Ruth 3:1-18
3 Natan et inkuan ed sikato nen Noemi a katulangan to: “Ana’ko, agta manepeg labat ya iyanapan ta kay ayaman* mo,+ pian magmaliw a maabig so kipapasen mo?
2 Agta kanayon tayoy Boaz?+ Sikato may pankikimeyan na saray bibiin piuulopan mo. Diad sayan labi et sikatoy mantaep na sebada diad panag-ilikan.
3 Kanian manames ka tan manpuyok kay ambalingit a larak; isulong moy sankarakepan a kawes mo* tan la kad panag-ilikan. Agmo ipapalikas ed sikato a wadman ka anggad ag-asumpal a mangan tan oninum.
4 Sano ondukol la et tandaan moy pasen a dukolan to; asinggeran mo tan ekal moy akasakbong ed sali to tan dukol ka. Et ibaga tod sika no antoy nepeg mon gawaen.”
5 Diad satan et inkuan to: “Gawaen koy amin ya imbagam.”
6 Kanian sikatoy linmad panag-ilikan tan ginawa ton amin so imbilin ed sikato nen katulangan to.
7 Kaleganan na satan et angan tan inminum si Boaz, tan malikeliket so puso to. Insan dinmukol diad sampot na bunton na saray ilik. Kayari na satan et agnampalikas a sinmingger si Ruth tan inekal toy akasakbong ed sali nen Boaz tan sikatoy dinmukol.
8 Kasabi pegley-labi et manggiwgiw si Boaz, kanian binmangon tan anengneng ton walay biin akarukol ed salian to.
9 Inkuan to: “Siopa ka?” Et sikatoy inmebat: “Siak si Ruth a lingkor mo. Iyules mo komon so kawes mo* ed lingkor mo, ta sakey kan mananondon.”+
10 Diad saman et inkuan to: “Bendisyonan ka komon nen Jehova, ana’ko. Mas impatnag moy matoor a panangarom natan nen say nen inmuna,+ ta agka nananap ed limog na saray kalangweran a lalaki, mairap man odino mayaman.
11 Et natan, ana’ko, agka mapaga. Amin ya imbagam et gawaen ko parad sika,+ ta amta na amin a walad syudad* a maomaong kan bii.
12 Tua a sakey ak a mananondon,+ balet walay mananondon a mas asingger a kanayon yo nen say siak.+
13 Mansiansia ka dia natan a labi, tan no dondonen to ka ed kaimbuasan, maabig! Paulyan mon sikato so manondon ed sika.+ Balet no agto ka labay a dondonen, siak so manondon ed sika, unong a mabilay si Jehova. Dukol ka ni dia anggad kabuasan.”
14 Kanian sikatoy dinmukol diad salian nen Boaz anggad kabuasan tan binmangon antis ya onliwawa pian anggapoy makanengneng ed sikato. Et inkuan nen Boaz: “Anggapo komoy makaamta a walay biin linmad panag-ilikan.”
15 Inkuan to ni: “Awit mo dia ’tay akasulong ed sikan balabal, tan ibuskag mo.” Kanian imbuskag to, tan kinargaan itan nen Boaz na anemiran sukat* a sebada tan impaagto tod sikato, insan linma lad syudad si Boaz.
16 Et sikatoy amawil ed katulangan to, ya angikuan ed sikato: “Antoy agawa,* ana’ko?” Diad saman et imbaga tod sikato so amin a ginawa nen Boaz.
17 Imbaga to ni: “Sayan anemiran sukat a sebada et inter tod siak tan inkuan to, ‘Agka oonlan kalimalima ed katulangan mo.’”
18 Diad saman et inkuan to: “Dia ka labat ana’ko, ya anggad naamtaan mo no antoy pansumpalan na sayan bengatla, ta saman a laki et ag-ondeen anggad agto naasikaso iyan bengatla diad sayan agew.”
Paimanod leksab
^ Literal, “pasen a pampainawaan.”
^ Odino “isulong mo ray ilalatop mon kawes.”
^ Odino “saloy na kawes mo.”
^ Literal, “amin a puerta na totook.”
^ Nayarin anemiran sukat a seah, odino manga 44 litro. Nengnengen so Apendise B14.
^ Literal, “Siopa ka?”
