Proverbio 28:1-28
28 Saray mauges et ombabatik anta anggapoy manguusil ed sikara,Balet say matunong et matalek a singa sakey a leon.+
2 Sano diad sakey a bansa et walay onsusumlang,* mansasalat ditan so prinsipe,+Balet diad tulong na toon walaay pakatebek tan kakabatan, say sakey a prinsipe* et manbayag.+
3 Say mairap-bilay a manasaol ed saray pakaskasi+Et singa uran ya iyaanor ton amin so naakan.
4 Saramay mangipupulisay ed ganggan et mangirarayew ed sakey a mauges,Balet saramay manguunor ed ganggan et onsasanok ed sikara.+
5 Saray mauges a totoo et agda natalosay hustisya,Balet saramay manaanap ed si Jehova et natalosan day amin a bengatla.+
6 Mas maong ni mairap-bilay a mansiasiansian walaay integridadNen say mayaman a mauges so kagagawa to.+
7 Say anak a makatalos et manguunor ed ganggan,Balet samay miuulop ed saray masisiba et papabandayen toy ama to.+
8 Samay paparakelen toy kayamanan to diad panamegley na interes+ tan alablabas a panagpatuboEt mantitipon parad samay mangipapatnag na kaabigan ed mairap-bilay.+
9 Samay agto labay ya unoren so ganggan—Anggan say pikakasi to et makapadimla.+
10 Samay mangibabalang ed maptek paonlad mauges a dalan et napelag ed mismon abot a ginawa to,+Balet samay andiay pakabalawan et maabig so tawiren to.+
11 Say toon mayaman et marunong ed dilin pakanengneng to,+Balet say walad loob to et amta na samay makatebek a mairap-bilay.+
12 Sano manalo so matunong, walay baleg a kagalangan,Balet sano nawalaay pakayari so mauges, onamot iray totoo.+
13 Samay sasakbongan to ray kasalanan to et ag-ontalona,+Balet siopaman a mangipapatua tan mangipupulisay ed saratan et nakasian.+
14 Maliket so toon lanang ya akabantay,*Balet siopaman a papaaweten toy puso to et mauges so pansumpalan to.+
15 Singa manngernger a leon tan onaatakin osoSo sakey a mauges a manuuley ed totoon andiay pakayari.+
16 Say lider ya andiay pakatebek et aabusoen toy pakayari to,+Balet samay kabusol toy agmanepeg a nabang et ondukey so bilay to.+
17 Say toon nabebelatan ed impangala toy bilay na sakey a too* et ombatik ya anggad lubok.*+
Anggapo komon so ontulong ed sikato.
18 Samay manaakar ya andiay pakabalawan et niliktar,+Balet samay pikewet iray dalan to et biglan natumba.+
19 Samay dadalusan toy dalin to et nawalaan na dakel a tinapay,Balet samay manaanap na andi-kakanaan iran bengatla et napera ed irap na bilay.+
20 Say matoor a too et makaawat na dakel a bendisyon,+Balet samay maganat ya onyaman et agmansiansian andiay kasalanan.+
21 Aliwan maabig a walay paboran;+Balet say too et nayarin manggaway aliwa lapud sakey a tinapay.
22 Say toon maibeg* et pampipirawatan toy kayamanan,Balet agto amta ya onsabid sikato so kairapan.
23 Siopaman a mangipepetek ed sakey a too+ et mas napaboran+Nen samay uusaren toy dila to ed panaglarog.
24 Siopaman a tatakewan toy ama tan ina to tan ibabaga ton, “Aliwa yan mauges,”+
Et kaiba na samay toon pansesengegay kadederal.+
25 Say toon maagum* et mamapalesay agpantatalosan,Balet siopaman a maniilalod si Jehova et onaligwas.*+
26 Siopaman a manmamatalek ed dilin puso to et makulangkulang,+Balet samay manaakar ed karunongan et makaliktar.+
27 Siopaman a mangiiter ed mairap-bilay et agnakulangan,+Balet samay mangililikdem na mata to ed sikara et makaawat na dakel a panangisamba.
28 Sano nawalaay pakayari so mauges, onamot so too,Balet sano naandi ra, ondakel so matunong.+
Paimanod leksab
^ Odino “panagrebelde.”
^ Literal, “sikato.”
^ Odino “naynay a walaay takot.”
^ Odino “ed dala na sakey a kamarerwa.”
^ Odino “abot.”
^ Odino “maagum.”
^ Odino posiblin, “Say mapaatagey a kamarerwa.”
^ Literal, “napataba.”
