Ruth 2:1-23
2 Natan et walay sakey a mayamyaman a lakin kanayon na asawa nen Noemi; say ngaran to et Boaz,+ tan sikatoy nanlapud pamilya nen Elimelec.
2 Et inkuan nen Ruth a Moabita ed si Noemi: “Abuloyan mo ak pan onlad kaumaan tan mantudtor+ na saray dawa, a tumboken ko so siopaman a mangipatnag ed siak na kaabigan.” Kanian inmebat si Noemi ed sikato: “Sige, la ka ana’ko.”
3 Diad ontan et sikatoy inmalis tan nantudtor ed uma, a manumtumbok ed saray manag-ani. Nibanbanan say nakar to et diad uma nen Boaz,+ a nanlapud pamilya nen Elimelec.+
4 Diad saman et sinmabi si Boaz manlapud Betlehem tan inkuan to ed saray manag-ani: “Niwala komon ed sikayo si Jehova.” Et inmebat ira: “Bendisyonan ka komon nen Jehova.”
5 Insan tinepet nen Boaz ed samay kalangweran a lakin mangaasikaso ed saray manag-ani: “Siopan pamilya so nanlapuan na sayan kalangweran a bii?”
6 Inmebat imay kalangweran a lakin mangaasikaso ed saray manag-ani: “Sikatoy sakey a Moabita,+ a kaiba nen Noemi a pinmawil manlapud kaumaan na Moab.+
7 Tinepet to, ‘Nayari ak a mantudtor+ tan mantipon na saray pinalot a dawa* a natitilak na saray manag-ani?’ Et sikatoy mantutudtor nanlapu lad insabi to nen kabuasan tan natan labat yinmurong diad alolong pian manpainawan magano.”
8 Diad saman et inkuan nen Boaz ed si Ruth: “Dengel mo ak, ana’ko. Agka mantutudtor ed arum ya uma, tan agka oonla ed arum a pasen; agka onaarawi ed saray lingkor kon bibii.+
9 Say nengneng mo labat et say uman panaanian da, tan miulop kad sikara. Imbilin kod saray kalangweran a lalaki ya agda ka didiwiten.* Sano napaet ka, la ka ed saray buyog tan inum kad samay inasol na saray kalangweran a lalaki.”
10 Et sikatoy tinmuek tan dinmakmomo ed dalin tan inkuan to: “Panon kon agamoray panangabobon mo, tan akin ya iimanoen mo ak, anta sakey ak a dayo?”+
11 Inmebat si Boaz: “Nadngelan koy amin a ginawam parad katulangan mo kayari impatey nen asawam tan say impanaynan mo ed amam tan inam tan ed dalin na saray kakanayon mo pian onla kad baley ya agmo amta.+
12 Komon ta bendisyonan nen Jehova so gagawaen mo,+ tan wala komoy sigpot a tumang mo manlapud si Jehova a Dios na Israel, a diad silong na saray payak to et manpapasalimbeng ka.”+
13 Diad satan et inkuan to: “Komon ta nagamoran koy panangabobon mo, katawan ko, lapud niligliwam ak tan makapabiskeg na liknaan so imbagam ed* lingkor mo, anggaman aliwa ak a sakey ed saray lingkor mo.”
14 Sanen oras la na panangan et inkuan nen Boaz: “Gala dia, mangan kay tinapay, tan idelnet mod tuka.” Kanian sikatoy akirungo ed saray manag-ani. Insan dinerewan nen Boaz na saray insanglil ya ilik, tan sikatoy angan tan naksel, tan wala ni kera to.
15 Sanen sikatoy inmalagey pian mantudtor+ lamet, binilin nen Boaz iray kalangweran a lalakin lingkor to: “Paulyanan yo labat a mantudtor na saray pinalot a dawa,* tan agyo tratratoen na aliwliwa.+
16 Manguyos kayo met na pigaran dawa ed saray abedber ya inani yo, tan itilak yo pian natudtor to, tan agyo babanoen.”
17 Et intuloy toy nantudtor ed uma ya anggad labi.+ Sanen pinaspas to ray atudtor to, inmabot itan ed manga sakey efa* a sebada.
18 Insan inawit tod syudad, tan anengneng nen katulangan to so atudtor to. Tan samay kera ton kakanen+ sanen naksel la et impaway to tan inter tod katulangan to.
19 Et inkuan na katulangan to: “Iner so nantudtoran mo natan? Iner so nankimeyan mo? Nabendisyonan+ komon imay akaimano ed sika.” Kanian imbaga tod katulangan to no siopay makanggawa ed uma a nankimeyan to, a kuan to: “Say ngaran na samay makanggawa ed uma a nankimeyan ko natan et Boaz.”
20 Diad satan et inkuan nen Noemi ed manugang to: “Komon ta sikatoy bendisyonan nen Jehova, a naynay a mangipapatnag na matoor a panangaro ed saray mabilay tan inatey.”+ Tan inkuan to ni: “Saman a laki et anggapoy arum ed sikatayo.+ Sikatoy sakey ed saray mananondon tayo.”*+
21 Insan inkuan nen Ruth a Moabita: “Imbaga to met ed siak, ‘Agka onaarawi ed saray komikimey ko ya anggad agda nasumpal so interon aanien.’”+
22 Kanian inkuan nen Noemi ed si Ruth a manugang to: “Mas maabig a tua ana’ko no miulop kad saray lingkor ton bibii nen say walay manggulod sika ed sananey ya uma.”
23 Kanian sikatoy ag-inmarawi ed saray bibiin lingkor nen Boaz tan nantudtor anggad kasumpal na panag-ani na sebada+ tan trigo. Tan sikatoy nansiansian kaiba nen katulangan to.+
Paimanod leksab
^ Odino posiblin, “saray pingey.”
^ Odino “gogonigonen.”
^ Literal, “akitongtong ka ed puso na.”
^ Odino posiblin, “saray pingey.”
^ Manga 22 litro. Nengnengen so Apendise B14.
^ Odino “sakey ed saray kanayon tayo a walaay kanepegan a manondon.”
