Salmo 145:1-21
Panangirayew nen David.
א [Aleph]
145 Itandoro ta ka, O Dios ko ya Ari,+Idayew koy ngaran mo ya anggad angga.+
ב [Beth]
2 Idayew ta ka diad amin a panaon;+Idayew koy ngaran mo ya anggad angga.+
ג [Gimel]
3 Si Jehova et agnaparaan tan sankamakanepegan na dayew;+Say pakapanyari to et agnausisa.*+
ד [Daleth]
4 Amin a henerasyon et idayew da ray kimey mo;Ipaamta ray makapanyari iran gawam.+
ה [He]
5 Itongtong day maglorian karakpan na katagyan mo+Tan dalepdepen koy makapakelkelaw a kimey mo.
ו [Waw]
6 Itongtong da so nipaakar ed saray makapadinayew a gagawaen mo;*Tan iyabawag ko so nipaakar ed pakapanyarim.
ז [Zayin]
7 Saray ibabalikas dan panangirayew et onagus a singa subol sano nanonotan day kabaleg na kamaongan mo,+Tan oneyag irad liket lapud inkatunong mo.+
ח [Heth]
8 Si Jehova et maabagey tan mapangasi,+Matantan a manpasnok tan abalbaleg so matoor a panangaro to.+
ט [Teth]
9 Si Jehova et maomaong ed amin,+Tan say panangasi to et napatnagan ed amin a kimey to.
י [Yod]
10 O Jehova, igloria ka na amin a kimey mo,+Tan idayew ka na saray matoor ed sika.+
כ [Kaph]
11 Iyabawag day gloriam bilang ari+Tan salitaen day nipaakar ed biskeg mo,+
ל [Lamed]
12 Pian nipaamta ed saray totoo so makapanyari iran gawa to+Tan say maglorian karakpan mo bilang ari.+
מ [Mem]
13 Sika so ari ya anggad angga,Tan mantultuloy so pananguley mo ed amin a henerasyon.+
ס [Samekh]
14 Tutulongan nen Jehova so amin a natutumba+Tan iyaatagey to so amin a nipaabeba.+
ע [Ayin]
15 Amin a mata et maniilalon onnenengneng ed sika;Iikdan mo ray naakan diad panaon a nakaukolan da.+
פ [Pe]
16 Ilulukas moy limamTan pepeneken moy pirawat na balang mabilay a bengatla.+
צ [Tsade]
17 Si Jehova et matunong ed amin a gagawaen to+Tan matoor ed amin a kimey to.+
ק [Qoph]
18 Si Jehova et asingger ed amin ya ontatawag ed sikato,+Amin ya ontatawag ed sikato diad katuaan.*+
ר [Resh]
19 Pepeneken to so pirawat na saramay ontatakot ed sikato;+Dedengelen to so ikekerew day tulong, tan ililiktar to ra.+
ש [Shin]
20 Babantayan nen Jehova so amin a mangaarod sikato,+Balet deralen to so amin a mauges.+
ת [Taw]
21 Iyabawag na sangik so dayew nen Jehova;+Komon ta say masanton ngaran to et idayew ya anggad angga na balang mabilay a bengatla.*+
Paimanod leksab
^ Odino “agnarandan na pakatalos.”
^ Odino “pakayarim.”
^ Odino “a masimoon.”
^ Literal, “amin a laman.”
