapusoan.+
4 Say mauges a too et iimanoen toy salitan makapasakit,Tan say mapalikdon too et ondedengel ed dila a makaderal.+
5 Siopaman a balbalawen toy mairap-bilay et iinsultoen toy Manamalsa to,+Tan siopaman a panliliketan toy pakaderal na arum et agto natakasan so dusa.+
6 Saray apon lalaki* et korona na mamatatken,Tan saray kaamaan* so kagalangan na ananak dan lalaki.*
7 Say matuan* panagsalita et agmanepeg ed sakey a makulangkulang.+
Nagkalalo la sirin a say matilan panagsalita et agmanepeg ed sakey a manuley!*+
8 Say sakey a regalo et singa mablin bato* ed samay akanggawa;+Anggan iner so laen to et sikatoy ontalona.+
9 Siopaman a peperdonaen* toy lingo et manaanap na panangaro,+Balet samay uulit-uliten ton itongtong so sakey a bengatla et pansisianen to ray maapit a sankakaaro.+
10 Mas baleg so epekto na pambano ed sakey a makatalos+Nen say maminlasus a panlewet ed sakey a makulangkulang.+
11 Say pianap na mauges a too et say panrebelde,Balet say maruksan mensahero so ibakin manusa ed sikato.+
12 Mas maong ni makasabat na sakey ya oson abalangan na saray kilawNen say makaabet na toon onkikiwas a makulangkulang.+
13 No say sakey et babalesen to na kaugsan so kamaongan,Say kaugsan et ag-onarawi ed abung to.+
14 Say pangigapo na kolkolan et singa pangilulukas ed puerta na danum;*Antis nin ompetang so sangsangan, taynan ka la.+
15 Siopaman a mangaabsuelto ed mauges tan siopaman a mangokondena ed matunong+—Pareho iran kabkabusol nen Jehova.
16 Antoy gunggona a walay pakasarag na sakey a makulangkulang ya onggamor na karunonganNo sikatoy andian na puso ya onggamor ed satan?*+
17 Say tuan kaaro et mangaaro ed amin a panaon+Tan sakey ya agi a nailaloan diad panaon na gonigon.+
18 Say toon andiay maong a pakatebek* et mipapasamano tan mipapaknaPian garantiyaan so utang na arum diad arapan na kaabay to.+
19 Samay aaroen toy kolkolan et aaroen toy kasalanan.+
Siopaman a gagawaen ton atagey so lolooban to et mangisasagyat na kadederal.+
20 Samay mauges so puso to et ag-ontalona,*+Tan samay mansasalitan mapalikdo et mansumpal ed kadederal.
21 Say ama na makulangkulang ya ugaw et naermenan;Tan say ama na andiay kalakal ya ugaw et agmaliket.+
22 Say maliket a puso et maong a tambal,*+Balet say nagogonigon ya espiritu et mangupot na biskeg.*+
23 Say mauges a too et sekreton mangawat na pasuksok*Pian pikeweten toy hustisya.+
24 Say karunongan et walad mismon arapan na toon makatebek,Balet saray mata na makulangkulang et liberliber anggad saray sampot na dalin.+
25 Say makulangkulang ya anak et paeermenen toy ama toTan pasasakiten toy puso na samay angiyanak ed sikato.+
26 Aliwan maabig so panusa ed* sakey a matunong,Tan aliwan duga so pansiplat ed gagalangen a totoo.
27 Say makabat a too et popokpokan toy pansalita to,+Tan say toon makatebek et mansiansian kalmado.*+
28 Anggan samay makulangkulang ya ag-oneesel et ipasen a marunong,Tan samay mangikukupit na bibil to et ipasen a makatebek.
Paimanod leksab
^ Literal, “bagat.”
^ Odino “Saray apo.”
^ Odino “atateng.”
^ Odino “ananak da.”
^ Odino “gagalangen.”
^ Odino “Say maabig a.”
^ Odino “et sakey a bato a mamawalay pabor.”
^ Literal, “sasakbongan.”
^ Odino “singa pangilulukas ed dam.” Literal, “pangibubulos ed saray danum.”
^ Odino “No sikatoy andian na maong a pakatebek?”
^ Literal, “mankaukolan na puso.”
^ Literal, “et agmakaromog na maong.”
^ Odino “maong a mamaabig.”
^ Odino “pamagaen toy pukepukel.”
^ Literal, “pasuksok manlapud pagew.”
^ Odino “a panmultaen so.”
^ Literal, “ambetel so espiritu to.”
