Salmo 136:1-26
136 Misalamat kayo ed si Jehova, ta sikatoy maomaong;+Say matoor a panangaro to et mansiansia ya anggad angga.+
2 Misalamat kayo ed Dios na saray dirios,+Ta say matoor a panangaro to et mansiansia ya anggad angga.
3 Misalamat kayo ed Katawan na saray katawan,Ta say matoor a panangaro to et mansiansia ya anggad angga.
4 Sikato labat so manggagawa na makapakelkelaw iran bengatla,+Ta say matoor a panangaro to et mansiansia ya anggad angga.+
5 Sikatoy marundunong a nanggawa ed* katawenan,+Ta say matoor a panangaro to et mansiansia ya anggad angga.
6 Imbilkag toy dalin diad tapew na saray danum,+Ta say matoor a panangaro to et mansiansia ya anggad angga.
7 Sikatoy nanggawa na saray angkakabaleg a liwawa,+Ta say matoor a panangaro to et mansiansia ya anggad angga,
8 Say agew pian manuley no kaagwan,+Ta say matoor a panangaro to et mansiansia ya anggad angga,
9 Say bulan tan saray bitewen pian manuley no labi,+Ta say matoor a panangaro to et mansiansia ya anggad angga.
10 Pinapatey to ray panguloan na Ehipto,+Ta say matoor a panangaro to et mansiansia ya anggad angga.
11 Impaway toy Israel ed Ehipto,+Ta say matoor a panangaro to et mansiansia ya anggad angga,
12 Diad panamegley na mabiskeg a lima+ tan akaunat a taklay,Ta say matoor a panangaro to et mansiansia ya anggad angga.
13 Binelsay* toy Ambalangan Dayat,+Ta say matoor a panangaro to et mansiansia ya anggad angga.
14 Pinadalan toy Israel diad pegley na satan,+Ta say matoor a panangaro to et mansiansia ya anggad angga.
15 Imbantak toy Faraon tan say armada to diad Ambalangan Dayat,+Ta say matoor a panangaro to et mansiansia ya anggad angga.
16 Intonton to ray totoo to diad kalawakan,+Ta say matoor a panangaro to et mansiansia ya anggad angga.
17 Dinederal to ray makapanyarin arari,+Ta say matoor a panangaro to et mansiansia ya anggad angga.
18 Pinapatey to ray mabiskeg ya arari,Ta say matoor a panangaro to et mansiansia ya anggad angga,
19 Si Sihon+ ya ari na saray Amoreo,Ta say matoor a panangaro to et mansiansia ya anggad angga,
20 Tan si Og+ ya ari na Basan,Ta say matoor a panangaro to et mansiansia ya anggad angga.
21 Inter toy dalin da bilang tawir,+Ta say matoor a panangaro to et mansiansia ya anggad angga,
22 Sakey a tawir nen Israel a lingkor to,Ta say matoor a panangaro to et mansiansia ya anggad angga.
23 Sankanonot to itayo sanen nipaabeba tayo,+Ta say matoor a panangaro to et mansiansia ya anggad angga.+
24 Ililiktar to itayo ed saray kalaban tayo,+Ta say matoor a panangaro to et mansiansia ya anggad angga.
25 Iikdan toy naakan so amin a mabilay a bengatla,*+Ta say matoor a panangaro to et mansiansia ya anggad angga.
26 Misalamat kayo ed Dios na katawenan,Ta say matoor a panangaro to et mansiansia ya anggad angga.
Paimanod leksab
^ Odino “Ginawa to tekep na pakatalos so.”
^ Literal, “Impankakapiga.”
^ Literal, “amin a laman.”
