Proverbio 9:1-18
9 Say tuan karunongan et angipaalagey na abung to;Sikatoy nanggawa na pitoran lusek to.
2 Sikatoy angitarya na karne;*Tinimplaan to so alak to;Imparaan to met so lamisaan to.
3 Imbaki to ray lingkor ton bibiiPian ontawag manlapud atagey iran pasen na syudad:+
4 “Siopaman ya andian na kakabatan, ondago dia.”
Ibabaga to ed samay andian na maong a pakatebek:*
5 “Gala dia, mangan kay tinapay koTan inum kay alak a tinimplaan ko.
6 Taynan mo so inkaandian moy kakabatan* pian manbilay ka;+Manakar ka a diretso ed dalan na pakatalos.”+
7 Samay mangipepetek ed sakey a mabalaw et nabaingan labat,+Tan siopaman a mamabano ed sakey a mauges et nasakitan.
8 Agmo ipepetek so sakey a mabalaw ta busolen to ka.+
Ipetek mo so toon marunong, tan aroen to ka.+
9 Bilin mo so toon marunong, tan sikatoy magmaliw a lalon marunong.+
Ibangat moy sakey a matunong, tan naaruman so nanaaralan to.
10 Say takot ed si Jehova et gapoan na karunongan,+Tan say pikakabat ed Sankasantosan+ et mankabaliksay pakatalos.
11 Ta diad panamegley ko et ondakel iray agew mo,+Tan say bilay mo et naaruman na saray taon.
12 No magmaliw kan marunong, sikay marunong parad pankaabigan mo,Balet no mabalaw ka, akoen mon bukor so irap.
13 Say makulangkulang a bii et maingal.+
Sikatoy ignorante tan anggapon balot so amta to.
14 Sikatoy akayurong diad lolooban na abung toDiad sakey a yurongan ed atagey iran pasen na syudad,+
15 Ya ontatawag ed saramay ondadalan,Saramay manaakar a paarap ed laen da:
16 “Siopaman ya andian na kakabatan, ondago dia.”
Ibabaga to ed saramay andian na maong a pakatebek:*+
17 “Saray tinakew a danum et masamsamit,Tan makapaliket so kakanen ya inakan ed amot.”+
18 Balet agto amta a wadman iray inaatey ya andiay pakayari,A saray sangkaili na sayan bii et walad kaaralman na Lubok.*+
Paimanod leksab
^ Literal, “Sikatoy amarti na papartien to.”
^ Literal, “mankaukolan na puso.”
^ Odino “iray andiay kakabatan.”
^ Literal, “mankaukolan na puso.”
